Read Alladian DANIEL 11 Bible Online

DANIEL 11 - Alladian bible

DANIEL 11

¹“Media ami Darias ke roja dogedo kerang dítak delo ngo bíme igul-kanggul dope dagrepto.

²Delokke nome supak ngo aroem pobiyé.” Teyong kotoki de pokai, “Roja angum konko Parsia amongem ruutum bomyé. Bulume appinape rojako siirep mínyé, bí abíd takamem mirem yayé. Bíkke tolla, delokke miremla idukpak delo, bí Grik among yétaem rotpe emla mirolpe abíd emte ruulíkla iyé.

³“Delo miga-miram runa rojako lenyé. Bí botteruna among yétako ruutum bomyé, delokke bíkke ipe míínamem bí iyé.

⁴Idola bíkke dekepe raldukpak delo, bíkke among yétade apan-aran ila, moole appi kope ipan suyéku. Bíkke odong malok lenna roja kídíe asi among dem ruutum bomyéku, igeyéla bulu bíkke pauar katonam kísa kamayé.

⁵“Ijipt lokke rojade edííyé. Dekepe idolangkom bík maglíng ruutum akone bím pemílo ralyala bíkke among yétaem yébomyé.

⁶Bojéko dítage gírongem Ijipt lokke rojade Siria lokke rojem bonying ibosunamko ila, bík omeme bíkkíng nyamran ilík biyé. Idola de bonying ibosunamde duuyar mayé, delokke ome dem, bík milo dem, bík kooem, delokke bíkkíng gímín gena igulna béérang kídídem petyinyé.

⁷Delo méélam delo ome delok eranglok akone rojape menape iyéku. Bí Siria rojalok sipaying kídíem mimakpe aabomyé, delokke mimak yapgo kídíem aabomla, ikumyé.

⁸Bí buluke uyu kídíke mimang kídí emlang dekena mimang kídílo bilíknam uun, delokke baldínlok pínam atí kídíem Ijiptpe bomyéku. Dítak bojéko bí eetetpe Siria rojadem yémola yérongem,

⁹Siria lokke rojade Ijipt em mimak ikape maglíngpe aabomyé, idokom bíme duglat dokupe imoyé.

¹⁰“Sirialok roja oo kídíe mimak makpenamem iruula, maglíng bottenako laadum suyé. Buluke akone puumu gínam kísape miru lokke mimak yapgo konem aabomyé.

¹¹Ijipt lokke rojade dem marbomla, Siria lok rojaem mimak iyé, delokke ikumla bíkke maglíng bottena deme langkamyé.

¹²Bí bík mimaklo ikumla mití-maglíngem abílpe umla deddína sipaying kídíem mokayé. Depe irongem bí míngkímsuyé, idokom bí ikumyarnape iyarmayé.

¹³“Siria lok rojade gílat sulangkula kerangkem pemílo botteyana maglíngko laadum suyéku. Edílo idí moodíe pííyédí, bí mimak ijiina, delokke inanem aipakpe bomna maglíng bottenako bomla mimaklo enlat suyéku.

¹⁴Dekepe iyém deddína amie Ijipt rojaem mimak ikísuyé. Delokke Daniel nokke among lokke migu-miyakna ami ayoko, bulu nokke kaarí-kaanyolo kaanam kísape bíme mimak magyé, idokom bulume ikumyé.

¹⁵Dekepe ila Sirialok rojade, líísak etor kana bottena luune konem aabomla duujét bomyé. Ijiptlok sipaying kídíde mimak momínem ilamayé; delokke buluke aralok ralya yalumnekom mimak inana tolnam kayimayé.

¹⁶Mimak magaana Siria amide bíkke míínampe bulume iyé, delokke bím atí dakka sulana kamayé. Bí Pébisunam Among delo edíípe duulíkyé, delokke takamde bík ralnam aralo duuyé.

¹⁷“Siria lok rojade bík takam sipayingem bomla mimakko ipe mííruuyé. Delo bík miru lokke among yétaem nyokmope emla, bí Ijipt roja kíng bonying ibosunamko kala bík ome em, bíkkíng nyamran ilíkyé. Idola bík mííbomnamde apíímayé delokke bím igul mayé.

¹⁸Delok rongem bí siyéng asi robenglo duuna among kídíem mimak magla, bulu kelok deddínaem ikumla duubomyé. Idakkom mibo angulok yégebona sipaying ruutum kone bíme ikumyé, delokke bík botterupe míísunamem míímoyimayé. Aropakpe Siria roja delok atímangem bíkkíng aalat sumoyéku.

¹⁹Rojade agí among lok mimak yapgo aralo aalat suyéku, idakkom bíme ikumyé, delokke de ikum kunamde bíkke nyogge kunampe iyé.

²⁰“Bíkke yérongem roja konko siirepyé. De agíke maglíng ruutumko melíkla, bíkke among yéta lokke abale bojédope, kajanang ulgola ami kídíem idíryé. Idokom ol doomape dem roja dem petpakyé, idola ami kídí keralo marmín sulok demangkom mimaklo bím petmayé.”

²¹Teyong kotokide ludan teteto: “Roja ibaarumanako, bíkke méélamlo Siria lok roja ikupenade iyé. Bí atírumana ami kope iyé. Bí ami kídíke dengomrupe duudungem aala, yadnam ségulok roja ralnamem laayé.

²²Delo mití-maglíngem puumu punampe bík keralo pupakyé. Delo dekedelang Daapongke roja oode nyokyé.

²³Bíkke among yéta maglínge anyong dokom, bí abíd among ruutumem daapong ibosula yadnamlok ikumla, bík amonge botte yayang iyé.

