Read Alladian HOSIA 13 Bible Online

HOSIA 13 - Alladian bible

HOSIA 13

¹Kerang yétonamlo, edílo Ephraim opíne agom potodí, delo abíd Israel opíne pesola yéto. Ephraim bí Israel aralo gaina opín kope ituai. Idola bí Baal uyume kumla paab ito, delokke sok legape bulu siyé.

²Supak loope bulu tani alaglok, delokke tani aapílok ruula, pílennam baldín mimang kídíem kumsula paab itídung. Delokrongem bulu sikepe podung, “Bulume ipak kídíem bilangka!” Kapekísa ami kídíe rubílpe pínam mimang kídíem mumpup yéne!

³Dekepeila roh aapam kísa, delokke rokom ngargo tangar kísape si ami kídí si nyokyéku. Bulu ali yikpomlok gyalenna pemuk kísa pelang, medung arulok míkkí gyapak lenna kísa iyé.

⁴RUUTUM bí podung, “Ijipt amolok nolum laalen kuna, ngomino RUUTUM noluke Shédí bí. Ngokke kékonlo nolu abíd Shédí kamang. Ngo petom min nolume mopítne.

⁵Erengna yépol amolo ngo nolume aiyope kaabom suto.

⁶Idola edílo nolu ardana amonglo aatodí, nolu akiie dodarla aange pííto, delokke ila nolu míngkím sulenla ngome mitpan suto.

⁷Dekepeila ngo nolume myomur simyo kísape aabomyé. Takar simyo kísape noluke bedalo ngo tobomyé.

⁸Ngangeme rotkut binam situm kísa ngo marla aabomla, nolume puké-puyéyé. Myomur simyo kísape nolume ngo rekko paklo doyé, delokke monkír kísape nolume tarongpe roomíkyé.

⁹“Israel lok ami kídía, nolume ngo nyokmoyé! Delo nolume séko igul layén?

¹⁰Nolu roja kolang yébopena ruutum kídíem koto, idola bulu among sime kape kísada mopítyéne?

¹¹Ngokke aklílok nolume rojem bito, delokke ngokke marlílok bulume ngo laapak toku.

¹²“Israelke paab kídíem, delokke imem-hamemnam takamem atkumtung, delokke atkumnam kídíem airupe mesiitung.

¹³Okii kila, lenta-lenmang idola, lenlímana, akii aralo duuna koo kísa, Israel amie turpenam katuai, idola deme laalímana bopol amipe idung.

¹⁴Ngo bulume Sheolke [6] pauarlok atoko biyan dola laalen yékunía? Ngo bulum sinam lokke turmoyékunía? E simo nyokmone, ingkoloda nokke kilii-ramlie? E Sheol, ingkoloda nokke nyokmona ralname?

¹⁵“Israele ííng kísa arda alooduakom, ngo yépol amonglok pamkina sanggo asarko melíkyé, delokke de buluke sirung kídí emla asi deerung kídíem ereng moyé. De buluke arekana ekurang takamem nyokyin moyé.

¹⁶Samari me ngokke mirolpe rolgangpe ingéng rungkupe aiyé. Bíkke ami kídíe mimaklo siyé; koo kídíem amonglo gepetyé, delokke koo gena mime kídíem jogsalyé.”