Read Alladian EJEKIEL 40 Bible Online

EJEKIEL 40 - Alladian bible

EJEKIEL 40

¹Ngoluke mibo amolo duunyokdo dítak takying annyi kolang dítak pilngo lokke dítak aníke looyingnana delolang Jirusalemem toodí takying kola takpikope miru alag aralo bomdodelo RUUTUM ke alage ngokkíng ugaala, bí ngom delo jongaato.

²Kaarí-kaanyokolo, Shédí bí ngome Israel amolo langaala, kedonna díítekolo melíkto. Sokkodanlo ngo doolung ekumeke kaato.

³RUUTUM bí ngome deke delokke anínyalo aaboto. Delo ngo pitol kísana asirna amiko kaato. Bím hojonnana nomang kolang kínana arem banggén bodoonako bomla yabgo eyablo dagdope kaato.

⁴Bí ngom lupodo, “Tanike ue, kaatola, no aiyope tatgapla, ngokke lengkannam takamem aipakpe kanggap langka. Sok legape nome so bomato. Nokke kaanam takamem Israel ami kídíem pokan bikupe aiyé.”

⁵Ngo Kumkeng Ekumdem torgootuupe líísak ekumko kaato. Amide mitar angumpe bodoona kínana banggéndem bomla etordem kíto. De kedone mitar angumko, delokke biisame mitar angumko ido.

⁶Delo bí sanggodanem gekasuna lamgépe gíboto. Bí líísak baarok kídí delo reesangkai, delo teyongyalum lamgé delokkem kíto. De mitar angumkope eerído.

⁷Delok kékon delo kaabomna ami kídí dungko pírtek angum asak lakbík-lakképe kako pírtek bedangko kaado. Pírtek miyoode kéényung appikana mílípe ido. Deke delokke ape-bodong kídíe mitar angum asakpe iyindo. Bulum dungkéna líísak suppi kídíde mitar annyi kolang mitar arotko biisame iyindo. Kaabomna dungko pírtek kídíke kékon delo mitar angumna gípeko bedangko kado. De bedangde Kumkeng Ekum aatak pírteklo aalíkdo.

⁸Delo bí Kumkeng Ekum aatak pírtekdem kígooto. De mitar appikope eerído.

⁹De pírtek gídung-gítoksuko bedang lokke gítup yalumkue, delokke Kumkeng Ekumem duuríksune. Delokke líísak suppi kídíde mitar atelkope biisame ido.

¹⁰Bedang delokke lakbík lakképe duuna kaabomna kídíke pírtek kídíde, bodong elang ape kídíe akampaksudo, delokke suppi kídí ke biisam kídí dete akam suyindo.

¹¹Depe irodem amide Kumkeng Ekum lamgé aatak bedang gíkeng kídíke abe eelenem kígooto. Dekedem idumsue mitar akké kolang arotko ido. Delokke lamgé ayanade mitar pilngoko ido.

¹²Kumkeng Ekum kaabomna kídíke dungko pírtek kídíke kerang kídí delo, 50 séntimitar kedonna delokke 50 séntimitar biisamna líísak suppi aménako kaado. Pírtek kídí dedan mitar angumpe apela bodonge iyindo.

¹³Depe irodem bí gídung-gítok sukodem kítak sudanla, pírtekkon lokke méélam suppilok ila, pírtekkon lokke méélam suppilope bodongem kíto. De mitar íying kolang annyi kolang arotko ido.

¹⁴Deke delokke ila mootengoolo duuna pírtekde Kumkeng Ekum gíídang danpe lento. De amide dem pírtekdem kíto. Kírongdem kaaname pírtekde mitar íyingkope bortage ido.

¹⁵Luyu lamgé delokke líísak suppi delokke ila arangoolo duuna, aayin yalumkolo duuna pírtek deloope, gídung-gítok suko gípom delokke bodonge apíípe mitar íying annyi kolang pilngoko ido.

¹⁶Pírtek kídí takamke luyudanke suppi kídí delo kirki arungeke kayindo. Delok kísa pírtek arang kídí delote deke kayinto. Pírtek arangke líísak suppi kídí delo kéjur esing mimangem ilíkla iyindo, delokke dekede gídung-gítok sukodanpe gekasula iyindo.

