Read Alladian EJEKIEL 48 Bible Online

EJEKIEL 48 - Alladian bible

EJEKIEL 48

¹“Si opín atnam kídísi among tarongem paapene: Dan opínde moolopko paayé. De Hethlon doolung bedalok ila Lebo Hamath loope; Hajar Enan, delokke Damaskaske línggíng rísu delokke abe Hamath ke sanggodan lokke ila anggodan rísu karílope iyé.

²“Asher opínde moolopko paayé. De sanggodan lokke ila anggodanpe Dan amongem rísuyé.

³“Naphtali opínde moolopko paayé. De sanggodan lokke ila anggodanpe Asher em rísuyé.

⁴“Manasseh opínde moolopko paayé. De sanggodan lokke ila anggodanpe Naphtali em rísuyé.

⁵“Ephraim opínde moolopko paayé. De sanggodan lokke ila anggodanpe Manasseh em rísuyé.

⁶“Reuben opínde moolopko paayé. De sanggodan lokke ila anggodanpe Ephraim em rísuyé.

⁷“Judah opínde moolopko paayé. De sanggodan lokke ila anggodanpe Reuben em rísuyé.”

⁸“Sanggo anggope Judahme rísudola among apekko rungusupe aido. De kilomitar íying kolang annyi kolang arotkope línggíng lokke ila sokkolope, delokke sanggo lokke ila anggoloope, opín kídíem panlíknam akampe ipe aido. Deme dormo agérlo gerlíknape iyé. Among apek raadangpak delo ngokke Kumkeng Ekumde duuyé.

⁹“Among apek ara delote RUUTUM kepe, atekrupe bodonge kilomitar íying kolang annyi kolang arotko, delokke apee kilomitar íyingkope ina moolop konko kíngu sulen langkuka.

¹⁰So deena moolop araso miri kídíe dungkeng amongko paape aiyé. Buluke dungkeng moolopde sanggo lokke ila anggo loope kilomitar íying kolang annyi kolang arotko, delokke línggíng lokke ila sokko loope kilomitar pilngoko iyé. Sok among sokke raadang paklo Kumkeng Ekum ke among alopde kayé.

¹¹Si deena alop si Jadok kelok lenna oten miri kídíke dungkengpe iyé. Kapeila bulu ngom míngkesula ngom airupe agér ibila abíd Lebi opín ami kídíke imem yémem kolo bulu imín gela, yémín gela imato.

¹²Depeila Lebi kídarke kékonlo bulu deenarung mooloplo buluke dungkolem bulu paayé.

¹³Miri kídíke sokkodanlo Lebi kídar ekom dungkol moolopko paayé. Dete sanggo lokke anggodan lope kilomitar íying kolang annyi kolang arotko bodonge, delokke línggíng sokkope kilomitar pilngoko apee iyé.

¹⁴Deke delokke gaiyalumna among alopde RUUTUM me tolíknam mooloppe ipe aido. Dem moolop dem sékote kola mayé, líkpé sulamayé, demangkom akonlo biyon sulamayé. Kapeila de deena mooloppe iyé, delokke RUUTUM ke among atekpe iyé.

¹⁵“Among apek rungu sunam ara delokke kilomitar íying kolang annyi kolang arotko bodonge, delokke kilomitar annyi kolang arotko apeena mootekko ingu sulenkupe aiyé, idola de daadi takamke moopyangpe iyé. Ingko-ingkona amiete delo duula arík-anam ilado. Among delokke raadangpak delo doolungde duupe aido.

¹⁶Doolung delokke abe eelen kídíde kéényung appipe ila bodong andenge akampakpe neyi suyinpe aido. Delokke abe miyoode mitar jarnyi kolang língko annyi kolang íying pilngope ila neyisupe aido.

¹⁷Doolungdem bilgoona abe eelen pénsame mitar língko kolang íying annyi kolang pilngona atagna bedang kísana pénsamko kape aido.

¹⁸Doolungdem moyinpak rongem, deena moolop lokke sokkodanlo bodonge kilomitar pilngoko, delo apee kilomitar annyi kolang arotkope sanggo retaklo doona among apekdemlang bodonge kilomitar pilngo, delo apee kilomitar annyi kolang arotko anggo retakdan delo apekpe doona moolop annyidem, doolung delo duuna ami kídíe arík amongpe ina lado.

¹⁹Ingko-ingkona opín dokom doolung delo duuna amide among apek delo arík ilado.

²⁰“Depeila Israel among kídíke raadanglo angurupe mengusunam among delang doolung delokke among moolop deme itaksula among delokke abe miyonge kilomitar íying kolang annyi kolang arotkope iyinyé.

²¹Sanggolok ila anggo loope Kumkeng Ekum dungko among, miri kídíke among, Lebi kídíke among, delokke doolung kídí delokke amongde ruutum bomna roja oo delokke amongpe iyé. De deena among sanggo rísu lokke ilenla kilomitar íying kolang annyi kolang arotko sanggodanpe iyé, delokke deena among anggo rísulok ilenla kilomitar íying kolang annyi kolang arotko anggodanpe ilíkyé.

²²Dekepeila Lebi kídí kela doolung delokke amonge roja oo delokke among lokke raadang paklo kayé. Roja oo delokke amonge olekone Judah amongem rísupe iyé, delokke olekone Benjamin amongem rísupe iyé.

²³“Israelke abíd opínke sikepe iyé: Benjamin opínde among moolopko paayé. De sanggodan lokke ila anggodan loope kayé.

²⁴“Simeon opínde moolopko paayé. De sanggodan lokke ila anggodanpe Benjaminme rísuyé.

²⁵“Issakhar opínde moolopko paayé. De sanggodan lokke ila anggodanpe Simeonme rísuyé.

²⁶“Jebulun opínde moolopko paayé. De sanggodan lokke ila anggodanpe Issakhar me rísuyé.

²⁷“Gad opínde moolopko paayé. De sanggodan lokke ila anggodanpe Jebulunme rísuyé.

²⁸“Gadke sokko rísude Tamar lokke sokko anggope gílangala asi paatang kako Kadesh loope ipala, delokke anggo línggíngpe saalangkula, Ijipt lokke rísulo tuprík sulangkula, Among Raadang Siyéng loope ilíkyé.

²⁹“Sikepemino Israel opín takame agí-agíke among yéta moolop kayin sudope asi-amongem orpan bosupene,” emla Ruutum Shédí bí polendung.

³⁰“Sikesi Jirusalem doolung delo gídung-gítok supeko lamgée: 2,250 mitar bodoona línggíng danke líísak etor

³¹delo lamgé angumko kayé. Deke delokke amínem Reubenke lamgé, Judahke lamgé, delokke Lebike lamgé emla mínyé.

³²“2,250 mitar bodoona sanggodanke líísak etor delo lamgé angumko kayé. Deke delokke amínem Josephke lamgé, Benjaminke lamgé, delokke Danke lamgé emla mínyé.

³³“2,250 mitar bodoona sokkodanke líísak etor delo lamgé angumko kayé. Deke delokke amínem Simeonke lamgé, Issakharke lamgé, delokke Jebulunke lamgé emla mínyé.

³⁴“2,250 mitar bodoona anggodanke líísak etor delo lamgé angumko kayé. Deke delokke amínem Gadke lamgé, Asherke lamgé, delokke Naphtalike lamgé emla mínyé.

³⁵“Doolung delokke líísak etorlok abe appi delokke bodong, delokke apeeme kídumsula mitar éjar konangko iyé. “Delok moodí delokke ila doolung delokke amínem, RUUTUM-BÍ-SO- KADUNG, emla mínyé.”