Read Alladian EJEKIEL 39 Bible Online

EJEKIEL 39 - Alladian bible

EJEKIEL 39

¹“Tanike ue, Gogke mirupe kaalu agomem lula Ruutum Shédí bí sikepe ludung emla pobilangka: ‘Meshek kídí kelang Tubal kídíke rojape ina E Gog, ngo nokke mirupe ikai.

²Nom ngo píkkup-píklatla hogoobomyé. Ngo nom mootena línggíng telokkake laatokla, Israelke dííte kídíem mimak iabomdope imoyé.

³Depe irongem nokke lakké delok iyyiem oletmoyé, delokke nokke lakbík delok epuk kídíem oletmoyé.

⁴Israel ke dííte kídílo, nolang nok sipayinge, delokke deddína nokkíng tokmín gena maglíng opéé kídí takamde oletla siyinyé. Noluke simang kídí deme sogum kídíemlang situm-simyo kídíem dodope ruulíkyé.

⁵Nolu takam moonam kamana among yiibelo sila dooyinyé. Sikepe Ruutum Shédí ngo polendung.

⁶Ngo Magog among teyololang siyéng asi robeng kídílo dengomrupe duuna kídílo eme rílíkgooyé.’ Delomin RUUTUM bí ngo emla bulu kényinyéne.

⁷“Israel kídí aralo ngokke deena amínem kényinmoyé. Ngokke deena amínem deemang-amo moyimayé. Dekepe irongkuem, RUUTUM Ngo, Israel ke Deena bí emla tani takamke opín-buange kényinyé.

⁸De longede aropakpe pííyé! Aropakpe dekerupe ato-siro kídíde iyé. Sikepe Ruutum Shédí ngo polendung. Sim longe simmin ngo potídune.

⁹“Dekepe irodem doolung kídí takamlo duuna Israel ami kídíe gílenla, noluke gíníng, yoksa, tamkung, kattam, iyyi epuk, singgil atí-sirí, mimak ekurang, aménalok ila bottena takamem laadumsula, buluke esing parnanape iyinyéku, delokke rompak pakyinyé. Dítak kínídkope bulu esingpe parnayé.

¹⁰Dekepe mimak ekurang kídídem esingpe, eme parnanape ikunam legape, bulu arík kídílok delokke moonamlok esing natapoyimayé. Séko bulu, Israel kídíem líítodín, bulum lííyan suyéku, delokke rotna kídíem rotyan suyéku. Sikepe Ruutum Shédí ngo polendung.”

¹¹RUUTUM bí poto, “Dekepe ido longe kídí delo Sina Siyéngke sanggodan, mibo bedang enpom yiibe delo Gogme ngo yusipeko moolopko biyé. Delo Gog melang bíkke milu-mibam apíídem yuyinla, mibo kídíekom bedang gípeko kaimape iyé. Depeila dem Gog maglíngke Yiibe emyé.

¹²Israel kídíe simang kídídem yusila, amongdem deedokupe ikupe poolo kínídko ibomsuyé.

¹³Among delokke ami takame simang yusing kolo moomang líkyé. Ingkona longelo ngo dekepe imola ngok angun-abéem yidgeyédí, de longede mííyargenam longekope iyaryé. Ruutum Shédí ngo sikepe polendung.

¹⁴Poolo kínídkope irongemte among delokke rego mipílo simangem kaatagoola, mayin goola, amongdem deemo dokupe amiem ullenla, donggoona simang kídíem kaatagooyéku.

¹⁵Among delokke rego mipílo, buluke madu-matoksula idungem yarukna tani alongko paayémílo, delo bulu iyodko ilíkyé. Dekedem kaala ago arung koona kídíe deeneme joobom langkula, Gog maglíngke Yiibe delo yulíkyéku.

¹⁶Dekepe Gog maglíngke ago kídí abedelo, buluke maglíng méélamlo amínpe mínlíknam Hamonah emnam doolungko kayé. Sikepe bulu asi among dem deeyin moyéku.

¹⁷“Tanike ue, Ruutum Shédí bí sikepe podung: Moonam lokke kebung-pettang, situm-simyo, sibé-sikat takamem ngokke buluke legape irung bipenam ipak adínem dodope tomdum suyin langka. De Israel dííte kídílo botteruna ipak inam kísanakope iyé. Delo bulu adín dola iyyi tííla iyé.

¹⁸Dekede Bashan lokke ngelna rubo kísa, sobén kísa, méro kísa, mér kísa ina, tani among sokke ruutum kídí kelang miga-miram ami kídíke adín kídíelang iyyi kídíe, dekedem bulu dola-tííla iyindope.

¹⁹Edílo ngo ipak itonam kísa bulum petyinyédí, delo pettang kídíe lang taro kídíe una adín kídíem angil gedupe dola, iyyi kídíem tíngir sudupe tíílíksula ipe aido.

²⁰Ngokke donam lengkenglo bulu guré kídíke adín emlang bulum dugbona kídíke adínem, delokke sipaying maglíngke adín kídíem, delokke mimak ikína daadi takamke adín kídíem, edítko paklayédí bulu dope aido. Ruutum Shédí ngo sipe polendung.”

²¹RUUTUM bí podung, “Ngokke angun abéem opín takamke kangkolo lengkanyé. Ngokke raadang pénsam kebang agom lunamem, ngokke ralnamlok agér inamem, opín takamem kénmoyé.

²²Delok longe delokke ila RUUTUM ngo buluke Shédíe emla Israel kídíe kényinyé.

²³Depe irongem, Israel kídíe ngom míngke sumape ila mibo-miying amolo monnyok kosuto, delokke buluke paab legape dekepe ito, emla mibo opín tabunge kényinyéku. Dekepe ilamin, buluke keralok ngok mikmoem runyok sugetone, delokke bulum miru alag aralo kolíktone, delokke bulu midu-mimaklo sinyok gootone.

²⁴Ngokke mikmoem buluke keralok runyokgela, buluke imem-hamem, deemang-amo dai paab legape ngo bulum buluke ajéng paabasupe itung-iréto.”

²⁵Ruutum Shédí bí podung, “Ngo Jakobke oten ome-oo kídíem, buluke abílpe dungkolok laalenyéku. Ngo Israel kídíem ayasuyéku, delokke ngokke deena amínem deemang akang kamoyimayé.

²⁶Edílo bulu agí amongsulo lekoda ebín-esonpe miru ibomna kaimape dengomrupe duuyékudí, delo buluke ngome yatkolok annying paanam kídíem, bulu kénsuyimayé.

²⁷Edílo ngo, buluke miru kídíke among yétalok goodum sulangkula, mibo ami kídarke alag aralok laapít lenyékune, delo deddína opín-buang kangkolo, bulu kelok ngok agí deenamem lengkan biyé.

²⁸Ngo bulum mibo opín kídí aralo monnyokla, bulu yényok gootuakom, bulum midum atelkote mepakmape tabungem goodum sulang kula buluke agí amolo laayin aayéku. Delo bulu, RUUTUM ngo buluke Shédí bí emla kényinyéku.

²⁹Dekepe irongkuem, ngokke mikmoem buluke keralok rusi sugeyimayé. Kapeila ngokke Aidem Israel kídí teyolo purlíkyé. Sikepe Ruutum Shédí ngo polendung.”