Read Alladian EJEKIEL 4 Bible Online

EJEKIEL 4 - Alladian bible

EJEKIEL 4

¹Shédí bí poto, “Tanike ue, líísakko laala nok keralo dem mepala delo Jirusalem luune emla kangkén nanape gídyod líkto.

²Delokrongem, mirulok iyabompename emlang kaananape delo ampenglo arunglok koola, kédéngem geonla, notko mola, yapgo bénnana esinglok líísak deme megoolangka.

³Ato anana arem ekungko laala dem nokkelang luune pénsam delo etorpe melangka. Luunedanpe kaalangka. Luunedem mirue mimak iya bomdung, delokke no dem mimak ila aabomnade. Si Israel opín bulukepe iyodpe iyé.

⁴“Delo no lakkédanpe ketpi langka, delo ngo nokke teyolo, Israel opínke imem-míímemem ruulíkyé; 390 longekope no delo duuyé, delokke buluke imem-míímem legape ankí biyé. Ngo nokkíng longe atelpe buluke dítaklok ingéénam paapenamem ila, adírem bilíkdung.

⁶Dem nokke iyinrongeme nokke lakbíkdanpe ketpilangkuka, delokke Judahke imem-míímemnam legape 40 longeko, dítak kepe longe lotel ko ila, bulume ingéng kupenamem lengkan langka.

⁷“Jirusalemem igoobomnaem kanggap langka. Delokke alage lakraape idola Jirusalemke mirupe polu-poor agomem polangka.

⁸Delokke kaalangka, ngo nom ingéépenam longe kídarsi gíyinmang tetedem, bedu-beleng lamadope, sotkya lok ééla meyé.

⁹“Delokke no gehu, ayag, péron, motor, daal, delokke mirunglok anyong-anyongpe idumsula, delok ettíng mola, nokke lakkédanpe 390 longeko keddung ayardem dolangka.

¹⁰Nokke longe-longe dopenamem bekkíla 230 gramko biyé, deme no longelo letel dorum petompe dobom langka.

¹¹Asi emteng nom bati annyi petomko longe legape biyé.

¹²Deme no takame kaadope tani tayé ereenalok eme parla, delo ettíngdem inyula dope aiyé.”

¹³RUUTUM bí, “Ngokke Israel amiem mibo-miying amolo monpan-monran suyém ayonlok luyanamem buluke dopenamem lengkanname si,” emla poto.

¹⁴Idokom ngo, “E RUUTUMA, ngo edílokom agíem deemang mokímang. Koo lokkai ngo edíloteng sigope sisuna, delokke monkír rekkanam tarolok adínem dokímang. Ngo edílokom deemangna ato dokímang,” emla poyansuto.

¹⁵Dekepeila RUUTUM bí, “Airudo, ngo nome gooru tayélok nokke dopenam ettíngem pamnyunadope bidungku,” emla poto.

¹⁶Bí poyansudola pokai, “Tanike ua, ngo Jirusalemlo dope-tíípenamem aamoyimayé. Delo duuna ami kídare dope-tíípenamem ruula ikolok yagorupe míídír alooyé.

¹⁷Bulu dope-tíípename pííramla lalgoosuyé, delokke buluke paab imem kolok bulu nyokyé.”