Read Alladian DANIEL 9 Bible Online

DANIEL 9 - Alladian bible

DANIEL 9

¹Jarjeske oo, Medes among lokke Darias bí Babilon amongem rojape ruutum bomto.

²Bíkke rojape yédo kerangyalum dítak delo, kaalu miri Jeremiahme RUUTUM ke polík akorlok atnam deena kitap kídíem porila, Jirusalemke dítak íying kíníd kope rongngamla kumruk-moorukpe ipenam legangem míngkí bomla kénto.

³Delo ngo Ruutum Shédí kíng rogula, doma-tíímape nyola, ankí-gasorem gela, delokke metbulo duula, kumgapto.

⁴Ngo RUUTUM ngokke Shédí kelo kumsula, ngokke ami kídíke paab kídíem ngo ponkan bito. Ngo kumto, “Ruutum Shédí, no botterune, delokke ngolu nome mínggedung. No nok agíke daapongem mínggap sudung, delokke duuyarna ayangem, nome ayang nalo lang nok lulígem igena kídílo no lengkan dung.

⁵“Ngolu paab ito, ngolu deemanape ikai, ngolu imemto. Ngolu nokke ilangka emla lulígnamem míípakto, delokke nokke aro bedang lengkan namlok ngolu ngépak geto.

⁶Nokke béérang kaaluna miri kídíke nokke amínlok, ngoluke roja kídíem, ngolum yébona kídíem, ngoluke buku-neku kídíem, delokke ngoluke among tabungem pobinamem ngolu tatbimato.

⁷E RUUTUM, no deenarunge, idola ngolu agínpe delokke silolope ngoluke sulo annyingem laalík suyinto. Ngolu Judahlo duune lang Jirusalemlo duune, delokke Israel kídí takame, séko bulumdí no nokke teyolo míngke sumanam legape, mongéna, delokke mootengna among kídílo pitpan-pitran sugotodín, arope ngolu sikepe ito.

⁸E RUUTUM, ngoluke roja kídíe, ngolume yébona kídíe, delokke ngoluke buku-neku kídíe, nokke mirolpe annying runampe ila paabem ito.

⁹Ngolu nom deddíko mirolpe ibom lateng no ngolume ayang nako, delokke imemem mesam bine.

¹⁰E RUUTUM ngoluke Shédía, nokke béérang kaalu miri kídílo, ngoluke yégepenam ayon kídíem nokke políknamem, ngolu tatbi mato.

¹¹Takam Israel kídíe nok ayon kídíem betto, delokke nok ponamem tatlímato. Ngolu nokke keralo paab ito, delok legape nok béérang Mosike ayonlo atnam béénam kídíem no ngolukíng bomalíkto.

¹²No ngoluke teyong lolang ngolume yébona kídílo, ilíkyé emnamem ilíkkai. No tani among sok abíd luune kídíem pemílo Jirusalem me bojéyape ingééto.

¹³Mosike ayonlo atnam takam ingéénamem ngoluke teyolo no ruulíkto. Idola supakkom, E RUUTUM ngoluke Shédía, ngoluke imem sunamlok míílat sulangkula, demangkom nokke aroem igelangkula, nome aipe míímo dokupe ikímang.

¹⁴E RUUTUM ngoluke Shédía, no ngolume ingéépe míírusuto, delokke ingééto, kapeila no agínpe aroem ine, delokke ngolu nokke ponamem tatbimato.

¹⁵“E RUUTUM ngoluke Shédía, no nokke ralnamem, nokke ami kídíem Ijipt lokke laalen langkula lengkanto, delokke nokke ralnamem supakkom míípa sudung. Ngolu paab ito; ngolu imemto.

¹⁶E RUUTUM, no kerang longe kídílo ngolume mopítto, dekepeila Jirusalem ke teyolo maryi mapeka. Si nokke luune, nokke deena díítee. Ngoluke ampeng degonglo duuna among kídí lokke ami takame Jirusalem emlang nokke ami kídíem, ngoluke paab kídí legapelang ngoluke buku-nekuke deemang inam legape kanggíp dung.

¹⁷E Shédía, ngokke kumnam emlang rogunamem tatbika. Bénpak tonam nokke Kumkeng Ekum sim morep langkuka; takame no Shédíe emla kéndokupe sime morep langkuka.

¹⁸E Shédía, ngolum tatbi toika; kaatoi ngolume, delokke ngoluke adír emla nokke amínem dunggena luune sokke ankíem kaabi langka. Ngolu aroem inam legang lokmang, idola no ayang nako emla ngolu nokkíng kumdung.

¹⁹RUUTUMA, ngolume tatbi langka! RUUTUMA, ngolume yaasam ayangem ruubi langkuka. RUUTUMA, ngolume tatgap bila agérem gérbi langkuka! Takame no Shédíe emla kéndope, adol mapeka! Si luune silang ami kídísi nokke Amínem gene.”

²⁰Ngo ngok paab kídí emla ngok Israel ami kídíke paab kídíem ponkan bila, kumdan tetela, delokke bíkke deena Kumkeng Ekumem morep dokupe RUUTUM ngokke Shédí kíng rogu teteto.

²¹Ngokke kumdungem, ngok kerape kaarí-kaanyolo kaatonam, Gabriel bí teyong lokke yoptokla ngok keranglo dagangkai. De yume lok aman bidí moodípe ito.

²²Bí lubito, “Daniel, kaalu immang dem no kéndope nom igul kape emla ngo so aadung.

²³Nokke Shédí kíng roguem gulen dodem, bí nome poyansuto. Bí nome ayadung, dekepeila ngo bík poyan sunamem pobikape aadung. Supak kaarí-kaanyonam dem ngokke pobidungem no tatgap langka.

²⁴“Nok ami kídíem, delokke nokke deena doolungem paab loklang aimalok mopít dokupe, hopta íying kíníd hopta kídí moodíko Shédí bí ruulenla metung. Kaarí-kaanyo delang polu-poornam de arope ilík dope paabem mesam biyé, delokke agínpe duuyarna deena yélamem ilíkyé, delokke deena Kumkeng Ekumem anípe kumlíkyéku.

²⁵Legang sime an-gap langka, delokke kénlangka: Jirusalem em anípe morep dokupe ukum agom bido lokke ila, Shédíke tosaknam bíkke aado loope kíníd hopta kídí kolang íying akké kolang annyi hopta moodíko iyé, delo Jirusalem luune ke bedu-bedang emlang edííruna líísak etor kídíem morep yéku. Idola si moodí kídí si ebínrunam moodípe iyé.

²⁶Delok rongem íying akké kolang annyi hopta moodí delokke gírongem Shédíke Tosaknam Bíme igímape mokayé. Luune demlang Kumkeng Ekum deme tolna-ralnarung ruutumkone sipaying maglíngem aabola bénpakyé. Shédíke iruunam midu-mimak emlang nyoknam-ríínamem bomala puumu kísape yéyindí longe de pííyé, dekepe nyokku penamem ruulíkkai.

²⁷De among ruutum de deddína ami kídílo dítak kíníd kope edíípe daapongko ibosuyé, delokke edílo sokke tungkon moodíe gíyin yédí, delo bí ipak-saamo kídí emla aman binam kídíem imoyimayé. Delo Peso rían runam Sirídanyot dem Kumkeng Ekum lokke kedon yalumko delo melíkyé. Dem melíkla ami teyodelo Shédíke ruula iruunam ségupe ami delokke nyokdo loope de atode kayé.”