Read Alladian AMOS 1 Bible Online

AMOS 1 - Alladian bible

AMOS 1

¹Sikesi Tekoa doolung lokke mér kaabomna konpe ina Amos ke agom kídíe. Moton-taron lok taknyi kerape Judah lo Ujjiah, delokke Israel lo Joash ke oo Jeroboam ke roja dobom duem, Israel legangem Shédí bí Amos me lengkanto.

²Amos bí poto: “RUUTUM bí Jayon Dííte loge ngírdung; delokke bík agomem Jirusalem lok ludung; mér kaabomna kídíke among kídíe rukkai, delokke Karmel dííte lokke nesi-neyange sankai.”

³RUUTUM bí sikepe podung, “Damaskas ami kídíe imemem, ikup-ilat kolok ngo ngok ajéng lengket em delokke laapak kumayé; kapeila bulu Gilead em yagorupe iré-sinyoto.

⁴Dekepeila ngo Hajael ke ekumlo emem melíkyé, delokke Ben-Hadad rojake líísak duupomem guletyé.

⁵Ngo Damaskas lok etor yabgo kídíem bénpak biyé, delokke Aben Yiibelo duuna kídíem lang Betheden em ruutum bomnem laapakyé. Siria ami kídíem Kir amonglo umla bomyéku.”

⁶RUUTUM bí sikepe podung, “Gaja ami kídíe imem ayar kolok ngo bulum irééyé, kapeila bulu moole-moolelok amiem umla pakbope Edomlo kolíkto.

⁷Dekepeila ngo Gaja lok luune yabgo etorlo eme melíkla, líísak duupom kídíem gupak yinmoyé.

⁸Ashdod lokke lang Ashkelon luune lokke ruutum bomna kídíem ngo laapakyé. Ngo Ekron luune em ajéng lengketyé, delokke situ-singongna Philistain takame siyé.”

⁹RUUTUM bí sikepe podung, “Tur ami kídíke imem ayarnam legape ngo ngok ajéng lengket em delokke laapak kumayé; kapeila bulu moole-moolelok ami takamem monnyok kolo Edom amonglo bito, delokke buluke ajon daapongem kénsu yimang.

¹⁰Dekepeila ngo Turlok luune yabgo etorlo emem melíkla, delok líísak duupom kídíem gupak yinyé.”

¹¹RUUTUM bí sikepe podung, “Edom ami kídíke imem ayarnam legape, ngo ngok ajéng lengket em delokke laapak kumayé; kapeila bí bík Israel bíro kídarem yoksa lok monbomla, bulum atí ayang lengkan sumato. Buluke marlíngde marrí kaimang, delokke bulu míímap sukumang.

¹²Dekepeila ngo Teman luunelo eme melíkyé, delokke Bojrah lok líísak duupom kídíem gupak yinyé.”

¹³RUUTUM bí sikepe podung, “Ammon ami kídí lok imem ayarnam legape, ngo ngok ajéng lengket em laapak kumayé; kapeila buluke among yéta laatempe mimak ikolo Gilead lok nganga gena mime kídíem akii joksalto.

¹⁴Dekepeila ngo Rabbah lok luune yabgo etorlo eme melíkla delokke líísak duupom kídíem gupak yinyé. Delokrongem delo mimak longe delo ngomyé, delokke gumnam-asar kísa mimak de iyé.

¹⁵Delokke buluke roja elang bík oo kídíe, monnyokko lo gíyé.”