Read Alladian AMOS 4 Bible Online

AMOS 4 - Alladian bible

AMOS 4

¹Agom sim tattola, Samari díítelo yéna Bashan lokke gooru-rune kísa dongel suna mime kídar, séko buludí opanem iréédune, pííram-samona kídíem tujém dune, delokke agí milo kídíem apong koyarna kídía.

²Shédí bí bík deena amínlok pélík sula podung, “Nolume bulu arem raké kídílok sobom díku longe kídíe aayé; nolu takame gakarlo kéélíknam engo kísa iyinyé.

³Delo nolum anín yalumna bénna yabgolok joopakla yoppak yéku.”

⁴Ralyayalumna RUUTUM bí podung, “Israel lok ami kídara, nolu paab iperu mílo Bethel lokke deena mooloplo gíla paab itola! Noluke ralnam takamlok Gilgal lo gíla paab itola! Noluk ipak ilík penam taro kídíem rodípe bomatola, delokke noluke íying sanpegem longum méélam takamlo bomatola.

⁵Siiyé líknam ettíng em Shédíme yitge amanpe bitola, delokke apek aman kídí bomanam legape míngkím sutola! Sikena atí kídar emmin nolu ipe erdune.

⁶“Ngomin dírí-kenoem noluke luune takamlo bomane, idolate nolu ngokkíng aalat sukumang.

⁷Ngo pedongem ali-ayé teyolo noluke míído pagem omomane. Ngo luune akonlo pedongem melík bine, delokke moole akonlo melík bimane. Arík akonlo pedonge oto, idola arík konde rukkai.

⁸Asi tíílíng lok ralnam kaimala, deddína luune lokke ami kídare, asi paayé emla míínam suko doolung kolo gíto, idola deloteng asie pííramto. Dekepe ilateng nolu ngokkíng aalat sukumang.

⁹“Ngo botteruna pamremona asar emteng noluke ali-ayée san-gedope melíkto. Pemír kídíe noluke arígem, delokke onggur ane kídíem, tapang esing kídíem, delokke olib ane kídíem doyin bito. Idolate, nolu ngokkíng aalat sukumang.

¹⁰“Ngo noluke teyonglo Ijipt amonglo ngok kilii-ramli melík tuanam kísana kiliiko melíkto. Ngo mimaklo noluke yaamé kídíem petto, delokke guré kídíem laayin bito. Ngo noluke nyobung kídíem simang namsingem noluke notko duupomlo namdope ilíkto. Idolateng nolu ngokkíng aalat sukumang.

¹¹“Ngo noluke ayokon amiem Sodom emlang Gomorrah em petnam kísape petto. Nolu simape duuna kídíe eme romko lok laapít kunam asék kísa idung. Dekepe ilateng nolu ngokkíng aalat sukumang,” emla RUUTUM bí podung.

¹²“Delok legape, Israel ami kídara, ngo nolum ingééyéku. Delokke ngo nolum ingéé kupenam legape ngok íngkí-bengkí penamem duuru sulangka!”

¹³Shédíbí dííte kídíem, delokke asarem ruulenne. Bík míínamem taniem bí kénmone; bí longem yohpe batmo dungku. Bí among sokke kedon yalumna kídílo gídung. Si bíkke amíne: RUUTUM Ralyayalumna Shédí!