Read Alladian EJEKIEL 5 Bible Online

EJEKIEL 5 - Alladian bible

EJEKIEL 5

¹Ruutum bí podan tetelang poto, “Tanike ua, ratnarung yoksako laala nokke nammíd emla dumíd takamem delok ngísulangka. Delok rongem bekkínanalo bekkíla, nok dumídem tarong angumkope ipan sulangka.

²Luune dem gargo bomname iyin rongem tarong akonem luune aradelo romlangka. Tarongkon dem luune luyu delo gígola, yoksalok pajér goolangka. Delokke tarong kondem, asarlo eljér líklangka. Dem ngo yoksaem bomla monmín geyé.

³Dumíd anyongko mesula deme nokke galap delo yéklangka.

⁴Delokrongem, delok anyongko laalen langkula, gudope emelo yoplík langka. Deloge eme Israel among takamlo goobyakyé.”

⁵Ruutum Shédí bí poto, “Jirusalemem kaatola, ngo bím tani among sokke abíd among kídíe dunggo bomdope, raadanglo melíkdung.

⁶Idola Jirusalem bí ngok lulígem ipéésula, abíd kídí lokke atímangem bojéyadung emla lengkansuto. Bím dunggo bomna among kídíem pemílo agom tatmayanamem lengkanto. Jirusalem bí ngok lulígem míípakla, ngok ayon kídarem bompemang ito.

⁷Supak Jirusalem no RUUTUM ngokke ponam sim tatgap langka. No ayonem igemala delokke lulígem tatmala, nom dunggobomna abíd among kídíem pemílo bojéyangko ebínem imotung. Kapeila no abíd among kídíke idongem imín gekai.

⁸Dekepe igape, ngo RUUTUM nom podung, ngo nokke mirue. Among takam kangkolo, ngo nokke teyolo kebang ila ajéng iyé.

⁹Ngokke belumnam agérem nokke inam legape, ngo Jirusalem teyolo kerape ikímanam, delokke dekepe iyipemanam ingéénamem ilíkyé.

¹⁰Dekepe ila, Jirusalemlo ane-abu kídíe agí ome-uem dosuyé, delokke ome-ue agí ane-abuem dosuyé. Ngo turla dungkína kídí emteng ingééla monpit-monyityé.

¹¹“Dekepe ikolok, ngok turnamlok ngo Ruutum Shédí, nokke atímana agér kídílok ngokke Kumkeng Ekumem deemang monam legape, ngo nokke teyonglo ayang kaimape, ngéngkur geyéku, emla pésudung.

¹²Noluke ami kídíke opéé angumlok akon opéée tíílíng-keno loklang kinam-ramnamlok luune araso siyé. Opéékonem luune luyulo yoksalok paka kayinyé, delokke méélam yalum opéédem rego takamlo ngo dukpan sumola, yoksalok bulum monbomyé.

¹³“Ngokke edoem rayin langkula, aange apííma tetelope, nolu ngokke reyubruuna marnamem kaapayé. Delo noluke agom tatbimang kolok RUUTUM bí yagorupe markai emla nolu kényé.

¹⁴Nolum dunggobomna kídare nolum kaala ngilkayé, delokke nyotyé.

¹⁵“Edílo ngo yagorupe nolum marbomla nolum ingééyéne, delo nolum dunggona among kídíe peso-rían geyé, bulu nolum kangilla lué-luléla iyé.

¹⁶Ngo noluke dope-tíípenamem píírammola nolum pínkamoyé. Nolu miru lokke aar kanarung epuge apnam kinam kísape dírí-kenoe nolum kimoyé.

¹⁷Monkíre lang dírí-kenoe noluke ome-uem simoyé. Ngo nolum, pesorunam kinamlok, momín-díímínlok delokke mimaklok ingééyé emla RUUTUM ngo podung.”