Read Alladian EJEKIEL 43 Bible Online

EJEKIEL 43 - Alladian bible

EJEKIEL 43

¹Delo amide ngome sanggodanpe ina lamgé delo aaboto.

²Delo Israelke Shédíke angun abéem sanggo danlok aadupe ngo kaato. Shédíke adudde puumu gína muudud kísa ido, delokke among dete bíkke angunlok lip-lop em ido.

³Si kaarí-kaanyo kaanam si ngokke Kebar korong lolang Jirusalemem nyokmodope Shédíke aado delokke kaarí-kaanyo kaanam kísapakdo. Dem kaala ngo mikmoe amonglo ila gubang geto.

⁴RUUTUM ke angun-abéde sanggo lamgé delok aala Kumkeng Ekum arape angkai.

⁵Delo RUUTUM ke Aide ngome borepla Kumkeng Ekum delokke arang gíídang delo aaboto. Depe ido delo RUUTUM ke angun-abée Kumkeng Ekumem bííyin bomkai.

⁶Delo amide ngokke anín delo dagaato. Depe iduem Kumkeng Ekum arang delok RUUTUM bí ngome lupodope ngo tatto:

⁷“Tanike ue, simoko ngokke paleng dungkue, delokke ngokke ale tukenge. So ngo duudola Israel kídílo lekope, ngo agínpe duuyar bosuyé. Supak lokke ila Israel kídíe lang buluke roja kídíe uyu kumsula, mimang pígoola, kumko moolop igoola, ngokke deena amínem deema mola iyimayé.

⁸Roja kídíe ngokke Kumkeng Ekum lokke eyab-lamgé, gaang kídí abe paklo buluke eyab-lamgé, gaang kídíem molíkla ngokke lang buluke pénsamlo suppi petomko dungkédupe bulu ito. Depe igeyéla buluke belumrunam agér anamlok ngokke amínem deemang moto. Depeila yétonam longelo ngokke marlínglok bulume ngo nyokyin moto.

⁹Supak lokke ila bulu uyulo abír-ayo ibosunam emlang buluke roja kídíke simang kídíem bulu mepaksupe aiyé, delo ngo buluke aralo agínpe duuyé.”

¹⁰RUUTUM bí podan tetela, “Tanike ue, Israel kídíe buluke paabem annying sudope Kumkeng Ekum sokke legí-sigangem bulume pobi langka.

¹¹Delo buluke inam-hanam kídíem annying suyémílo, delo no bulume Kumkeng Ekum sokke ekum ségu kídíem, lamgé kídíem, gílen-gíangko kídíem, bodong andeng, ape-ajam takam emlang sike sokke idong iyon kídí, delokke Kumkeng Ekum sokke regoem pokan bilangka. Bulu agí amiglok Kumkeng Ekum sokke akor-siyor ségu kídí emlang ayon kídíem kaayinsula mínggapgela yédope, sim takam aipe atlangka, delokke deme atkumla megap langka.

¹²Kumkeng Ekum sokke ayone sipe idung: Dííte sokke ampeng-amleng among kídar si deena amonge. Sikepe Kumkeng Ekumke ayone idung,” emto.

¹³Kumkeng Ekumlo kape kísapak pedí kíla-ruula itodí, deke pakpe runggu demte kíla-ruula ito. Runggu delokke ekong delo atage séntimitar íying pilngoko eeríe delokke séntimitar íying annyi kolang pilngope kedone ina abe kana kogong aménako kado.

¹⁴Runggu delokke rumkíng yalum ekongde mitar atelko kedone ido. Delokke kékon rumsam konde kéényung lok ila séntimitar íying pilngoko atage bilgosudo, delokke de mitar annyiko kedondo. Delokke teyongyang rumsam kondete kéényung lok ila séntimitar íying pilngoko atage ila runggudem bilgo sudope mopa.

¹⁵So ipak inam simon-sili kídíem romdo. Site kedone mitar annyiko ido. Kéényung appi delokke areng kísa patkoosana kídíde, abíd kedonna abe empemílo kedon yado.

¹⁶Runggu delokke dumpode mitar akképe abe takame iyindo.

¹⁷Raadangke dekom mitar kínídpe abe takame ila, abe luyu-luyulo séntimitar íying annyi kolang pilngope kedonna abeko kado. Kogong aména dedan séntimitar íying pilngoko bortage ido. Runggu delo reesanana bangkor ebangde sanggo danlo kado.

¹⁸Ruutum Shédí bí ngome sipe poto, “Tanike ue, edílo sime pídélíkyédí, delo runggu so romnam amanlok romlíkla, delokke iyyi kuujéla ipenam idong kídíe sikepe iyé.

¹⁹Jadok kíng lenna Lebi opín lokke miri kídí petomde ngokkíng aala ngome agér ibilado, sipe Ruutum Shédíbí lulígdung. No bulume paab legape ipaknam amanpe rubo yaaméko bilangka.

²⁰No ipaknam rubo delokke iyyiem laala runggu delokke kéényung teyong delo areng kísa tuubu ilennam kídí delo iyyi ayoko purlík goola, rumsam raadangke kéényung kídí lote ilíkla, delokke rego mipílo purgolíkla ilangka. Sikepe no ila runggu dem deemola pídélíkla iyé.

²¹No paab legape ipaknam rubodem laala, deme Kumkeng Ekum lokke rompak peko luyulo romlangka.

²²Longekon delo tarí-tape atí kamana bénboko laala, paab legape ipak líktoka. Delo runggudem, delokke iyyilok deebín geyéla rubodem inam kísa bénbo simang demte ilangka.

²³Nokke dekepe iyin rongem, atí tarí-tape kamana rubo yaamé kolang mérbo yaaméko laala,

²⁴ngok keralo bomalangka. Buluke teyolo miri kídíe alo kuulíkla, ngokkíng ipakpe romlíkyé.

²⁵Paab legape longe kíníd kokai, bénboko, ruboko, delokke mérboko loodípe ngok keralo ipak ilangka. De takamde tarí-tape atí kape aimang.

²⁶Dekepe longe kíníd kokai miri kídíe ipak ilíkla, runggu deme deebínla, delo agér ina ladope ipe aido.

²⁷Dekepe irong lokke longe píínyina longe delokke, miri kídíe runggu delo romnam amanem romlíkla ami kídí legape aapí eetet aman kídíem romlíkla ilen langka. Depe imílo ngo nolum takam ashéng bomyé, delokke toríksuyé. Sikepe Ruutum Shédí ngo polendung.”