¹⁷Delo de amide ngom bedang delok gíbola Kumkeng Ekum lokke luyu gíídalo aaboto. Delo luyudanke líísak etorem modasula monam pírtek íying angumko kado. Pírtek kídí delokke guyub takamdem kamporupe elínglok repyinla metupe kaado.

¹⁸De repnam kídíde gíídang demte bilgoobomdo. Luyuke gíídangde arangke gíídang dempemílo kemapyado.

¹⁹Arangke gíída delo aana, kedon gamna lamgé bedangko kado. Amide lamgé annyi delokke pénsamem kíto. De mitar íying pilngoko ido.

²⁰Depe irodem amide luyu gíídang danpe lenkuna línggíngdanke lamgé bedang kídídem kígooto.

²¹Gídung-gítok suko ampeng eelenlo duuna kaabomnake dungko pírtek angum teere delang buluke pénsam lokke suppi kídíde, delokke Kumkeng Ekum aatakke pírtekde, sanggodanke lamgé kídíke akampe botte amée akamsuyindo. Lamgé bedangde mitar íying annyi kolang pilngoko bodonge ido, delokke abe eelenke pénsamde mitar íying kolang annyi kolang arotko ido.

²²Aatakke pírtekde, kirki kídíde, delokke gatlíknam kéjur esing noksang kídíde sanggodanke lamgé kísa akamdo. Delo bangkor kínídko lamgélope kado. Aatak pírtekke méélam suppide luyu gíídangdem duuríksudo.

²³Sanggodanpe bedang gínapakpe, luyu gíídang lokke ila línggíngdan lamgé delok gíla aradanke gíídang loope bedangko kado. Amide bedang annyi delokke pénsamem kíto, de idumsula mitar íying pilngoko ido.

²⁴Dekepe kírodem amide ngome sokkodanpe gíboto. Delo bedang konko kaapatoku. Bí arangke líísak suppi kídí demlang Kumkeng Ekum aatak pírtekdem kígooto. Deke dete abíd kísa akam suyindo.

²⁵Abíd kísa bedang sokke pírtek kídídete kirki kayindo. Bedang delokke bodonge mitar íying pilngoko ido, delokke bíkke ape eelen pénsame mitar íying kolang annyi kolang arotko ido.

²⁶Delo bangkor kíníd kope kalíkdo. Bedang delokke aatak pírtek dekom luyuke gíídangem gekaasula gíídang delokke duurípaklo kado. Delokke arangke suppi kídí delote kéjur esing noksape gatyin líktung. Dekede bedangdanpe gekaasuyindo.

²⁷Sokom arang gíídang loope gína bedange kado. Lamgé annyi sokke pénsamem amide kíkíto. De mitar íying pilngoko ido.

²⁸Depe irodem amide ngome sokko lamgélok tokbola Kumkeng Ekum arangke gíídang delo gíboto. Bí lamgédem kíto. De luyuke líísak suppi akampe kedonelang apee ido.

²⁹Sokko delo duuna kaabomna kídí buluke dungko pírtek kídí, pírtek kídíke lamgé kídí, arangke suppi kídí, deke delokke amé-botte kídí dete abíd lamgé kídar kísa akamdo.

³⁰Lamgé kídí delokke pírtek kídí dete kirki kayindo. Deke delokke takamem handumsula bodonge mitar íying annyi kolang pilngoko ido. Abe eelende mitar íying kolang annyi kolang arotko ido.

³¹Deke delokke aatak pírtek kídíke kerange gíídangem gerík suyindo. Bedang delok iyonla pírtek kídí delokke suppi kídí demte kéjur esing noksalok gatyin líktung. So lamgé soope bangkor píínyiko kado.

³²Dekepe irodem amide ngome sanggo lamgé kíng gíbola, arang gíídang delo gíboto. Bí lamgédeme kíto. Lamgéde abíd lamgé kísa apeelang kedone ido.