²⁴Bí ekurang kanarung among konem atí lutat mape aabomla, bíkke abu, delokke buku kídíke ikímanam ségupe atí kídíem iyé. Delokrongem bí mimaklo ikumla paanam ekurang kídíem, bíkkíng yémínna ami kídílo bí orlík yinyé. Bí líísak etor yapgo kídíem aabompe mííru bomyé, idokom bík idí moodíe menape gíyinyé.

²⁵“Bí Ijipt rojake mirolpe, agí ralnam delokke pauar takamem idumsula maglíng botterunako iruu lenla mimak ikape leemo lenyé. Delokke Ijipt lokke rojadete ralnarung maglíngko irepla mimak imínsupe iyé, idola yatkup ségulok bím yatla bí ilamayé.

²⁶Bíkke mííbang yalumnam poyilna kídare bíme rukupyé. Bíkke sipayingem bojéko petbiyé, delokke bík maglíng kídíem nyokmoyé.

²⁷Delo roja annyide tébul atello dobosupe duuyé, idokom bínyike mííyi-míísange atímape mííbosuyé, dekepe ila bínyi akone akonem yatmín suyé. Bínyi ingkoko mííbom dudí deme paamayé, kapeila paadí moodíe píímang ada.

²⁸Sirialok rojade mimaklo rotnam atí kídíem miremrupe bomla ekumpe enyéku. Shédíke ami kídí lokke dormo yélamem bí yagorupe akyé. Bí deke teyodelo atímape agér ilíkpala delokke depe irongem bík agí amope gílat suyéku.

²⁹“Méélamlo lekoda bí moodíe pííla Ijiptem mimak aabom yéku, idola so irumso agér kídíe kerang kísa iyimape angukonpe iyé.

³⁰Rom ami kídíe asi jajilok aala, bím itumyé, delokke bím pesodope morítyé. “Delo bí yagorupe marla Shédíke ami kídílok yélamem benpak domílo emla ikíyé. Séko bulu dem yélam dem mepak todí, mepakna kídíke teyolo bí ayayé.

³¹Bík sipaying ayokone Kumkeng Ekum deme deemang moyé. Bulu loodípe Kumkeng Ekumlo ipak inamem itumla Pesorían runam Sirídanyot dem ilíkyé.

³²Rojade agíke dormoem mepaksuna ami kídíem ségulok kampo-tatporupe yatla aapí-aangem deemamoyé, idola Shédíke ayonem igena kídíe bím mimak imínsuyé.

³³Ami kídí delokke kénna-paana ruutum kídíde kénnamem abíd ami kídílo pobosuyé. Idokom moodí ayoko, bulu kelok ayokonem mimaklo petpakyé, demangkom romkayé, delokke ayokoneme ekuserangem langkamla patek sola meyé.

³⁴Edílo ami kídídem petbomyédí, Shédíke ami kídíe igul anyongko paayé, delokke atímana ségukane bojéko bulukíng lekoyé.

³⁵Kénna ruutum ayokonem petyé, idola dekepe inam legape ami kídídem deemoyéku. Sikepe inam si Shédíke iruunam yéyin longe aamang tetengem iyaryé.

³⁶“Sirialok rojade ingkuem mííbadudí dem iyé. Bí agíem uyu kídíem pemílo botteyape isuyé, delokke uyu kídí takamem botteyalumna Shédí mekom botte yanape yitkímsula lukaléla luyé. Sim atí kídísim Shédíke marlínge apíílíkla bíkkíng píímang tetengem bí iyaryé. Shédí bí kape kísa mííru tudí, dempak iyé.

³⁷Rojade bík buku kídíke agér gérbinam uyuem míípakyé, delokke mime kídí lokke ayanam uyu emte mepakyé, kapeila bí agíem uyu kídíem pemílo botteyape míísuyé.

³⁸Delok ayanpe bí líísak etor kídíke uyuem yitgeyé. Bí uun, baldín, arekana elíng, delokke abíd arekana amanem bíkke buku kídíke kumkí kénkímanam mimang uyu kolo amanpe bila yitgeyé.

³⁹Bíkke líísak ekum kídíem kaabom bidope, bí angu amolokke uyuko melíkyé. Séko bulu bíme among ruutumpe torík suyédí, dekedem bíkom airupe mínggeyé, delokke bulume bottena agérem parlíkla amanpe asi amongem panbiyé.

⁴⁰“Edílo Sirialok roja lokke oletdíku moodíe píípepak iyédí, Ijiptlok rojae bím mimakpe aabomyé, delo Siria lok rojade bík guré-gaari kídíem, guré kídíem, delokke deddína asi jajiem bomla bíkke tolnam takamlok mimagem iyabomyé. Bí puumu gínam kísape deddína amongem mimakpe aabomyé.

⁴¹Bí Pébisunam Among demteng aabomla delokke éjar-éjar asi among yétaem oletmoyé. Idola Edom, Moab, delokke Ammon kídíe bík alag aralok mopísuyé.

⁴²Edílo bí mimakpe among takam kídí dem aabomyédí delo sékote mopísulamayé. Ijipt among demte mesam mayé.

⁴³Bí Ijipt ami kídíke uun, baldín, delokke abíd arekana ekurang kídí leesupnam takamem agíkepe bomyéku. Bí Libya emlang Sudan among emkom mimaklo ikumyé.

⁴⁴Delo sanggo lokkela línggíngdan lokke legí-legang kídíe bíme míídír aloomoyé, delokke bí yagorupe marla deddína milungem petpak dope gílen bomyé.

⁴⁵Bí agí dungko roja tombu kídíem, siyéng kelang kampona deena dííteke pénsamlo molíkyé. Idokom delo bíkke yéyindí longe pííyé, delokke sékote bím igulpe aamayé.”