Read Alladian EJEKIEL 41 Bible Online

EJEKIEL 41 - Alladian bible

EJEKIEL 41

¹Depe irodem amide ngome Deena Moolopke luyudanke pírtek delo aaboto. Delo bí aatakdem kíto. De eeríe mitar angumko,

²delokke bortage mitar pilngoko, delokke suppi kídíe mitar annyi kolang arotkope biisame ila abe eelenlo ido. Pírtekdemte bí kíto. De bodonge mitar íying annyiko, delokke apee mitar íyingko ido.

³Delo amide arayalum pírtekpe ina deena alop delo aato. Aatakdem kítoname de mitar atelko eeríe, delokke atage mitar angumko ila, suppi kídíe mitar angum kolang arotko biisame ila abe eelenlo ido.

⁴Delo amide deena alop pírtek demte kígooto. De bodong elang apee akampaksula mitar íyingko ido. De raadang pírtek kékon paklo kado. Delo “Simoko Deeyayalumna Alobe,” emla amide ngom popado.

⁵Depe irodem amide Kumkeng Ekum delokke arang suppi kídíke biisamem kítoname dekede mitar angumkope ido. Delo Kumkeng Ekum dem gargoodope, líísak suppi kídí delo modasula mitar annyipe apena pírtek eke kado.

⁶De pírtek kídíde míílong míílonglo motem líknam míílong angumnako kado. Dekena míílong miyoodelo pírtek íying angum asak kado. Rumkíngyalum modasukeng dem pemílo abíd míílong modasukeng kídíde bésoryado. Dekepe ikolok pírtek kídí lokke tebege líísak suppilo geda suyinla anguyang gaang míímato.

⁷Dekepeila Kumkeng Ekum delokke suppi kídíem luyudanlok kaayém biisame akam suyinpe kaado, delokke dekepe rumkíng lokke teyong telope akampe kayindo. Pírtek kídí delokke luyudan kídí delo gídung-gítok suladope, ebangeke Kumkeng Ekum lokke suppi kídílo modasula motung. Depe ikolok rumkíng lokke ila raadalo, delokke teyong telokai gídung-gítok suladope kado.

⁸Pírtek kídí delokke luyudan suppi kídíde mitar annyi kolang arotko biisame ido.

⁹Kumkeng Ekumke línggíngdanke pírtek kídí delo gípe eyab atelko kado. Dekepakpe sokkodanke deteng eyab atelko kado.

¹⁰Deke delok teyolo teng Kumkeng Ekumdem gargoo bomla, mitar annyi kolang arotko atag yiibena míílongpe inako kaato. De among lokke mitar angumko kedondo. De Kumkeng Ekum lokke suppilo moda sulíknam pírtek kídíke duuda sukueme neyisudo.

¹¹Yiibena míílong kídíkelang miri kídíke ekum kídíke pénsam delo Kumkeng Ekum lokke abe eelenlo mitar íying atagna moolopko Kumkeng Ekumdem gargoobomdo.

¹²Kumkeng Ekum delokke anggodan lokke atagna moolop lokke kékon delo, mitar íying appi kolang pilngope bodonge, delokke mitar íying angum kolang pilngope atage ina ekumko kado. Ekum delokke suppi biisame kéényung lokke ila kéényung konloope mitar annyi kolang arotpe ido.

¹³Depe irongem amide Kumkeng Ekum delokke luyudem kígooto. De mitar íying pilngoko bodonge ido. Delokke Kumkeng Ekum méélam delokke ila pénsam moolopdem kítaksula ekum delokke anggo kéényung loope, dekom mitar íying pilngoko ido.

¹⁴Kumkeng Ekum delokke keralok kíla, pénsam moolopdem kítaksula, arotkon loope, dete mitar íying pilngoko ido.

¹⁵Delokrodem amide Kumkeng Ekum delokke anggodan emla abe kídílo duuna kedonna pírtek guyub kídí takamem kíto. Deteng bodonge mitar íying pilngoko ido. Kumkeng Ekum arangke aatak pírtek, Deena Moolop, delokke Deeyayalumna Alop

¹⁶kídí takamdem amolok ila kirki loope siipanglok pítyin líktung. Kirki kídídem ikapladuai.

¹⁷Kumkeng Ekum delokke arang suppi kídíde, eyab duurí teyongpak loope morí-mojokla iyindo.

¹⁸Dekedem kéjur esing mimang pelang Sérubim mimanglok akon kékonlo akone dongkí-dooyan sudope ilík líkyintung. Dekede pírtek kídíem bilgong-telongla itupe ilíkpa. Sérubim miyongde mikmo annyipe iyindo.

¹⁹Mikmokonde kéjur esing mimangdanpe ila tani mikmope ido, delokke akon mikmode arotkonke esing mimangdanpe ila myomur simyo mikmope ila ido. Sikepe suppi tabude iyindo.

²⁰Among delok ila eyab lokke teyong duurí loope Sérubim, delokke kéjur esing mimangpe Deena Moolop pírtek demte iyinpa.

²¹Deena Moolop pírtek delokke gaang kídíde kéényung appikana gaangpe iyindo, delokke Deeyayalumna Alop pírtekdem duuríksuna gaang akampe ido. Deeyayalumna Alop pírtek kerang delo

²²esinglok pínam runggu kísanako kado. De mitar kolang arotko kedondo, delokke mitarko atage ido. Runggu delokke kéényung gaang kídíde rumkíng, abe takamde esinglok inam mílípe ido. Dem amide, “RUUTUM ke keralo doona tébule si,” emla pokando.

²³Deena Moolop pírtek delo angko bedang karíko delo eyabko kado. Dekepakpe Deeyayalumna Alop pírtek delote bedang angko karídelo eyabko kado.

²⁴De eyab kídíde raadanglok nííyadope eyabe annyi-annyipe kado.

²⁵Suppi kídílo kaanam kísa Deena Moolop delokke eyab delote Sérubim mimangelang kéjur esing mimange kayindo. Aatak pírtek delokke lamgé luyu delo siipanglok ikapdope iname kado.

²⁶Pírtek sokke abe eelenlo kirki kado, delokke suppi kídíem kéjur esing mimangpe kampope ilíkla iyin goopa.