Read Alladian HOSIA 8 Bible Online

HOSIA 8 - Alladian bible

HOSIA 8

¹RUUTUM bí podung, “Menape bikulem mutlangka! RUUTUM ke ekum teyolo pemí kísape ako uaangkai. Ngok ami kídíe ngok daapongem ige yimape ila, ngokke luyilem mirupe igekai.

²Israel kídíe, ‘E ngoluke Shédí, nom ngolu arope míídungku,’ emla kapla-rííla idolate,

³bulu aina atoem mepakdung. Depeila mirue bulume monbomyé.

⁴“Bulu ngome atí tatkí-lukí sumape, ngokke elígnamem tatyang-kaayang sumape, agí míídusupe roja kídíem, mite-migom kídíeme ullensula idung. Bulu agíke uun, nokdi aballok mimang píla, bulu agíke nyokkunana bedangem mosudung.

⁵E Samari, ngo nokke teyolo yagorupe marlídung. Nokke gooru rubíl mimang dem elpakto. Buluke mimang kumkolok edílo bulu deeyékune?

⁶Sim rubíl mimang sim Israel lokke mimang pína konemin pítune, delokke si mimang si Shédímang. Samari nokke kumbomnam rubíl mimang sim amík-amík idope dírmíkyé.

⁷Bulu asarem lelíkto, iname gumnamem gatyéku. Minmana ali-ayéde, edílokom apimpe imayé. Depe inamko kayé mílokom mibo-miyinge dokamyé.

⁸Israel ami kídíe mibo-miying kídílo hoyél sula, mibo opín kísape ila agérlo aamana betna peking kísakai.

⁹Moonam gado kísape Assirialo Israel kídíe sangaala, mibo-miying kídíem, bulume mopítdope are dorla ikai.

¹⁰Dekepe bulu mibo-miying kídíem relík suduakom, ngo bulume goodum sulang kula, itung-iréyé. Edílo Assiriake bottena roje bulume idír bomyédí, bíkke aralo bulu yagorupe ankí-adír lenyé.

¹¹“Israel bí paabem ipaksupe deddína rungguem píyayang, paab ipekoem bojémomo paayayang ito!

¹²Ngo buluke legape sanam yimanam ngiitomem atbilate, dekedem bulu kangkén-míngkén manam mibo-miying ekurang kísa míngkai.

¹³Bulu ngome ipak ibila, ipaknam adínem dola-tííla idungai, idola RUUTUM ngo buluke teyolo ashémang. Dekepe ila ngo buluke atímangem míípasula, buluke paab legape bulume irééyéku. Ngo bulume Ijiptlo melíkyéku.

¹⁴“Israel ami kídíe deddína roja ekum kídarem morepto, idola bulum agíem Pílenname bulu mitpan sukai. Judah ami kídíekom deddína líísak etor torgoo sunam luunem morepto. Idola ngo ememe metoklíkla, buluke roja ekum kídar emlang luune kídíeme gupak moyinyé.”