Read Alladian EJEKIEL 6 Bible Online

EJEKIEL 6 - Alladian bible

EJEKIEL 6

¹RUUTUM bí ngome poto,

²“Tanike ua, Israelke díítedanpe kaala, ngokke agom sim bulum pobilangka.

³Ngo ami kídíke mimang kídíem kumsuko among kídí delo yoksako bulum inyoknape melíkyé emla RUUTUM ngokke, díítumem, gíípongem, robung emlang yiibe kídíem ponam agom sim tatdope Israel ke dííte kídarem polangka.

⁴Runggu kídarem papén-payényé, delokke nampona romko runggu kídarem bénpakyé. Delo duuna ami takamdem mimang kídí keradelo payinyé.

⁵Israelke ami kídí delok simang kídíem ngo doojéng-dooyéng moyé. Buluke along kídídem ngo runggu kídar lok kerang delo doojéng moyé.

⁶Israel lok luune takam dem ngo nyokmola, buluke runggu kídíemlang mimang kídíem benmíkmoyé, delokke nampona romkeng runggudem ipakla, buluke pínam takamdem kaimadope iyé.

⁷Rego takam delo ami kídarem mokayé, delokke mopísuna kídíde ngome RUUTUME emla mínggeyé.

⁸Ngo ayoko petnamlok mopít sumola among kídí delok dukpan-dukran sumoyé,

⁹delo rusi sunyok goomoyé. Deke delo bulu ngom míípa sulangkula, buluke aapílok ngom tatbimape mepakla, mimang kídíem ulla ikolok, ngo bulum ingééla annying motung emla, bulu kénsuyé. Delo bulu agíke loorímana, delokke deemana agér inamem agíke teyolo marlí subomyé.

¹⁰Bulu ngom RUUTUM e emla, delokke ngokke lutornam kídíem emmumpe ponammang emlang kényé.”

¹¹Ruutum Shédí bí poto, “No alagem kítsula, alem amonglo tugo sulangka! Israelke iperumanam deemana agér inam legape adírla kaplangka. Bulu mimaklok, dírí-kenolok, delokke kinamlok siyé.

¹²Mootenglo duune kila siyé, anínke kídarem mimaklo petyé, duggela turna kídare kenolok siyé. Bulu ngokke marnam takamlok ralnamem kénpasuyé.

¹³Mimang kídí kelo lekope, delokke runggu ampeng amlenglo, gíípong-gíírong kídí delo, dííte ponyuk kídí delo, yayina esing sine rumkílolang ok sine rumkílo, buluke romnam ipagem buluke mimang kídílo ilíkko moolop miyoo delo, simange doojé-dooyéyé. Delo takame ngo mino RUUTUM bí emla kényinyé.

¹⁴Arope, ngok alage laklenla, buluke amongem inyokyé. Ngo Israel ami lok dungko moolop takamem atel koteng mesammape, sokkodan lokke yépol amolok ila, línggíngdanke Riblah luune lope among dem atí neyi-neyang garyimadope iyé. Delo takame ngo mino RUUTUM bí emla kényé.”