Read Alladian DANIEL 12 Bible Online

DANIEL 12 - Alladian bible

DANIEL 12

¹Teyong kotokide poto, “Delo moodí delo nokke amiem kaabomna bottena teyong kotoki Maikel bí lengkansuyé. Delo tani among so among yétako kakírongem lekote adír pangkímanam adírdí moodíe kalenyé. Edílo de moodíde pííyédí, nokke among lokke ami takame, séko buluke amín kídíem Shédíke kitablo attudí bulu turnamem paayé.

²Kerape sikana deddína kídí aralok bojéko lekoda turyéku: ayokone turyarna yéyarnamem paayé, delokke ayokone nyokyimana annying emlang lupaknamem paayéku.

³Kénna ruutum kídíe taleng angun kísape angunyéku. Delokke séko bulu deddína amiem aro bedanglok agér gérdope lunom todí, bulu takar angun duuyarnam kísape agínpe duuyarla angunyé.”

⁴Bí ngom poto, “Idola supak Daniel no kitab dem lekkap langka, delokke tani amongke nyokma tetelope kitap sokke agom kídíem siil lok tupkap langka. Deddína amie, bojémomo kénpe elo-belo poodu-yatok aloosuyé.”

⁵Delo ngo ami annyiko korong abe elenlo dagdope kaato.

⁶Bínyike akonde korong teyolo dakna teyong kotoki dem íngkíto, “Edílopeda si míngkén manam atí kídí si arope iyin líkyéne?”

⁷Korong teyonglo dakna teyong kotokide alag annyiem talengpe lengon sudola Agínpe Duuyarna Shédíke amínlok pébisuto. Ngo bím sikepe ludope tatto, “De tagum kolang tagrot kope iyé. Edílo Shédíke ami kídíem irééname iyin yédí, delo si atí takam si apííyé.”

⁸Ngo bík lunam dem tatto, idola ngo dem tatkén mato. Delok legape ngo bím íngkíto, “Idokom E ngok ruutum, sike takam si kapekísa iyin yéne?”

⁹Bí poyansuto, “Daniel no supak gíkupe aiyé, kapeila yéyindíe pííma loope sim agom kídí sime ami kénmomape, pesuppe siil lok tupkapla mepe aiyé.

¹⁰Deddína amiem deebín mola, deemang takot atí kamadope ipítla punmoyéku. Séko amiedí atímane, bí legang sim kénlamayé, idola atímanade atímana agérem pakyape iyé; kénna ami kídí petome legang sim kényé.

¹¹“Loodípe ipak inamem itumdí longe delokke ila, Pesorían runam Siridanyot dem leerepdo longe deloope 1,290 longeko kayé.

¹²Séko buludí míngkesula haggapla toyala 1,335 longe gíboodí longe teloope duuyéne, bulu gérne.

¹³Delokke Daniel no, yéyin longe loope míngkesula yégaplangka. Dekepe irongem no apééyé, idakkom no yéyindí moodí telo, nokke amanem paadokupe no gerep yéku.”