Read Alladian DANIEL 1 Bible Online

DANIEL 1 - Alladian bible

DANIEL 1

¹Jehoiakimke tagumnape Jirusalem amongem roja dobom dungem, Babilonlok roja Nebukadnejjar bí mimak aabomla Jirusalemem gargoo bomto.

²RUUTUM bí roja Jehoiakim me ummoto, delokke bíkke Kumkeng Ekum lokke ekuserangem laadope bík alag aralo ruulíkto. Bí ami ayoko patek sobom langkula Babilonlo bíkke mimang kumsuko ekumlo bomatoku, delokke ekurang laanam kídíem uyu kumkeng delokke kumsung kídílo leetoku.

³Rojade bíkke ruutum yalum migom Ashpenaj me, monnyoknam Israel opín lokke roja erang loklang migom-mite erang kídí lok yaamé koo lok,

⁴amíl-amoe kampola, minyola, aipakpe kénna, míídu-míítok mííjina, delokke amíl tabunge kinam kamape inalok ullendope lulígto. Ashpenaj bí bulume Babilon agomem rinomla atnom bopenape ito.

⁵Rojake kebang ekumlo agér ina miyongke loodípe donam, tíínam delokke dokor-tíngkorpe rasonem bulume bilangka emla lulígto. Sikepe inom surong dítak angum méélamlo bulu rojake keralo lengkan sulangkula agér ibidokupe ito.

⁶Ullennam kídí aralo Daniel, Hananiah, Mishael, delokke Ajariah bulu kato, delokke bulu takam Judah opín lok ami kídíe.

⁷Ruutum yalum migomde bulum Belteshajar, Shadrak, Meshak, delo Abednego emla aní amínem mínlíkto.

⁸Daniel bí dormo ayonlok agíem deedope emla míílenla, roja lokke donam, delokke apong binamdem doma-tíímadope emla Ashpenajme bím iguldope emla roguto,

⁹delo Danielke agomem ayang tatpaadope Shédí bí Ashpenajme míídope ruulíkto.

¹⁰Idakkom Ashpenaj bí rojaem pesonam legape Danielme poto, “Rojabí nolu ingkuem dope-tíípene, dem mííyin tubong, delokke no abíd ami kísape amíle edíng mamílo, bí ngome petpakyépe.”

¹¹Dekepeila bímlang bíkke angong angumdem kaabom dope Ashpenajke melíknam ami delo Daniel bí gíto.

¹²Delo bí poto, “Aro-menam ikaanam legape looyingko oyinglok dodope, delokke asilok tíídope ngolum bilangka.

¹³Delok rongem ngoluke amíl emla, rojake kebang ekum lokke donampe dona kídíke amílem kaapeng sukípala, nokke lupenamem lulangka.”

¹⁴Bí looyingko buluke lunamdem ikí-kangkí dope toríksuto.

¹⁵Lubo sunam longede gíyin rongem, buluke amílde rojake binamlok dona-tíína kídíem pemílo ngelyala, delokke tolyangkai.

¹⁶Dekepeila kaabomna amide bulume rojake donam-tíínam binamem megeyéla oying kídílok dodope elíkbito.

¹⁷Shédí bí yaamé koo appidem kénnamem, delokke agom-aang kénjing kaajingnamem, delokke gyanem ruulíkto. Delok teyolo kaalu-kangor kídí emla immang maanam gomroem pomíklana kénnamem Daniel kíng ruulíkto.

¹⁸Rojake luru binam dítak angum de gíyin rongem, Ashpenaj bí yaamé takam dem Nebukadnejjar kíng aabotoku.

¹⁹Rojade takam dem lurík-porík suto, delokke abíd kídí dempemíl Daniel, Hananiah, Mishael, delokke Ajariah buluke agom poyi-posange bím mííbang moto. Delok legape bulu rojake kebang ekumlo agér gérnape ikai.

²⁰Rojade ingkona agomem íngkídokom, demangkom íngkona ebín namko lukan dokom, dem si appi si, bíkke roja among aradelo kénna miri, demangkom jadu montrong ina uyu miri ami kídíem pemílo lemying ngatna kope kényang geyato.

²¹Parsia lok roja Sairaske Babilon amongem mimak ila laado longe deloope, Daniel bí roja kebang ekum delo agér ila yéto.