Read Alladian JONAH 2 Bible Online

JONAH 2 - Alladian bible

JONAH 2

¹Siyéng asi buying aralo, engo akii aralo duudola Jonahbí sikepe RUUTUM bíkke Shédíme kumto.

²“E RUUTUM, nom ngokke duk-adírdoem gogto, delo no tatbito. Sinake doopom sutkin kédéng sokkai igul dope ngo gogto, delokke no ngok adudem tatdung.

³Kapeila no ngom siyéng asi eerí-ríkin, layi-langkik ina rumkíng belokai yoplíkto; delo ngom asie eelum bomkai, delokke nokke ralna siyéng silunge ngome eejém bomkai.

⁴Delo ngo posuto, ‘Ngome nok keralok nyok mokai; kape kísai ngo lekoda nokke deena Kumkeng Ekum dem kaada suyékune?’

⁵Asie ngom bítbomla, ngo delo jiilum nyokto. Siyéng asie ngom eelup nyokto, delo asi tapínge ngok dumpongem, yétlum nyokto.

⁶Ngo dííte kobung aralo onyok líkto, delo ngo lenpeko kaimangkai, idokom RUUTUM ngok Shédí no, kobung aralok ngom turdokupe laalen toku.

⁷Edílo ngok yéname simang gumgo lok, batlen tokune, delo RUUTUMA nom ngo kumto, delo nokke deena Kumkeng Ekumlo, no ngok kumnamem tatbito.

⁸Séko bulu aid kamana mimangem kumdudí, bulu nome kumsu penamem mitpan sukai.

⁹Idola ngo nom yitgela miri luyé, nom ngo ipak aman biyé; delokke ngo toge sunamem iyé. Mopít kunamem RUUTUM kelok paadung!”

¹⁰Delo RUUTUM bí engo dem Jonahme moopílo badlen dokupe lulígla, Jonahme moopílo engode badlen toku.