Read Alladian AMOS 9 Bible Online

AMOS 9 - Alladian bible

AMOS 9

¹Ngo RUUTUMme runggu abedelo dagdupe kaato. Bí ukum líkto: “Kumkeng ekum míílongem, tabunge epín dope, bottepe demlangka. Dem bentu mola ami atuk takamlo olík motoka. Delok turkína abíd em ngo mimaklo petyinyé. Sékokom dugge lamayé; sékokom dukpí sula mayé.

²Bulu Sheol belo arung konggela dungge dokom, delok ngo bulum umyéku. Bulu teyong amonglo rengge dokom, delok ngo bulum laalet yéku.

³Bulu Karmel Dííte ponyuklo ruge dokom, delok ngo bulum matala, bulum umyéku. Bulu asi siyéng rumkíyalum belo ruge dokom, ngo siyéng bírí-bídongem lulígla bulum rekmoyé.

⁴Bulu miru kídíke alaglo pakne-pakbope gíyémílo, ngo bulume petyin dope lulígyé. Ngo bulum nyokyinmope mínggap aloodung, delokke bulum igulpe míímang.”

⁵RUUTUM Maglíngke Shédí amongem uktetdung, delokke amonge tondung; delo duuna takame ankí-adír dung. Nayil korong kísa tani among takame pungon pala omap dungku.

⁶RUUTUM bík ekumem teyong among kídílo modung, delokke among teyolo bí taleng míílongem melíkdung. Bí siyéng lok asiem gogla, tani amonglo purlíkdung. Bík amíne RUUTUM!

⁷RUUTUM bí podung, “E Israel ami kídara, nolu ngok legape Sudanlok ami kísa dung. Ngo Philistain kídíem Kret among loge, delokke Siria kídíem Kir loge, nolum Ijiptlok laalen kunam kísa laalen toku.

⁸Ngo Ruutum Shédí, paab itína Israel among yéta sim kaadung, delokke ngo Israel among sim tani among sok nyokyin moyé. Idola ngo Jakobke otíng-oyin takamem nyokyin momayé.

⁹“Ngo Israel ami kídarem amonge epínyém ampile dílla oletnam kísa olet modope lulígyé. Loorímana ami kídarem ipak dope ngo bulum among takamlo epín moyé.

¹⁰Ngok ami aralo paab gena tabunge mimaklo silíkyé. Séko bulu, ‘Atímane ngolum ikum mayé, demangkom ríksumayé,’ emla podudí, bulum petyinyé.”

¹¹“Amonglo doojéngna bénna ekum kísana Dabidke among yétaem ngokke mosing díku longeko píídak. Ngo delokke etor suppi kídarem mosi-momola edíímoyéku. Ngo dem morep langkula, kerang kísa imoyéku.

¹²Dekepeila Israel lok ami kídarde Edomlok singong emlang, leko ngokkepe ituana among takamem laalat suyéku,” emla sim takam sim imokupena RUUTUM bí podung.

¹³“Kaatola longe kídíe píídak,” emla RUUTUM bí podung, “delo ali-ayé kídíe gadsiidíem pemílo siiduk yayé, delokke grébem alangpe monamem pemílo onggur ane siiduk yayé. Dííte kídílok tiina alange dílenyé, delokke díítum kídílok dekede biitokyé.

¹⁴Ngo ngok ami kídarem buluke amonglo laalat sulík yéku. Bulu buluke nyokna luune kídarem lekoda molangkula delo duuyéku; bulu onggur ane kídíem lelangkula, delok alangem tííyéku. Bulu arík-anam ilangkula, ilík namem doyéku.

¹⁵Ngo ngokke ami kídíem ngokke bulum tolíksunam amonglo lelíkyé, delokke bulum lekoda puulat kuyimayé.” RUUTUM noluke Shédí bí sim podung.