Read Alladian DANIEL 7 Bible Online

DANIEL 7 - Alladian bible

DANIEL 7

¹Belshajjarke Babilonlo rojape ido kerayalum dítak delo Danielke ketduem bí kaalu immangko maato, delokke yoh delo kaarí-kaanyoko kaato. Delo bí deke delokke gomroem atto.

²Daniel bí sikepe poto: Esare moole appilok mudado, delokke siyéng asieme situm bukdope ibomto.

³Akone akonlo kaabí sumanam botteruna banji-banmang appiko siyéng delok gerep lento.

⁴Kerangke akonde myomur kísa kaanamko, idola pemí kísape alap kídíem gedo. Ngokke kaadungem alap kídídem tírbínto. Banji-banma dem irepla tani kísape ale annyilo dakmoto. Delok rongem tani kísape mííyi-míísang nana aapíem delo bilíkto.

⁵Annyinana banji-banmang de situm kísa kaanamko, de méélamke ale annyilok dakdo. De ínmo along angumko iipang pénsamlo rekbomdo, delokke adudko bím podo, “Dolangka, no edítko adínem dolayédí, dolangka!”

⁶Depe ngokke kaadungem, banji-banmang konko lenkai. De takar simyo kísape kaanamko, idola bíkke lamkulo pettang alap kídí kísa alap appiko gedo, delokke de dumpong appiko gedo. Delo takamem ruutum bomla nana ralnamem bilík nampe kaado.

⁷Dem ngokke kaadungem appinana banji-banmang koteng lenkai. De yagorupe raldo, yirí-pedínampe ido, delokke peso monako. Bíkke dopenamem, bík botteruna arem iipanglok rekjémdo, delokke jamruk kídíem alelok tujémdo. Abíd banji-banmang kísa imape, bíkkelo reebunge íyingko kado.

⁸Ngo reebung kídídem aipakpe kanggap dungem, areng améng nako abíd reebung kídí delok lendope ngo kaato. De kerape kakusuna reebung angumko dírtu-díryungto. Si areng si tani amig kísa amigeke kado, delokke míngkímsula yitsuna nappangko gedo.

⁹Ngokke kaadungem, paleng kídíem duupe kolo leebito. Delo Konnyi-mennyingke Longe bí paleng akon delo duulíkto. Bíkke ege kídíde tapam kísa yalundo, delokke bík dumídde mér amíd kísape yalunla ido. Bíkke palengde eme meyope dordo delokke kelong kídí dete dorna meyope ido.

¹⁰Eme korongko bík keradelok bitlendo. Delo deddína éjar amie bíme agér gérbila yéyindo, delokke sapla yimanam milion amie bíkke keralo dagdo. Kebang ekum delok agére ingun lento, delo kitab kídí deme lekyato.

¹¹Ngokke kaadungem ngo améngna areng deme agíem bottepe lusula, delokke yidsula ponam agomem ngo tatto. Ngokke kaadoem, yidsuna banji-banmang dem petto, delokke bíkke amíldem meyolo yoplíkla gupakto.

¹²Abíd banji-banmang kídí delokke tolnam-ralnam emteng langkutto, idokom bulume moodí anyongko turdope meto.

¹³Kaarí-kaanyo sim yohlo kaadungem, tanike oo kísana ako ngo kaato. Bí doomuglok lekope aala, Konnyi-mennyingke Longeke keralo gíato, delokke bíme bíkke keralo lengkanto.

¹⁴Bíme among yéta takamem ruutumnanaem, angun-abéem, delokke roja pauarem, among tabung lokke ami kídíe, opín tabunge delokke agom gomuk atí-atína tabunge agér gérbidope bilíkto. Bík ruutum yégenamde yénam tabulo duuyaryé, delokke bíkke among yétade edílokom nyokmayé.

¹⁵Ngok kaarí-kaanyo kaanamde ngom ansu-pesomoto, delokke de ngome yagorupe míídír moto.

¹⁶Ngo delo dakna akonlo gíla, legang takam dem pobidope íngkíto. Dekepeila bí ngom gomroem pobito.

¹⁷Bí poto, “Si botteruna banji-banmang appi si, among so siirep pena roja among yéta appie.

¹⁸Delokke Takamem Botteyalumna Shédíke deena ami kídíe roja igena ralnamem paayé, delokke dem yénam-gítnam takamlo agín legape bomyaryé.”

¹⁹Delo ngo abíd kídí delokke kísamana, agíke pitol ale kídarlok, delokke arem iipang kídílok bíkke petbomnam kídíem ijétla, delokke tujémna pesorupe kaanam, banji-banmang appinana delokke legangem kénlíto.

²⁰Delokke ngo bíkke atuklo genam reebung íying delok legang emla, deloge méélamdem arengko lenlangkula delok kera delok reebung angumko olet genam delok legangem kénlíto. De amigeke kala, delokke nappangko gela míngkímsula yitsudo. Abíd takamem pemílo de peso yalumnampe ido. Delok legangemte kénlíto.

²¹Ngokke kaadungem, de arengde Shédíke ami kídíem mimak magla, bulum ikumto.

²²Delo Konnyi-mennyingke Longe bí aala, Takamem Botteyalumna Shédíke ami kídí kepe doobila kebang lunam agomem polento. Kapeila Shédíke ami kídíe among yétaeme paadí moodíe píngkai.

²³Si ngome pomík biname: “Banji-banmang appinanade, tani amongso siireppena appinanape roja among yéta legange, delokke de abíd roja among yéta kídí lokke anguyé. De among takamem ikumla, dekedeme bénmíkgooyé.

²⁴Reebung íyingde, dem among yétadem yébompena roja íyinge. Delo roja konko lenyé; bí kerang roja kídí lokke anguyé, delokke bí roja angumko laapakyé.

²⁵Bí Takamem Botteyalumna Shédíke míínamem lupéésuyé, delokke Shédíke ami kídíem irééyé. Bí buluke dormo ayon emlang gíídí kídíem angupe idokupe ikíyé, delokke Shédíke ami kídíe bíkke rumkílo dítak angum kolang takrotko yéyé.

²⁶Delo teyong amonglok kebang ekume kebangem baalen bomla bíkke tolnam-ralnamem laapakla, bíme apíípe nyokmoyéku.

²⁷Tani amongke yéta takam lokke ralnam emlang kímte-remte bottenamem Takamem Botteyalumna Shédíke ami kídílo bilíkyé. Buluke roja yéta amongde edílokom nyokmayé, delokke bulume tani among sokke ruutum takame agér gérbiyé, delokke lulígem tatbiyé.”

²⁸Si atgapnamem atríe. Ngo yagorupe pesokane ngokke mikmoe sémal geto, delokke ngo atí takam sim aapílo gesiisuto.