Read Alladian EJEKIEL 45 Bible Online

EJEKIEL 45 - Alladian bible

EJEKIEL 45

¹Israelke opín miyonge among orpan suyéme, among alopkon deme RUUTUM kepe tolíkla kumlík bipe aido. Among delokke bodonge kilomitar íying kolang annyi kolang arotko, delokke apee kilomitar íyingko[7] ipe aido. De apíírupe deena amongpe iyé.

²So among araso rego mipíe neying aloosula ape-adonge mitar língko annyi kolang íying pilngoko ipe aido. De Kumkeng Ekumke amongpe ipe aiyé. Deme among deme mitar íying annyi kolang pilngona atagna pénsam alopko bilgoola kape aido.

³Sokke alop konde kilomitar íying kolang annyi kolang arotko bodonge, delokke apee kilomitar pilngonako rungu sulenkupe aiyé. Delo moko takam empemílo deeya yalumna Kumkeng Ekumde kayéne.

⁴De RUUTUM ke Kumkeng Ekumlo agér ina miri kídí amongpe ila, Israel among aralokke deena mooloppe iyé. Delo olekon dem Kumkeng Ekume duubomyé, delokke kékondem miri kídíke ekum kídíe duubomyé.

⁵Among delokke ole kondem Kumkeng Ekumlo agér ina Lebi kídíe duubomyé. Deke delo bulu doolung luula duubomyé.

⁶Dekena deena moolop among kékon delote kilomitar íying kolang annyi kolang arotnako bodonge, delokke kilomitar annyi kolang arotpe apee ina among alopko kíngu sukupe aiyé. De Israel lokke daapong among kope iyé.

⁷Amongem ruutum bomna roja ome-oo kídí legangpete among moolopko kíngusupe aiyé. De deena moolop anggodan lok ilenla Among Raadang Siyéng asi robeng loope karípe aiyé. Sanggodan rísude Israelke sanggo among rísu loope karípe aiyé. Depe imílo Israelke abíd opín kídíke among pantonam kísa, among lokke botte-amée bulu kekom akamyé.

⁸Si among si Israel amongem yébonake adusupe iyé. Depe imílo bulu ami kídíem itung-iré peko bedang kamayé, delokke abíd Israel opín kídíem dengompe amongem orpan bosula duula moyé.

⁹Ruutum Shédí bí sipe podung, “Israelem yébona ami kídar nolu ngatboope paab ikai. Noluke atímape pamín-níkmínsunam agér, delokke amiem itung-irénam agér kídíem iyimapeka. Deke delok ayanpe ailokla jonna bedalok ibola amiem gíbolangka. Ruutum Shédí ngo, ngok ami kídíem dugnyok- poksok moimadope nolum ludung.

¹⁰Mipil-miyoope dormo ayonlo ato-siroem pallalo deenampe, jonnampe kíla kobo-rebo sulangka.

¹¹“Ereena atoem kape kísa Ephah[8] lok kíla bidudí, deke pakpe asi-alangpe ina atoemte Bath lok kílangka. Homer atelke adu íying ephah delang Homer atelke adu íying Bath de akam pakpe aido.

¹²“Noluke kínana tebegde sike pakpe ipe aido. Shekel [9] atello íying annyi Gerah e kape aido. Shekel íying akkéde Mina atelko ipe aido.

¹³“Supakke kíbipenam soge noluke aman kídíem bomlangka: “Gehuem: Ali paanam lokke adu íying akkélo atelko Anyadem: Ali paanam lokke adu íying akkélo atelko Olib télem: Nokke esing ane kídílok paanam lokke adu língkolo atelko. (Sime Bath loge kílangka: adu íying Bath e Homer atele, delokke Homer atele Kor atelem kídí sudung.) Mérem: Israel lokke gairuna neyang kako lokke língko annyi mér aralok atelko. “Nolu ali-ayé aman kídíem, apíípe romlík penam taro kídíem, delokke aapí eetet amanpe ilíkpenam taro kídíem, noluke paab kídíem mesam bidope bomape aiyé emla Ruutum Shédí ngo lulígdung.

¹⁶“Roja ome-oo kídíke legape Israel ami takame, among so duuna tabude, sikena aman kídíem bomdum sula ipe aido.

¹⁷Israel kídíke gíídí-siipe tabulo, Sabbath kídílo, Aní Poolo moodílo tíínam aman legape, ali-ayé aman legape, romnam aman legape roja delang ome-oo kídíde ato-siro tabungem kaalík-tallíkla ibipe aido. Dekede rojake idonge.”

¹⁸Ruutum Shédí bí sipe podung: “Poolo lokke kerayalum longe delo nolu atí tarí-tape kamana ruboko ipakpe ilíkla Kumkeng Ekum dem deebín langka.

¹⁹Paab aman legape ipak líknam delokke iyyiem laala Kumkeng Ekumke gaang kídílo, runggu delokke patken lenna kéényung appi delolang arang gíídangke lamgé kídí delo tídgo líkpe aido.

²⁰Sikepakpe poolo delokke longe kínídnana longe delote atí kénmape, demangkom iperung emla mííla imape, imem kootírpe paab imemsuna kídí legape ipe aiyé. Depe imílo nolu Kumkeng Ekum sim deedope meyé.

²¹“Kerayalum poolo lokke looying kolang loopinana longe delo Gíbong Gíídíem ibo sulangka. Longe kíníd kope, mipile siyé iyél sumanam ettíngem dope aido.

²²Adeng-apeke kerang yalum longe delo rojade agí paabsu legapelang ami kídíke legape paab ipakko ipe aido.

²³Longe kínídko ibomnam adeng apeke longe miyoodelo rubo kíníd kolang mér kínídko, atí tarí-tape kamanalok kaabom dola romnam aman ipakpe ilíkpe aido.

²⁴Ipak líknam rubo kelang bénbo kídí delo ephah atelko dada miyoolo delokke olib tél lok litar appi píítanako ephah miyoodelo ilen líkla ali-ayé amanpe rojade ilíkpe aido.

²⁵“Poolo kíníd lokke looying kolang longe pilngonalo ilen kunam Ippo Adeng-ape lote rojade longe kíníd kokai Gíbong Adeng-apelo itung pakpe paab legape ipagem ila, akam pakpe romnam amanem romla, delokke ali-ayé aman emlang olib tél emte ilangka.”