³³Delokke kaabomna kídíke pírtek kídí, aatak pírtek kídí lokke arang suppi kídí tabude abíd lamgé kídíke kísa akamdo. Delo kirki mílípe iyondo, de aatak pírtek lote kado. Deke delokke takamem handumsula mitar íying annyi kolang pilngoko ido, delokke ape eelenlok pénsame mitar íying kolang annyi kolang arotko ido.

³⁴Delokke aatak pírtekde luyu gíídangdem geríksudo. Bedang delokke abe-are suppi kídí delo kéjur esing noksangem gatyin líktung. So lamgé soope bangkor píínyiko kado.

³⁵Depe irodelo amide ngome línggíng lamgépe saaboto. Bí deme kíto, delo deteng abíd kídí delokke kísa akamdo.

³⁶Abíd lamgé kídí kísape site kaabomna dungko pírtek kídíe, morí-mojok líknam arang suppi kala, aatak pírtek kala, delokke takamlo kirkie kayinla ido. Deke delokke apíípe bodonge mitar íying annyi kolang pilngoko, delokke abe eelen pénsame mitar íying kolang annyi kolang arotko ido.

³⁷Aatak pírtekde luyu gíídang deme geríksudo. Bedang delokke abe-are suppi kídar delo kéjur esing noksangem gatyin líktung, delokke lamgé loope bangkor píínyiko kado.

³⁸Luyu gíídangke línggíngdan arang lamgé delo perí aménako kado. De gíídangdem geríksuna aatak pírtekdanpe ayado. Delo romnam aman ipakpe ilíkpenam taro simang kídíem arbín ipompe ido.

³⁹Aatak pírtek so pírtek lokke abe eelenlo annyi eelenpe mela tébul appiko mepa. So tébul kídar so romnam aman ipak legapelang, paab ipaksu legape demangkom ajéng dorgangku ipak legape ipenam taro kídíem pakako ipompe ido.

⁴⁰Pírtek delokke luyudan delokke línggíng lamgé abe eelen delo, tébul annyipe leela tébul appiko kado.

⁴¹Depeila pírtek delokke aralo tébul appiko delokke pírtek lokke luyudan gíídang delo tébul appiko ila taro kídíem ipak ilíkpe mokako tébule píínyiko kado.

⁴²Perí, delokke romnam amanem irungko tébul appide kampope líítamlok gatlennam elíng siipangeke. Deke delokke kedone íying pilngo séntimitarko, delokke teyong atag kídíde kéényung appi kala íying kíníd kolang pilngo séntimitarko ido. Ipak igape taro mokanana ekuserang kídí takamem tébul kídí teyo delo leeyinpa.

⁴³Tébul kídíke kéényung appi eelenlo íying kíníd kolang pilngo milimitarko atagpe gedope pítemnameke kado. Tébul kídí delo ipakpe ilíkpenam adín kídíem leedo.

⁴⁴Depe irodem amide ngome arangke gíídang delo aaboto. Delo gíídang danpe duuna pírtek annyiko kado. Akonde línggíng lamgé abedelo, kerange sokkodanpe, delokke akonde sokko lamgé abe delo, kerange línggíngdanpe ila ido.

⁴⁵Amide ngom podo, “Sokkodanpe gekaasuna, pírteksi Kumkeng Ekumem kaabomna miri kídíke,

⁴⁶delokke línggíngdan em gekaasuna pírteksi, ipak ilíkko runggu kídíem kaasi-kaamona miri kídíke. Bulu Jadokke oo kídíe. Si Lebi ami kídí petomsi RUUTUM me kumla-joola, agér ibila ilane, delokke idope ruulíkname.”

⁴⁷Delo amide arangke gíída deme kígooto. De neying aloosula mitar íying pilngoko bodong-apee akampakpe ido.

⁴⁸Depe irodem amide ngome Kumkeng Ekum aralo aana pírtek delo aaboto. Aatak bedangdem bí kíto. De eeríe mitar annyi kolang arotko, delokke apee mitar kínídko ila, deke delokke abe eelenlo suppie mitar atel kolang arotpe biisame ido.

⁴⁹Aatak pírtek delo gíkeng bangkor kídídem idumsula kíname, mitar íyingko atage, delokke eeríe mitar akéko ido. Delokrongem aatakke abe eelene bottena gaang annyiko kado.