Read Alladian HOSIA 9 Bible Online

HOSIA 9 - Alladian bible

HOSIA 9

¹Israel lok ami kídía, nolu angukon mibo-miying opín kísape noluke adeng-apeem loodum yimapeka, kapeila noluke Shédíke keralo, nolu aro aapílok yéna kamang. Nolu moole takamlo Baal uyu kíng nolu agíem notiipe kolíksula, bíkke nolum ali-ayé biname emla, noluke míímemko delo nolu ashéng bomdung.

²Idola menape nolu ali-ayé, olib tél, delokke asi-aponge kaimayé.

³Nolu RUUTUM ke amolo oolpe duuyarmayé. Kapeila nolu Ijipt amolo enlat suyéku, delokke Assirialo deemana donamem doyé.

⁴Dekena among kídí delo, RUUTUM ngokkíng nolu apong ipagem bilang kumayé, delokke abíd ipak-saamo aman kídíem ngome bilamayé. Buluke donam-tíínam kídíde, gíímang-simolo donam kísa, dona-tíínadem deemang moyé.

⁵Dekepe ila edílo RUUTUM me yidgedí gíídí-siipe aayédí, deke delo bulu kape kísa iyénadí?

⁶Bulu nyokdí longelo dugpísuge tokom, Ijipt e bulume goodum suyé, delokke Memphislo bulume yuyinyé. Buluke nokdi abal mekumnam dem, delokke gairuna líísak ekum kídídem taang íínge maalup bomyéku.

⁷Ami kídíe buluke paabanamem paadí, ingéngdí moodíe píídak. Dekede iyéme, Israel bí kényé. Nolu sikepe podung, “Si kaaluna miri si bopolko. Aidlok yéna si tumdung.” Ami kídí noluke paabe bojé aloonam legape nolu ngome kangkidung.

⁸Shédí bí ngome bíkke ami Israel kídíem lutor dope emla kaalu miri kope melíktung. Dekepe idolateng ngokke gítíng tabulo, nolu ngome pettangeme etku taapeng lok batnam kísa batperung emla itídung. Shédíme Kumkeng Ekum looteng ami kídar si kaaluna mirike mirupe idung.

⁹Bulu Gibeah amonglo inam kísape deemang-amolo yagorupe eerí yayang itokkai. Shédí bí buluke paabem míípasula, deke delok legape bulume itung-iré yéku.

¹⁰RUUTUM bí podung, “Israelme ngokke paadodem, de yépol amolo onggur ane saana kísape paatuai. Noluke buku kídíem ngokke kaadoem, kerape énggena tapang esing ayé kísape kaasutuai. Idola edílo bulu Peor Díítumlo píítodí, delo bulu Baal uyume kumsukai, delokke buluke erbomnam uyu delokke kísa bulu belum runampe iyinkai.

¹¹Israel ke angun-abée pettang kísa deenyokyéku, delokke bulukelo ome-oo oyimayé, mime kídíe nganga geyimayé, delokke akiilo koo gelen yimayé.

¹²Bulu koo kídíem usala iduakom, ngo séko memkom turmomape, bulu kelok langkutyé. Edílo ngo bulume mepak yédí, deddí-deddína reyub runam ato-siroe bulukíng kalenyé.”

¹³RUUTUM, ngo buluke koo kídíem apletla petbom dope kaadung.

¹⁴So ami kídí teyoso no ilíkdope ngo nokkíng ingkoko kopene? Bulume orí-oyang ona akiiem, delokke sanna anyunem ruubilangka.

¹⁵RUUTUM bí sipe ludung, “Buluke takam atímange Gilgallo gérlento. Delo among delo ngo bulume belum lento. Delokke buluke atímana agér gérnam delok legape, ngo bulume ngokke amonglok monpakyé. Ngo bulume ayang yimayé; buluke mite-migom takame ngome mirolpe roltí bomkai.

¹⁶Israel ke ami kídíe appíre ereela, sanla, ayé éémana esing kísa nako. Bulu ome-oo kamayé. Bulu odagakom, buluke erbomnam ome-oo kídídem ngo petyinyé.”

¹⁷Ngokke agér gérbinam Shédí bí bíkke ami kídíem mepakyé, kapeila bulu bíkke agom-aangem tatbimang. Bulu mibo amolo magoo-yégoona amipe iyinyé.