Read Alladian AMOS 6 Bible Online

AMOS 6 - Alladian bible

AMOS 6

¹Ami takamke igul koda sukeng bottena Israel opínke, mite-migom kídía, delokke Samarilo dengompe duuna, delokke Jayonlo eetet-monetpe duuna kídí, nolukepe pesorunam longepe iyéku!

²Gíla doolung bottena Kalneh me kaalangka, delok rongem bottena doolung Hamath lo gítoka, delokke Philistain ami lokke Gath luune belo kanggotoka. Bulu Judah emlang Israel yétaem aiyadunía? Buluke among yétae nolukem botte yadun?

³Nyokdí longeko píídak emnamem nolu aro míímato, idola noluke inam agér si dem longe dem moonín momodung.

⁴Edítko peso-yirínampe de noluke legape iyén, séko buludí remyakna ketkeng lo agíem yikjon sula, mér sobén bénbamlok domanla duudune.

⁵Nolu Dabid ke kísa miri atlenla, dem harp tapung lok luman lídung.

⁶Nolu bati kídílo bíípe apongem tíídung, delokke namporuna téllok molsu dung, idola Israel ke nyoknam legape ankímang.

⁷Delok legape nolum kerayalumpe monnyokyé, delokke noluke doman-tíímane kaimayé.

⁸Ruutum Shédí bí agílok pésudola lutordung: “Ngo Israelke míngkím sunamem kaalímang; ngo buluke gairuna dungko dakko kídídem kaapakdung. Ngo buluke ruutum leríng luunem lang delokke takam ekurangem miruem bipakyé.”

⁹Delo ami íyingko erang atello duuyémílo, bulu siyinyé.

¹⁰Sina ami delok edung erangko, simang yukolo yubona de simang amíl dem ekum delok laalenyé. Bí ekum delo situng-singong dem gogla, “Nokkíng ako duumín genako kadunía?” emla ííyé. Delo poyan sunako, “Ma kamang,” emyé; Delo edung erang amide poyé, “Asoope duulangka! Ngolu RUUTUM ke amín petom emkom mínpe ansu lajuka.”

¹¹Edílo RUUTUM bí lulíg yédí, delo bottena delokke aména ekum takamem alop alop idope bénpakyé.

¹²Gurée língku-líraklo dukdunía? Tanie asi siyénglo goorulok aal gídunía? Idola nolu deepít em díknape imoto, delokke ainamem atímanampe imoto.

¹³Nolu Lodebar luune me langkam namem míngkím sudung. “Karnaim em laala dope ngolu ralnam kato,” emla koyit sudung.

¹⁴RUUTUM Maglíngke Shédí agíe podung, “Israel ami kídara, ngo mibo maglíngko noluke amongem langkam dope melíkyé. Delo bulu nolum Hamath gíyon suko lokke ila Arabah Yiibe loope irééyé.”