Read Alladian HOSIA 11 Bible Online

HOSIA 11 - Alladian bible

HOSIA 11

¹RUUTUM bí sipe emdung, “Edílo Israel bí ojingpe itodí, ngo bím ayato. Ijipt amonglok ngok oope bíme tomlentoku.

²Idola edítko ngo bíme tomtodí, deddíko bí ngok keralok mooteng gekai. Ngok ami kídíe Baal uyu kíng ipak ila, mimang kídí keralo namponem romlíkkai.

³Ngoamino Israelme alaglok gagla, gínam emte gíyiltuane, Ngokke alaglo ngokke amiem ngo botuai, idola ngokke bulume kaabomnamem bulu edílote míngkén-míngo kasumang.

⁴Ngo bulume atekrupe ayasula, bulume bo-onla, mopumlo ilíksula, ngo gubdola bulume amam mamla ine.

⁵“Bulu ngokkíng aalat sukunamem topak sunam legape, bulu Ijiptpe toklat sukurupe aiyé, delokke Assiria bí buluke teyolo ruutum dobom yéku.

⁶Yokse buluke doolung kídílo yaari garpe kitgoola, buluke doolung yabgo eyab kídíem bényinyé. De ngokke ami kídíem nyokmoyé, kapeila buluke aapísulo aidung emla míínamem bulu idung.

⁷Ngok ami kídíe ngok keralok mooteng ruupe emla igapdung. Buluke genam jungoli delokke legape bulu ulo gogyé, idokom sékoteng deme delok tubín bimayé.

⁸“E Ephraim nome ngo kape kísa mepak layén? E Israel nome ngo kape kísa yépan sumoyén? Ngo Admahme nyokmonam kísa, nome kapekísa imoyén? Demangkom Jeboiimme líípaknam kísa, nome ngo kapekísa imoyén? Ngok aapíe dekepe ngome imomayé. Ngokke nom ayang si, bojé momo ilendung.

⁹Israel nome ngok aklíng-marlíng lok, lekoda itung-iréla nyokmo kumayé. Kapeila ngo Shédímin, ngo tani mang. Nolu kelo ngo, Deena Bí duudung. Ngo nolu kelo mardola aamayé.

¹⁰“Ngok ami kídíe, buluke miru kídíem myomur kísape ngokke ngírbom yékuem, ngokkíng gímín yéku. Bulu ngokkíng anggodan elok dugaayéku.

¹¹Bulu pettang kídílok deenam kísa Ijiptlok dengaayéku, delokke Assirialok, perong kídí kísape yoptokyéku. Ngo bulume lekoda buluke ekum kídílo bomayéku. RUUTUM ngo sikepe podung.”

¹²RUUTUM bí podung, “Israel ami kídíe menam-yatnamlok ngome gargoo bomkai, delokke Judah ami kídíe supak pete, aro ayarna, delokke deena Shédí ngome, mirolpe roltídung.”