Read Alladian OBADIAH 1 Bible Online

OBADIAH 1 - Alladian bible

OBADIAH 1

¹Edom among teyolo Shédíke ponamem Obadiahke polu-poornam kídíe: Ngolu RUUTUM kelok agom lulíkko tatto. Kotoki konem opín-buang takamlo lulíkla, sim agom kídí sim lugong moto: “Edom me mimak ikape, kaju ngolu takam leemola, gerep laju!”

²“Edom nome opín-buang aralok, aména opín kope imoyéku. Delokke nome daadi takame kaapak yéku.

³Nokke aapí míngkímde nome yadsu yéku. No lííreng teyolo duudung emla, nok ekumem dííte ponyuklo motung emla, no agíe sipe míísudung, ‘Sékoda ngome yiibe among belo píktok layéne?’

⁴No pemí kísa deesa dakkom, takar kídílo ekum molík dokom, deke deloge ngo nom laatok yéku, sikepe RUUTUM bí podung.”

⁵“Edílo milí-hodong doppyoone, yuem pyoongang yédí, delo buluke míínam atoem min laadune. Onggur ayé pílnete, pílngo-pílsong kadope pílmanía?

⁶Esauke otíng-oyin kídía, noluke ekuserangem língkut-líílut yéku.

⁷Nok bonying ajon kídíe nome yatlang kula, nome ikum langkula, among rísu kékon lope nolume monpakyé. Nokke apimem dona kídíe, nome baddo kupe egum-edaem golík kaku. Idola dekeme no kangkén sumayé.”

⁸RUUTUMbí sipe podung: “Delo longe delo Edomke, kebang lujina ami kídíem, Esauke Díítelo duuna, kénna-paana miro kídíem, ngo nyokyin moma yénía?

⁹E Teman, nokke miram kídíe, peso along geyé, delokke Esauke Díítelo duuna mipilem paka-níkkayé.”

¹⁰“Nokke bíro Jakobke teyolo, milí-hodong atímape nokke ibomnam legape, nome annyingem polum sumola, agín legape nome nyokyar moyé.

¹¹Ingkona longelo mibo-miying kídíe, Jirusalem ke yapgo eyabem bénala, Jirusalemke legape gíngkí sula, ekuserang tabungem giibom langkula itodí, delo longe delo no asoope mootelo dakla, mibo-miying ami kísa kaapu-kaalé peela dakto.

¹²No, nokke bíro lokke gérmaduem, bíme kaapu-kaaléla, kaajétla, Judah ami kídarke nyokdo longelo ashéla, buluke adír paadungem ngilkala ipe manamíai.

¹³Buluke ankí-kenoduem, bulum kaapu-kaaléla, ngokke ami kídíke doolunglo aape manamíai. Buluke atung-aréépe yédo delo, no buluke ekurangem língaang pemanamíai.

¹⁴No bedang gírík sukolo, dagbom duula, duggena kídíem paríkla, umríkla, mirulo melíkla, buluke adír longe delo ipe manamíai.”

¹⁵“Takam opín-buang legape RUUTUM ke longe píínínkai. Edom no kapekísa itodí, dekepakpe nomkom iyan suyéku. Nokke agér itonam edoe, nokke dumpolo aalat suyéku.

¹⁶No kapekísa ngokke deena díítumloa tíítodí, dekepakpe opín-buang tabunge tííyéku. Bulu tíngkí mana kísa tíídan tetela, tíítí ayar bomyéku.”

¹⁷“Idola Jayon Díítumlo ipítname kayé, de deena yékolpe, delokke Jakobke otíng-oyin kídíe, buluke atek ekurang kísape, asi among dem yége-dagge yéku.

¹⁸Jakob kela Josephke otíng-oyinde eme meyo kísape doryé. Esauke otíng oyin dem, nyorugem gunam kísa, bulum nyokyin moyéku. Esauke otíng-oyine turna kayimayé. RUUTUMbí sipe podung.

¹⁹Negeb among lokke ami kídíe, Esauke dííte kídíem duubom yéku. Dííte lebelo duuna kídíe, Philistain amongem yébom yéku. Israel kídíe Ephraim kelang Samarike, arík kídíem ibom yéku, delokke Benjamin amie Gilead amongem atope ibom yéku.

²⁰Monnyok tonam Israel amie dumsu langkula, aalat sulang kula Phoenisia amongem, línggíngke Jarephat among lope yébom yéku. Sepharadlo monnyokla duuna Jirusalemke ami kídíe, Negeb doolung kídíem yébom yéku.

²¹Jayon Díítumlo ipítnam ami kídíe, Esauke Díítelo saala ruutum bomyéku. Deke delokke yéta kídíde RUUTUM kepe iyéku.”