Read Alladian HOSIA 12 Bible Online

HOSIA 12 - Alladian bible

HOSIA 12

¹“Israel ami kídíke roh lokke ila adeng loope inam kídí si agér kamane, delokke nyokmopene. Rukup mínsuname, delokke momín- pamíne buluke aralo yagokai. Bulu Assirialo bonying ibosula, delokke Ijiptlo bési-béparem ibosudung.”

²RUUTUM bí Judah amike teyolo gomké lupenameke kadung, delokke Israel emteng, bíkke ami kídíke atímana agér inam legape itung-iréyé. Bí buluke inam agér edoem rayéku.

³Buluke buku Jakob bí, opum sunam Esaume, ane akii aralo duudung adape nímín-bedín sula ito; edílo Jakob siirep todí, bí Shédí mete momín suto.

⁴Bí teyong kotoki konemte laamín sula ikumto. Bí kapla-rííla utepooroko paadope roguto. Delokke Shédí bí ngoluke buku Jakob kíng Bethel amonglo aala luposuto.

⁵Díamino RUUTUM Ralyayalumna Shédíbí. RUUTUM emnam demin bíme kumsunana amíne.

⁶Dekepeila supak Jakobke otíng-oyin kídía, noluke Shédí kelo míída sulangkula, bíkkíng aalat sulangkuka. Nolu ayang emlang jonna bedangem bomgap langka, delokke noluke Shédíme agínpe toya langka.

⁷RUUTUM bí ludung, “Israel ami kídíe aapí deemana Kanaan ami kísadung; bulu mena sér-palla loge bulukíng ekurang rena kídíem yatnam-panamem erbomdung.

⁸‘Ngolu miremkai, ngolukíng deddína ekurang kídíe kakai, delokke sékokom ngoluke mirem emla jénam sim yatkup-palatla paablok itung emla porman bilamayé,’ emla buluke aralo pobo sudung.

⁹Idola Ijipt amolok nolum gílen bokuna RUUTUM noluke Shédí ngo, nolu kelo ngokke aaduem, yépol mooruk amonglo tombu hola duunam kísa, lekoda tombulo nolume ngo duumoyéku.

¹⁰“Ngo kaaluna miri kídíem luposula, deddína kaarí-kaanyo kídíem bito, delokke kaaluna miri kídílok ngokke ami kídíem lutornamem lutíto.

¹¹Dekepe ilate Gileadlo mimang kídíem kumsudung, delokke dekedem kumsuna kídíde siyinyé. Gilgallo rubo kídíem ipakpe ilíkdung, delokke de runggu kídíde pekut-pelutna arík kídílo língkum kísape dooyin yéku.”

¹²Ngoluke buku Jakob bí Aram amope duknyokla, méngko paadope ami akon aralo agér ibila, mér kídíem kaabila ito.

¹³Israel kídíeme Ijipt amolok mopít dokupe RUUTUM bí kaaluna miriko lulígla, Israel kídíem kaabomdope, deme kaaluna deme ruulíkto.

¹⁴Israel ami kídíe RUUTUM me yagorupe marmoto. Buluke atímana agér legape bulu arorupe nyoknamem paabato. RUUTUM ke teyolo atímana amín kamonam legape bí bulume irééyéku.