Read Alladian AMOS 2 Bible Online

AMOS 2 - Alladian bible

AMOS 2

¹RUUTUMbí sikepe podung, “Moab ami kídíke imem ayarnam legape, ngo ngok ajéng lengket em delokke laapak kumayé; kapeila bulu Edomlok roja alongem metpipe idope romto.

²Ngo Moab teyolo emem melíkyé, delokke Kerioth lok líísak duupom kídíem gupakyé. Moab ami kídíe mimak idungem sipaying kídíke ngomdud loklang bikul tapung adud kídílok siyé.

³Ngo Moab lok ruutum emlang delokke yégebona takamem petyé.”

⁴RUUTUMbí sikepe podung, “Judah ami kídí lokke imem ayarnam legape ngo ngok ajéng lengketem delokke laapak kumayé; kapeila bulu RUUTUM ke ayonem bommato, delokke buluke menam agome bulum imem mola, bulum buku gíko méélamlo gímín moto.

⁵Dekepe ila ngo Judah teyolo emem melíkyé, delokke de Jirusalem lokke líísak duupomem gupakyé.”

⁶RUUTUM bí sikepe podung, “Israelke imem ayarnam legape, ngo ngok ajéng lengketem delokke laapak kumayé; kapeila bulu aina amiem baldín legape, delokke opanem leyuk pumsu kope koto.

⁷Bulu demullo opan atugem tujém líkdung, delokke itung-irénam em jonna kebang em baabimang. Delokke ue lang abue mime atello gído, dekepe ila ngok deena amínem belum mokai.

⁸Bulu kumsuko takam runggulo bondokpe opanlok laanam egelo ipke dung, delokke buluke Shédíke ekumlo bulu ami kídí lok ajéngpe laanam apongem tííbo sudung.

⁹“Ngo buluke keralo Amorit em petpakto. Bí bodonge sidar esing kísa ituai, delokke ok esing kísa toltuai; idolateng ngo bík ayém teyolok ipakto, delokke bík appírem rumkílok gurpakto.

¹⁰Delokke ngo nolum Ijipt among lokke laalen toku, delokke takying appi kokai nolum yépol amolok Amorit amongem bomdokupe gíboto.

¹¹Delokke ngo noluke oo kídílok polu-poorna miripe idope, delokke yaamé kídílok Najiritpe idope ullento. Si aro manía, E Israel kídía? RUUTUM bí podung.

¹²Idola nolu Najirit kídíem apong tíímoto; delokke polu-poorna miri kídíem polu-poor poma dope lutumto.

¹³Kaatola supak ngo nolum ali-ayé bíísétpe gena gooru-gaari loojépnam kísape nolum loojétyé.

¹⁴Delok legape dukdukne teng dukpí sumayé, delokke ralne teng bík ralname kaimayé, miga-miram kídí eteng agíem ipítsula yimayé.

¹⁵Iyyi epuk bomnete dakla yimayé; delokke dukdukne dukpí sumayé, delokke guré dugbom neteng agí turnamem dukpí sulamayé.

¹⁶Delokke migang-miram kídí aralok aapí miram yalumna ete delo longe delo agíke gíníng-yoksa kídíem yoppakla duggeyéku.” RUUTUM bí podung.