Read Alladian AMOS 3 Bible Online

AMOS 3 - Alladian bible

AMOS 3

¹Tattola sim agom kídí sim, E Ijipt lok laalen kunam takam Israel ami kídar, RUUTUM bí nolum podung:

²“Tani among sokke opín takam aralok ngo nolum petom kénto, delokke ayato. Deke legape noluke imemde botterunape ikai, noluke imemnam legape ngo nolum itung-iréyé.”

³Lekope tolík bosumape midum annyide gíbosula yénía?

⁴Myomure dopenamem paamape moonamlo ngíryénía?

⁵Pettang etkude onyo líkmape batyénía?

⁶Luunelo mimak tapungem mutmílo ami kídíe peso mayénía?

⁷Shédí bí edíloteng bíkke ipe míínamem bík béérang miri polu-poorna kídíem pokan sumape supla imang.

⁸Myomure ngíryém sékoda pesomayén? Shédí bí políkyém sékoda polu-poor mayén?

⁹Ashdod, delokke Ijipt roja duupom kídílo duunem pogong langka: “Samari em dunggoona dííte kídílo nolu aadum sulangka, delokke delo edítna bottena ebíne kadun, delokke edítna atímana agérem ibo sudun dem kaatola.”

¹⁰RUUTUM bí podung, “Séko buludí monam-díínam loklang pyoonamlok buluke duupomem leebíng sudung kudín, bulu aina agér gérnamem kénmang.

¹¹Delok legape Shédí bí podung amongem togongla duubom pena miruko kayé; delokke bí buluke ralnamem dírpakyé, delokke buluke dungkoem aimape ibiyé.”

¹²RUUTUM bí sikepe podung: “Kape kísa mér kaabomne myomur nappang lok ale annyi mangkom nyorung dongongko laalen dungkudí; deke kísa Samarilo ketkeng paleng kéényulo duuna, delokke Damaskaslo ketpu gadilo ketna Israel ami kídíem anyongoko laalen yéku.”

¹³“Tattola, delokke Jakobke ekum erangem lutor tola,” emla RUUTUM Ralya yalumna Shédí bí podung.

¹⁴“Delo longe delo edílo ngo Israel kídílok imem em ajéng lengket yédí, delo ngo Bethel lok runggu kídarem bénpakyé. Delokke runggu delokke areng kídarde dírla, amonglo oletyé.

¹⁵Delokke ngo dígínlo dungkeng ekum emlang lobolo dungkeng ekumem bénpakyé; delokke sita arenglok monam ekum kídíe apit-ayit iyin yéku, delokke bottena ekum kídídem nyokmoyéku,” RUUTUM bí podung.