Read Alladian JOEL 2 Bible Online

JOEL 2 - Alladian bible

JOEL 2

¹Jayonlo bikul-tapungem mutlangka, Shédíke deena díítumlo lomnam adudem dudmo toka. Among so duuna tabungem pesolok danmo langka! Kapeila RUUTUM ke longe píídak. De longe de anín aloodubong.

²De aapí genyii bomnam kaamona longe kope iyé. De yoorala, doomug alempe ina longe kope iyé. Dííte kídílo kaamoe inam kísa; sanam yimanam pemír maglínge yobadak. Sikena irisinyona atoe kerapekom ikímang, delokke angkupena longe lokom imayé.

³Buluke dokode eme gunam kísa idung, buluke doorukde míkkí petome saana, guruk tuunam kísa idung. Buluke keralo amongde, Eden baarikísa idung. Buluke méélamde pemukpe murna yépol amongpe idung. Ingko atoe kom buluke keralo ipít sumang.

⁴Bulume guré kísa kaadung, bulu mimak guré kísa sutla dugdung.

⁵Buluke dííte teyonglo sutsa dungem, buluke adude gaari adud kísa idung. Erengna tamie emelo buknam kísa, buluke adude idung. Mimak imín supe iyéme, sanam yimanam maglínge aala, dagnam kísa bulu idung.

⁶Bulume kaayéme ami takame, peso gela migmo kídíe rugge dung.

⁷Miram kídí kísape bulu mimak iyadung; sipaying kísa etorem resaadung. Bulu lakké-lakbíkpe gíkén-gírén mape, jonnampe buluke gítípe gíyardung.

⁸Buluke aralo tupsu-tuprula ibosumang. Bulu jonnampe agí-agí gídulok gídung. Buluke keralo gíníng-yoksa, yapgo atíe kaarík dokom, agíke gíjonsuem mepakmape, jonnampe agíke gítípe gíyardung.

⁹Bulu doolunglo duga bomdung, delokke yapgo etor lok dugdung. Bulu ekum kídílo renggodung, delokke doppyona kísa kirki kídílok rengadung.

¹⁰Buluke kerang-kerangpe amonge ton-gedung, delokke talenge beleng gedung. Doonyie lang pooloe kaamo gedung, delokke takar kídíeteng angun geyimang.

¹¹Maglíng kídí teyolo RUUTUM bí uglíg dung. Bík maglíng kídíde sanam yimanampe idung. Bík agomem tatna kídíde, migang-miramna mílípe idung. RUUTUM ke longe si edítko reyub runamko! Sékoda deme hakjém gelayén?

¹²RUUTUM bí sipe podung, “Supakkom nolu ngokkíng kapgu-rogu sulang kuka, nyobom sulangka, aapí míílat sulang kula, nolu aalat sulang kuka.

¹³Noluke egeme bétsunam petomde atíng mang. Nolu ankídung emla noluke aapí-aang, okunam dem lengkan supe aido. Noluke Shédí kíng aalat sulang kuka. Bí asampe ayang yalen sunako. Bí menape marpo manako, delokke ayange bíísét nako. Itung-iré penam agérem menape laabín kunako.

¹⁴Séko kéndun? Bí aapíe angupe gelang kula, ayang yalen sulang kula, utepooroem ruubi langkukom iyépe. Depe ikumílo nolu ali-ayé, delokke tíínam amanem, noluke Shédí kíng nolu bila yéku.

¹⁵“Jayonlo bikulem mutlangka, nyodope gogyi líkla, kebang duusumko tomlangka.

¹⁶Ami takamem dumsu mola, Deena kebangko baadope irung langka. Abu mine kídíem lang koo kídíem, delokke anyun sunnam daadilope gogdum sula, aní pakpe nyamram ibosuna emteng, buluke ekum lok tomlen bomlangka.

¹⁷“Kumkeng Ekum lokke aatak eyab kelang deena runggu kako pénsamlo, agér ina miri kídíe teng, kapla-rííla sipe kumlangka: ‘E RUUTUM, nok ami kídílo, atekrupe ayang sulen langkuka. Angukon ami opín kídíeme, ngoluke teyolo ngilka mola, “Noluke Shédí bí íngkolo?” emla lupu-lulé momapeka.’ ”

¹⁸Delo RUUTUM bí agí amongke teyolo erap langkula, ami kídíem ayang sutoku.

¹⁹RUUTUM bí bulum poyan suto, “Supak lokke ila, ngo nolume dopenam ali-aamem, tíípenam onggur alang kídíem, mollík supenam, delokke meru nyotka sunana olib tél kídíem, noluke aapíe apíng rudokupe ngo ruubiyéku. Delo angukon mibo opín kídíe nolum lupu-luléla ilamayé.

²⁰Ngo línggíng telok deetokna pemír maglíngem monbín langkula, yépol amonglo monlík biyéku. Buluke kerang yopgenem Sina Siyénglo monlíkla, delokke buluke méélam gítílnem Among Raadang Siyénglo monlíkyé. Delo buluke simang aríe teyongpe uusayé. Nolum itung-iréla, buluke inam legape ngo bulum nyokyin moyéku.

²¹“E asi-among kídía, peso yimapeka; delokke ayanpe ashéng langkuka. Legade, RUUTUM bí noluke legape gairuna atoko ibito.

²²Simon-sili kídía, peso yimapeka; kapeila yiibe lotta kídíe nesi-neyang kakaku. Esing kídíe ayé éngkaku. Onggur ane kídíe lang, donam pik ane kídíe alum-asa yimape ayé ébikaku.

²³“E Jayonke ami kídía, ashéng langkuka; kapeila bí nolum kaabom dola, pedongem lobolo omoyéku, delokke dígín-díyupe pedong moodíeme kayar moyéku.

²⁴“Kiipar kídílo dolot ípename bojéko kayéku, delokke onggur ayé kétpomlo alange ngatbope lenyéku.

²⁵Ngokke pemír maglíngem melíkla, ingkona dítak kídí lodí, noluke ali-ayé kídíem doyin bitone, deke delokke nyokkana adumem, ngo apíí-píílí dokupe ruubiyéku.

²⁶“Delo nolu aang píípe dopa-tíípa langkula, noluke legape irisinyo agérem ibikuna noluke Shédíme nolu yidge yéku. Ngok ami kídíe edílokom annying yimayé.

²⁷Delo nolu, ngo Israel aralo duumín gedung, ngo noluke Shédí RUUTUM bí, ngok kékonlo anguyang Shédí kamang, emla kényin yéku. Ngok ami kídíe edílokom annying yimayé.”

²⁸Méélamlo, tani takamlo, ngokke aidem purlíkyé. Noluke ome-oo kídíe kaalu-kangor agomem poyé. Noluke mijing-ejo kídíe immang mayé, delokke yaamé koo kídíe kaarí-kaanyo kídíem kaayé.

²⁹Mime-milope ngom agér ibina kídí takamlo, delo longe kídí delo, ngok aidem purlíkyé.

³⁰Ngo irisinyoem taleng telolang tani among so lengkanyé. Delo iyyie, eme, delokke míkkíe uusala iyé.

³¹Doonyiem kaamo moyéku, delokke pooloem iyyi kísa líímoyé. Dekedem reyub runam, RUUTUM ke botteruna longe píímang adape iyé.

³²Delo RUUTUM kíng igul kola kumsuna ami takamem igulyé. Kapeila RUUTUM ke tomsi sunam, lapeknam ami aralok, RUUTUM ke agí posutonam agom supe, Jayon Díítum lolang Jirusalem lo, ipítname kayé.