Read Alladian EJEKIEL 46 Bible Online

EJEKIEL 46 - Alladian bible

EJEKIEL 46

¹Ruutum Shédí bí sipe podung: “Hopta lokke longe akké agér idu delo Kumkeng Ekum arang gíídangke sanggo lamgédem sittum langka. Deme Sabbath longe lolang Aní Poolo gíídílo siyya langka.

²Miri kídí lokke romnam aman emla aapí eetet amanem ipakla idungem roja oode luyu gíídang lok aala, arangke aatak pírtek lamgéke gaang kídí delo dagyé. Delo lamgé delo bí kumsupala ingkolok aatodí, delok gílenkupe aido. Yume moodíe píímang adape lamgé dem sittumpe aimang.

³Sabbath longe miyong lolang Aní Poolo Gíídílo ami kídí takam ekom lamgé delo aala kumsupe aido RUUTUM me.

⁴“Sabbath longelo roja oode atí tarí-tape kamana mér bottenako lang mér oolok akkéko bomala, romnam aman ipakpe ipe aido.

⁵Bíkke RUUTUM me ipak idudelo, mér bottena delo ali-ayé amanpe ephahko itak sulíkla, delokke mér oo kídar delo edítko bí míísat sulayédí deddíko ali-ayé amanem itak sulíkla, delokke ephah miyoodelo olib télem hin atelko dada itemlíkpe aido.

⁶Aní Poolo Gíídí lote bí, ruboko, méro akkéko, delokke mérbo atelko ipak amanpe ipe aido, delokke deke takamde tarí-tape atí kamana tarope ipe aido.

⁷Rubo delolang mérbo delo ali-ayé amanem ephah kodada itaksula, delokke méro kídí delo edítko bí míísat suyédí, deddíko ali-ayé amanem itak sudola, ephah miyoodelo hin atelpe olib tél em bitem líkpe aiyé.

⁸Edílo roja oode aayédí, bí luyu gíídang delok aala arangke aatak pírtek lamgé delo gíríla ipe aido, delokke lenyéku emkom bíkke angkopak delok lenkupe aido.

⁹“Adeng-ape kídílo, edílo RUUTUM me kumsukape emla aayédí, delo séko buludí línggíng lamgélok aayéne, dekede kumsu rongem sokko lamgélok gílenkupe aido. Séko buludí sokko lamgé lok aayédí, bulu línggíng lamgélok gílenkupe aido. Sékote angko lamgélok gílen kumayé, delokke olekonke lamgélok gílen yéku.

¹⁰Ami kídíke aayéme roja oode aape aido, delokke buluke gíyékueme bíte gíkupe aido.

¹¹Adeng-ape kídí lolang doman-tíímandí moodílo ali-ayé amande ephah kolang ruboko, ephah kolang mérboko, delokke méro aména kídílo agí-agí míínampe amanem bitem líkla ephah miyoodelo olib téllok hinko dada bilík langka.

¹²“Edí-edílodí roja oode aapí eetet amanem, romnam amanem agí aapíe míísatsula ipak ipe mííyédí, delo sanggo danke lamgé dem bím siyya bipe aido. Delo bí Sabbath longelo bíkke inam kísa romnam amanem, demangkom aapí eetet aman ipagem iyé. Depe irongem bíkke gílat sulangkula gírongkuem lamgé dem sittumpe aido.”

¹³“Roh mipíem ila loodípe atí tarí-tape kamana dugríge píína méroko dada romnam amanpe RUUTUM kíng ipak líklangka.

¹⁴Sok kísa rodípe ephah lokke adu akké lokke ako ali-ayé amanpe, delokke atalo hoyél sudope hin atel olib tél lokke adu angum lokke ako dada ilíkla, sime agínpe duuyarna idong-iyon konpe igela RUUTUM kíng ipak líklangka.

¹⁵Roh mipíem agínpe romnam aman ipakpe iyar bomdope méro demlang ali-ayé aman, delokke olib tél aman ipak deme RUUTUM kíng iyar líklangka.”

¹⁶Ruutum Shédí bí sipe lulígdung: “Roja oode agíke oo kídar lokke akonem bíkke amongko panbi suyémílo, de roja oo delokke oten-síírek loope bomyar penam amongpe iyaryé.

¹⁷Idola roja oode bím agér ibina konlo amongko panlík yémílo, edílo ipítdíku dítage pííyékudí, delo de amongde roja oo lokke amongpe iyéku. Delo bíla bík oo kídíe among dem bomlat suyéku.

¹⁸RUUTUM bomna roja oode bíkke ami kídíke asi-amongem rotbínla ipe aimang. Bíkke agíke oo kídílo among panlíknam dete bíme panlík tonam among sulok panbipe aido. Depe imílo ngok ami kídíke amongem bí rotgoosula bulume iréémayé.”

¹⁹Delok rongem amide ngome arang gíídangke sokkodan lamgé anínlo, línggíng danpe gekangsuna pírtek kídíke aatak delo gíboto. Dekede miri kídar legape deena pírtek kídíe. Depe gíbodola pírtek kídíke anggodan péélélo duuna alop among konem sutkanla podo:

²⁰“Esi alop esi miri kídarke, imem aman, delokke paab amanpe ipaknam adín kídíem miri kídíke keepome. Delok teyolote atang kídíemte níípome. Deena ato-siroem luyu gíídalo bomlenla ami kídí teyolo atímana atoem iketmadope, elo takamem ettípe ila, adínem keenyu nyuyindung.”

²¹Depe irodem amide ngome luyu gíídanglo lenbo langkula, delokke kéényung appilo magooboto.

²²Delo kéényung appi delo mitar íying annyipe bodonge ila, delokke mitar íying kolang pilngope apee ila améngna gíídang reméeke ngo kaato.

²³Gíídang miyoodem elíng etorpe pígoola etor delo merome kadope pípa.

²⁴Delo amide, “Ami kídíke ipak aman binamem sikeso Kumkeng Ekumlo agér ina kídíe raala, keela ipome sikesi,” emla popado.