Read Alladian EJEKIEL 42 Bible Online

EJEKIEL 42 - Alladian bible

EJEKIEL 42

¹Depe irodem amide ngome luyuke gíídangpe lenbotoku. Depe lenbo dolangkula Kumkeng Ekum delokke anggo kerangke ekum anín-gam delo, línggíng danlo duuna ekumpe gíboto.

²De ekumde mitar íying pilngoko bodonge, delokke apee mitar íying annyi kolang pilngoko ido.

³Ekum delokke arotkonde Kumkeng Ekumke abelo mitar íyingko bortakna pénsam doonadem geríksudo. Delokke arotkonde luyu gíídangdem pígoonamde geríksudo. Dem rumkíng teyongpe guyub angumko kadope pílíkpa.

⁴Ekum delokke línggíng dan delo apee mitar pilngoko, delokke bodonge mitar íying pilngoko ina bedangko kado. Bedang delokke eyabe línggíngdan deloi kasudo.

⁵Ekum delokke rumkíng delokke raadang pírtek kídídem pemílo teyong yalum delokke pírtek kídíde améyado.

⁶Gíídang delo gaang kana ekum kísamape ekum delokke pírtek kídíde atí gaang kamado.

⁷Mitar íying annyi kolang pilngope bodoona ekum delokke luyu suppi ole konde líísak mílípe ido, delokke abíd olekon delo pírtege kado. Teyong yalum delo dan takam dem pírtek mílípe pípa.

⁹Ekum delokke sanggodan kereng yalum delokke pírtek kídí, delokke rumkíng delokke gíídang etor torlenko, delo gíídang danpe lenna lamgéko kado.

¹⁰Kumkeng Ekum delokke anggodan kerenglo duuna ekumem kaabí sunam ekumko Kumkeng Ekum delokke sokkodan delote kado.

¹¹Línggíngdan delok kísa ekum delokke pírtek kídí kerang delote bedangko kado. Deke dete abíd ekum kídí kísapakpe ape-bodonge, amé-botte, lamgé kídíe, delokke akor-siyor tabunge akam yindo.

¹²Ekum delokke sokko danlok anggo kéényung lok suppi ilenkolo pírtek kídíke rumkílo eyabko kado.

¹³Delo amide ngome sipe podo, “Kumkeng Ekumke luyu gíídangem línggíng sokkope duusépna ekum kídí delokke pírtek kídíde miri kídíke dungko pírtek kídíe. Delo RUUTUM ke keralo dagaana miri kídíde deeyayalumna amanem doyé. Delo pírtek kídí delo, ali-ayé amanpe binam, paab aman pelang imem-harem edo dorkunam aman kídíem, dekena deenarung aman kídíem miri kídíe mekumyé. Kapeila de ekum kídíde deena ekume.

¹⁴Edí edílodí miri kídíe Kumkeng Ekum delokke deena pírtek kídílo, RUUTUM ke agérem gérgo yédí, delo bulu gérgoopala Kumkeng Ekum lokke luyu gíídang delo lenkumang adape deena ege-galuk genamem pítbínsula leepe aiyé. Ami kídíke bampom delo lenyékuem bulu angukon ege-galugem gela lenkupe aiyé.”

¹⁵Edílo amide Kumkeng Ekum lokke arang kídíem kíyin gootodí, delo bí ngome sanggodanke lamgé delok lenbo langkula, Kumkeng Ekum lokke dei-degong luyuem kígooboto.

¹⁶Bí kínana banggén delok sanggodanem kíto. De mitar língko annyi kolang íying pilngoko ido.

¹⁷Delokrongem bí línggíng danem kíto, dete mitar língko annyi kolang íying pilngoko ido.

¹⁸Delo bí sokkodanem kíto, dete mitar língko annyi kolang íying pilngoko ido.

¹⁹Delok rongem bí anggodanem kíto. Anggodan dete abíd kísa bodonge akam pakdo.

²⁰Dekepeila líísak suppi kéényung appipe dunggoona abe eelen kídí dete mitar língko annyi kolang íying pilngope iyindo. Suppi kídíde deena keela deemanake pénsampe dungké bomdo.