Read Alladian EJEKIEL 7 Bible Online

EJEKIEL 7 - Alladian bible

EJEKIEL 7

¹RUUTUM bí ngom lupoto.

²“Tanike ua, simoko, Deena RUUTUM ngokke Israel kídílo ponam agome: Simoko among takam sokke nyokname!

³“Israel kídía, yéyine píngkai. No ngokke marnamem kényé, kapeila nokke inam teyolo ngo nome íngkí-bengkídung. Nokke atímana ségu-siyang takam teyolo ngo edo rayéku.

⁴Ngo nome mesammayé, delokke atí ayang lengkanmayé. Ngo nokke atímana agér inam kídí legape ingéédola, no ngome RUUTUM e emla kéndope imoyé.”

⁵Sikepemin Ruutum Shédí bí podun, “Gérmangkon teyolo gérmange aatemyé.

⁶Simoko yéríe, nokke mirupe iríe píngkai.

⁷Amongso duuna ami noluke yéríe píídak. Dííte telokke kumpomlo, ashéng-angame kaimape, míílal sunam petome kadíe píídak.

⁸“Supak ngo menape nokke teyolo ngokke bulíng marlíngem melíkla, nokke ségu-siyang teyolo íngkí-bengkíyé, delokke nokke belum-bekam agér inam takam legape ingééyéku.

⁹Ngo nom mesammayé, delokke atí ayang lengkan mayé. No ngome RUUTUM e emla kéndope, delokke nom adír bina si ngo emla kéndope, nokke loorímana agér inam kídí legape nome ingééyé.

¹⁰“Israelke legape gérmang longe aadak. Momín-díímín pityang elang míngkíme yago alongkai.

¹¹Momín-díímín pityange atímangem bojémoyato. Buluke takam mirem ekurang, gai-gakongpe inam delokke angun abépe yénam takame atí kaimayé.

¹²Moodíe píídak. Ato rena kídíe ashéng mapeka, delokke koneteng ankí mapeka, kapeila Shédíke ingééname takamlo lekope olíkdí longe píídak.

¹³Ingkona pesi koret ineteng bíkke pitnamem paalat sudokupe ool turmayé, kapeila Shédíke marname takamlo kadung. Séko bulu deemane, de turlamayé.

¹⁴Bikule mutyé, delokke takame irusuyé. Idokom sékoteng mimaklo gílamayé, kapeila Shédíke marname takamlo olíkyé.”

¹⁵Bedang kídílo pamín-níkmíne, delokke ekum kídílok aralo kinam elang tíílíng-kenoe, sékodí luyulo yédune bí momín-díímínlok siyé, delokke sékodí doolung aralo duudune bí kinam loklang tíílíng-kenolok siyé.

¹⁶Pekíe yiibe kídílok pesola díítelo yobgenam kísape, ayokone díítelo dugsisuyé. Bulu takame buluke paab kídí legape siyinyé.

¹⁷Takamke alag kídíe ralnam kamayé, delokke lebíng kídíe danyé.

¹⁸Bulu ankí gasorem gela rego takamlo dan-goosuyé. Buluke dumídem ngíkutyé, delokke bulum takamem annyingmoyé.

¹⁹Bulu buluke uun delokke baldínem bedang kídílo deemana ato kísape yoppakyé, kapeila baldín elang uunde bulume RUUTUM ke marnamem bulukelo purlíkyém mopítlamayé, bulu dekedem buluke aapí-aanglok míínamem apíídope inalamayé, delokke akii kídíem kiidar sumo lamayé.

²⁰Kerape bulu, buluke kampona arekana ekurang teyolo míngkím sutuai, idola bulu deme loorímana kídíem pínato. Dekepe ikolok RUUTUM bí buluke mirem ekurangem bulume mííyi madope míímoto.

²¹RUUTUM bí podung, “Ngo bulume angu among lokke amiem doppyo moyé, delokke ayon betna kídíe, buluke takam mirem ekurangem laala deme deemang moyé.

²²Ngo ngokke are kanarung Kumkeng Ekum emteng doppyone bénang bomla, deemang mola iyémteng asoope kaarulíkyé.”

²³“Takam atíe míílal lalgoosunampe ila, among delo petna ami mílíe, delokke luune delo momín-díímín pityang mílíe iyé.

²⁴Ngo deemang yalumna opín kídíem so bomala, noluke ekum erangem bulume bommoyé. Noluke ralyayalumna amie, deemangna opín kídar sim noluke kumkeng moolop kídíem ngokke deemang modope iyém agí sulo míídíng suname kaimayé.

²⁵Adíre píídak. Nolu aapí-aang eetet em matayé, idola paamayé.

²⁶Gérmangkon teyolo gérmangkone aatemyé, delo toktína rojik kísa aimana kobore píítíyé. Nolu kaalu-kangorna kídíem ingkoko kaato sudun, emla pokan bidope roguyé. Miri kídíe ami kídíem atí poyilpenam kamayé, delokke abu-bíro kídíe atí ngiitom tompenam kamayé.

²⁷Rojae ankíyé, bík ue míínam suyimayé, delokke ami kídíe pesolok danyé. Ngo nolume noluke inam takam legape ingééyé, delokke noluke abíd kídíem kapekísa kebang ibomtodí, deke kísape ngo nolum kebang ibomyé. Sikepe inam si ngomino RUUTUM e emla nolume lengkanyé.”