Read Alladian AMOS 5 Bible Online

AMOS 5 - Alladian bible

AMOS 5

¹E Israel ami kídara, noluke teyolo ngokke pengé-ngénam sim tattola:

²“Milo kénkímana mimum Israel bí oletkai. Lekoda gerep layimadope! Mepakto agí amonglo, sékote bím gagrep langku madope.”

³RUUTUM Shédí bí podung, “Israel lok luunekone éjarko mimaklo maglíngem melíkto, idola língko petomko aalat sudoku; luune kon kone língkoko melíkto, idola íying petomko aalat sudoku.”

⁴RUUTUM bí sikepe Israel ami kídíem podung, “Ngokkíng aalangka, delo nolu turyé.

⁵Nolu Beershebalo kumsukape gímapeka. Ngom Bethello matamapeka; Bethel e nyokgítyé. Gilgal loteng gímapeka, kapeila sok ami kídarem arorupe monnyokyé.”

⁶RUUTUM kelo gílangka, delo nolu turyé. Nolu gímamílo, bí eme gunam kísa Israel ami teyolo guyé. Emede Bethel ami kídarem gupakyé, delokke séko teng dem imit lamayé.

⁷E aroem lupella, ami kídarem buluke paadongem paamomape yadna kídara, nolu nyokdak.

⁸RUUTUM bí takar kídíem píne, Taatum Lepyo melang Gatbung Gattokme bí píto. Bí kaamo rurugem longe angunpe imokune, delokke longem kaamope imokune. Bí siyéng asiem gogla among tabung so purlíkne. Bík amíne RUUTUM.

⁹Bí tolna-ralnem, delokke buluke duupomem bénpakne.

¹⁰Nolu kebang ekumlo, jonmana agérem akna, delokke apíng rupe aro agom ponem kangkidung.

¹¹Nolu opanem irééla, buluke ali-ayéem langkamto. Delok legape nolu kamporupe elínglok gatla, ekum mosunam delo duupa mayé, delokke noluke gairupe onggur ane lenam delok nolu onggur alangem tíípa mayé.

¹²Kapeila edít kodín nolu imem tune, delokke edítko bottepe nolu imem tune dem ngo kéndung. Nolu aina amiem iréédung, sépsu-paasu dung, delokke opan kídíem kebang ekumlo jonna kebangem paamomang.

¹³Dekepeila sikena atímana moodílo asoope duunam de kénname.

¹⁴Nolu turla duudope, ainamem matalangka, atímanem mamapeka. Delo noluke bím toge sunampe, RUUTUM Maglíngke Shédíbí nolukíng duumín geyé.

¹⁵Atímanem kangki langka, ainem ayalangka, delokke kebang ekumlo jonna kebang agomem duulík molangka. RUUTUM Maglíngke Shédíbí, dekepe ikolok sok among sokke turla duudung adana buluke teyolo, ayang langkukom iyépe.

¹⁶Delok legape RUUTUM Maglíngke Shédíbí podung, “Luune sokke bene-bepong takamlo kapnam-ríínam elang ankí-kenoe kayé. Arík ina kídar emteng abíd kabbipena kídarlo lekope kapnam-ríínam pengéem ngébo sudope tomyé.

¹⁷Onggur ríkséng kídílo kapnam-ríínam mílíe iyé. Sike takam si iyé, kapeila ngo nolum ingéépe aadak.” RUUTUM bí sikepe poto.

¹⁸RUUTUM ke longedem séko buludí toyala duudune de edítko pesorunam longepe iyén! De longe de nokke legape ainape iyénía? De longe de noluke legape kaamoruna longe kope iyé, delokke angun mayé.

¹⁹Ami kone myomurem duksi gene situm ko kaarík sunam kísa, demangkom ekumlo gílang kula suppilo tabda sula daknem tabíe reknam kísa iyé.

²⁰RUUTUMke longede angunem bomang mape kaamo uksingem bomayé, delokke de longe de ruage ila, angun kamayé.

²¹RUUTUM bí podung, “Ngo noluke dormo adeng-ape kídí dem kangkidung, delokke noluke gídumsula ííl-ekong inam dem ngo ashébom mang.

²²Edílo nolu ngom romnam aman, delokke ali-ayé amanem boma biyédín, ngo dekedem torík sumayé; Noluke ngom amanpe bipe ngelmonam taro kídí dem ngo torík sumayé.

²³Noluke tatyém mona miri ngiitom kídí dem luyima; ngo noluke harp tapung kídíem batnam dem tatlímang.

²⁴Delok ayanpe jonna kebangem roojik kísa tokmotoka, delokke ooyimana korong kísa arolok ainamem biimotoka.

²⁵“E Israel ami kídara, takying appiko nolum ngokke yépol mooruk amonglo gíbodoem ipak emla aman kídíem ngo nolukíng komang.

²⁶Idola supak, nolu noluke roja uyu Sakkuth ke mimangem, delokke takar uyu Kaiwan me kumgape, noluke dem mimang kídídem

²⁷ngokke nolum Damaskas kékonlo monnyokyém, joobompe aiyé,” emla Maglíngke Shédí emla amín gena RUUTUM bí podung.