Read Alladian EJEKIEL 8 Bible Online

EJEKIEL 8 - Alladian bible

EJEKIEL 8

¹Ngolum monnyokrong dítak akké lokke poolo akké delokke longonana longe delo, Judahke miro kídíelang ngo, ngok ekumlo duuduem, menang asakpe Shédíke ralname ngokkíng aalíkto.

²Ngo kaadusula peso-rían genam ami kísape inako, kaarí-kaanyope kaato. Ugíng lok ila rumkíngde eme kísape ido, delokke ugínglok teyodande asirruuna pitol kísape ido.

³Alag kísape kaanam kolok bí laklen dola, ngok dumídlok bí ngom gagto. Delo so kaarí-kaanyo so Shédíke Aide ngom asarlo bomonla Jirusalemlo gíboto. Bí ngom Kumkeng Ekum delokke línggíng danke lamgé delokke arayang angko delo aaboto. Delo Shédíme marmona mimangko kaado.

⁴Delo ngo Kebar korong ampelo ngokke kaanam kísa Israelke Shédíke duumín genamem lengkanna latnarung angundem kaato.

⁵Shédí bí ngom poto, “Tanike ue, línggíng danpe kaatola.” Ngo kaasasula, lamgé delokke angko ampeng delokke runggu delo Shédíke marlíbomnam mimangko kaato.

⁶Shédíbí ngome poto, “Tanike ue, inam kídí sim no kaadun? Ngome ngok deena moolop lok mooteng yayang mon-géla, so Israel ami kídíke annying runam inam kídí sim kaatola. No sim penem pakyape annying penam atoem kaayé.”

⁷Bí ngome luyuyangke angko delo gíbola suppi delo arungko lengkanto.

⁸Bí pokai, “Tanike ue, suppi sim sok bénto.” Ngo bénla delo eyabko paato.

⁹Bí ngom poto, “Gíala, buluke deemang agér ila, annying penam agér ibomnamem kaatola.”

¹⁰Dekepeila, ngo arang delo aala kaato. Suppi kídar delo tabí, delokke abíd deemangna taro noksange, delokke Israel ami kídí delok kumbomnam abíd ekurang kídíe pokap bomto.

¹¹Shapanke oo Jaajaniah me santaksula Israel lok ruutum kídíe íying kínídko delo kado. Miyonge nampona romnana atel asak alaglo bomdo, delok nampona míkkíe uusado.

¹²Shédí bí ngom íngkíto, “Tanike ue, Israel ruutum kídí lokke isup sunam sim no kaadon? Bulu takam mimang mílí ina pírtek kolo kumsudung. Kapeila bulu, ‘RUUTUM bí ngolum kaamang. Bí ngoluke among sim mepakkai,’ emla manbo sudung.”

¹³Delo RUUTUM bí ngome poto, “No bulume sim penem pakyape aimana agérem idope kaayé.”

¹⁴Dekepeila, bí ngome Kumkeng Ekum delokke línggíng lamgé delo gíbola, uyu Tammujke[2] sinam teyonglo mimeke kabbom-rííbomla ibomnamem lengkanto.

¹⁵Bí íngkíto, “Tanike ue, no esim kaadun? No sim penem pakyape atímanem kaapayé.”

¹⁶Dekep bí ngom Kumkeng Ekum delokke arangdan among moyako delo gíaboto. Delo Kumkeng Ekum delokke angko ampedelo runggu kelang aatak pénsam delo midum íying annyi kolang pilngokope milokonge kado. Bulu, buluke lamkuem Kumkeng Ekumdanpe ila, sanggodanpe gubadola, saana doonyiem kumsudo.

¹⁷RUUTUM bí ngome poto, “Tanike ue, esime kaadon? Judah lok ami kídar si nok kaanam sikena deemana agér inam simlang among takam so pityangem goobyaknam petom sim aange apíímang. Ma, bulu Kumkeng Ekum arang soteng dekedem ilíkla, ngome pakyape marmope aiyé. Buluke ngome yagorupe ingéénam sim kaatola!

¹⁸Bulu ngokke marnam lokke ralnam takamem anpaasuyé. Ngo bulum mesammayé, delokke ayang atí lengkanmayé. Bulu, buluke ugdug loorílok ngome kumyé, idola ngo bulume tatbimayé.”