Read Alladian HOSIA 1 Bible Online

HOSIA 1 - Alladian bible

HOSIA 1

¹Judah lok roja kídí: Ujjiah, Jotham, Ahaj lang Hejekiah delokke Jehoash ke oo, Israelke roja Jeroboamke longe kídí delo, Biri ke oo Hosia kíng RUUTUM ke agome pííto.

²Edílo RUUTUM bí Hosia keelok Israelem lupo-manmo agomem polen todí, bí Hosiame poto, “No gíla notii mimeko méngpe laalangka, delokke notii delok koo kídíem obo sulangka. Kapeila among si RUUTUM me mepak sula bojérupe notii agérem iyinkai.”

³Depe lulíg kolok bí Diblaimke ome Gomarme mimepe laato, delokke mimede koo gela ooko obito.

⁴Delo Hosia me RUUTUM bí poto, “Koo deme Jejreel emla amínem mínlangka. Kapeila Jejreel yiibelo bosi maglíngem yílíng biimonam legape ngo, Jehuke oten ome-oolo edo rayéku, delokke Israelke among yétaem ngo nyokmoyé.

⁵Delo longe delo Jejreel yiibelo ngo Israelke ityi-epugem dírpakyé.”

⁶Gomar bí koo gelang kula omeko oto. Delo RUUTUM bí Hosia me poto, “Bíme Lo-Ruhama[1] emla amínem mínlangka. Kapeila ngokke ayangem Israel kídílo ngo lengkan suyimayé, delokke buluke imemem ngo asampe mepak biyimayé.

⁷Idola ngokke ayangem Judah erang teyolo lengkan sula, RUUTUM buluke Shédí ngo agísue bulume mopítyé. Dekepe mopítnam agérdem ngo midu-mimaklok, yoksalok, demangkom ityi-epuklok, demangkom guré kídí, delokke guré dugbomna sipaying kídílok imayé.”

⁸Lo-Ruhama me Gomarke anyun sunyin rodem koo ko gelang kula, oo konko otoku.

⁹Delo RUUTUM bí poto, “Bík amínem Lo-Ammi [2] emla mínlangka. Kapeila Israel kídíe ngokke amipe iyimang, delokke ngo buluke Shédípe iyimang.”

¹⁰“Idola saplate sapkén yimanam, delokke kílate kíkén yimanam siyéng asi robeng lokke sulli kísa Israel kídíe iyéku. ‘Nolu ngokke ami yimang,’ emla mínbomnam ayanpe, ‘Turna Shédíke ome-oo kídíe,’ emla mínyéku.

¹¹Judahke ami kídíe lang Israelke ami kídíe lekobosu langkula, bulu ruutum atelko ulbo suyéku, delokke asi-among delo bulu jéla-remlang kula Jejreelke longede gai-gakong ruuna longepe iyéku.”