Read Alladian EJEKIEL 44 Bible Online

EJEKIEL 44 - Alladian bible

EJEKIEL 44

¹Depe irodem amide ngome Kumkeng Ekum luyuke, sanggo danlo duuna lamgé danpe lenboto. Lamgéde sittumdo.

²RUUTUM bí ngome podo: “RUUTUM Israelke Shédí ngo sok lamgé sok aanam legape, sim lamgé sim sittum ayaryé. Sim edílokom siyya mayé, delokke séko memkom soge aamomayé.

³Roja oo petomde ngokke keralo deena donamem dodope lamgé anín delo gíla dolado. Bí Kumkeng Ekum arang aatak pírtekke eyab delok gílen-gíape aiyé.”

⁴Delokrodem amide ngome Kumkeng Ekum delokke keradelo, línggíng lamgé delok aaboto. Delo RUUTUM ke angun-abée Kumkeng Ekum deme bííbom dupe ngo kaala, mikmoe amope ila gubato.

⁵RUUTUM bí ngome lupodo: “Tanike ue, nokke kaala-tatla inam takam sim aipakpe mínggap gelangka. Ngo Kumkeng Ekum sokke ayon kídíem, idong kídíem lukan biyé. Ingkona amiemdí Kumkeng Ekum so aalamoyéne delokke ingkona amiemdí aalamomayéne, dekeme aipakpe mínggap gelangka.

⁶“Ruutum Shédí bí sipe ludung, emla mirolpe rolna Israel ami kídíem polangka: ‘E Israel kídí, noluke belum-bekampe agér itínam kídíde ngatbongkai.

⁷Dekena noluke deemang-amo agér iko teyong loteng, nolu aapí lolang amíllo pídésumana mibo amiem Kumkeng Ekum so aabola, ngokke daapong ayon idongpe imape, ngome donam-tíínam, una adín emlang iyyiem bomala amanpe bidung.

⁸Ngokke deena ekurang teyong so ipenam idongpe imape, ngokke Kumkeng Ekum agérem abíd amiem imodope bidung.

⁹Depeila Ruutum Shédí ngo sipe ludung: Amíl-amoelang aapíeme pídésumana mibo amide ngokke duupom so aape aimang, delokke Israel aralo duumín gena mibo kídí dete aape aimang.’ ”

¹⁰“RUUTUM ngo sipe podung: Israelke ami kídílo lekope, ngom mepakpala uyulo kumsu goola ina Lebi ami kídíe buluke paab legape ankang supe aiyé.

¹¹Bulu Kumkeng Ekum delo ngome agér ibila, lamgé, eyab, delokke Kumkeng Ekum delokke ato-siro agér takamlo ilado. Bulu ami kídíke bomanam romnam aman delokke simon-siliem ipakla ami kídíke legape dormo iyon agérem ibilado.

¹²Idola Israel kídíem uyu kumsunam agérlo ibola paab imonam legape Ruutum Shédí ngo, bulu ankang sukupe aido, emla alage leedu sula podung.

¹³Bulu ngok anínlo aala miri agér imayé, ngokke deena ekurang anínlo aamayé, delokke Deeyayalumna Moolop delo aalamayé. Buluke belumrunam agér itonam legape buluke agér itíílo, bulu sikepe annyingem pangkupe aiyé.

¹⁴Idola ngo bulume Kumkeng Ekum delokke amé-aséna agér kídí takamem imodope tolíkdung.”

¹⁵Ruutum Shédí bí sipe podung: “Séko buludí Jadokke otíng oyinpe ila, Lebi kelok oyon sukuname dekede, edílo abíd Israel kídíe ngokke lok gínyok lentokudí, buludan ngok keralo arope yéla agér ibito. De ami kídar demin miri arope iyéne. Bulumin ngokke keralo aala, aman bomala, adín, una, iyyi atí-siríem ipak ila ilayéne.

¹⁶Bulu petom min ngokke Kumkeng Ekum aralo aala, runggulo ipak agérem ila Kumkeng Ekumlo kumsunam agér takamem ibolayéne.

¹⁷Edílo bulu Kumkeng Ekum arangke gíída lamgé delo aayédí, bulu paajok ege em gepe aiyé. Edí-edílodí bulu Kumkeng Ekum lolang arangke gíídang delo dormo agér iyédí, delo bulu uul lok sumnam ege-galugem gepe aimang.

¹⁸Bulu ílnam saamadope dumpolo lainen ege dumelem gela, amíl aralote lainen egem gepe aido. Idola uug gemayé.

¹⁹Ami kídíke bamko, luyuke gíídang delo lenkumang adape bulu, buluke dormo ayon ege kídí dem bítsukupe aido, delokke dekedem deena pírteklo mepe aido. Depeipala bulu angukon ege-galugem pítlík suge yéla amiem kaarík sulangka, demamílo deena ege kídarde ami kídíem aimang pekom imopelo.

²⁰“Miri kídarde buluke dumpongem ngíkut sumapeka, delokke dumídem bodong rupeteng imomapeka. Andeng-bodongem kaabomdola gattung sulangka.

²¹Kumkeng Ekum lokke arang gíída delo aamang adape miri kídí aralo sékokom apong tíímapeka.

²²Miri kídí aralo sékokom mepaknam mimeme laasi mapeka. Bí Israel ke mimum kooko mimepe laalangka, demangkom miri konke sinyonam mime meyéngem laalado.

²³“Ngokke ami kídíem miri kídarde deena ato emlang deemana atoem popan subipe aido, delokke dormo ayonlok deena ekurang emlang deemana ekurangem kangkén mope aido.

²⁴Buluke aralo piyyang kabo suyémílo miri kídíde ngokke ayonlok kebang baabipe aido. Miri kídarde ngokke ayon kídíem, idong kídíem kaabom kénbomdola dormo adeng-ape kídíem aipe bomgap bope aido, delokke Sabbath longeme deena longepe nyobope aido.

²⁵“Ami simang anínlo aala miride agíem deemang-amo ilíksupe aimang. Idola sina amide bíkke abu demangkom ane, demangkom bíro demangkom milo kamana bírmepe ina komílo, delo bí gílado.

²⁶Bíkke deerongkuem bí longe kíníd kope nyope aido.

²⁷Longe píínyinana longe delo edílo bí Kumkeng Ekum arangke gíída delo dormo agérem idokupe aayékudí, delo bí agíkesu legape paab ipakko ilangka. Sikepe Ruutum Shédí ngo podung.

²⁸“Ngo petommin miri kídíke yébomnam ekuserange, delokke asi-amonge. Miri kídídem Israel aranglo ekurang atí paamope aimang, kapeila ngo petom buluke ekurange.

²⁹Bulu ali-ayé amanem, paab amanem, imem-hamem amanem, delokke abíd-abíd ngokke legape aman binam kídídem laape aido, delokke dekede dope-tíípename, buluke ekurange.

³⁰Kerayalum len-gena gairuna ali-ayé, siipí-siiyé kídí delang Israel kídíke abíd-abíd gaina aman binam kídíde miri kídíke. Ami kídíke roti nííyéme kerayalumpe pamgenam ettíng dem mirilo amanpe bilangka, delo ngokke utepooroe ekum delo kayé.

³¹Emmumpe sisuna, demangkom situm-simyoe mokanam simon, demangkom pettang atíke adínem miri amie dope aimang.”