Read Alladian SANNAM 12 Bible Online

SANNAM 12 - Alladian bible

SANNAM 12

¹Mosi bí Kushit mimeko bomrodem Miriam lang Aaron bínyi deme akla Mosi me lukang lento.

²Bínyi lukadola poto, “RUUTUM bí Mosi petom kíngía lupo sudune? Ngolu kííte bí luposumanía?” Deme RUUTUM bí tatto.

³Tani gíída sokke tani aralo Mosi bí remel yalumna amikuai.

⁴Menang asak RUUTUM bí Mosi melang Aaronme delokke Miriamme, “Nolu angume RUUTUM ke Tombulo aalangka,” emla tomto. Delo bulu angumde aabito.

⁵RUUTUM bí delo doomug adong delo oila, RUUTUM ke Tombu lamgé delo dagdola Aaron melang Miriam me gogto. Edílo bínyi gíang todí,

⁶delo bínyim bí poto, “Ngok agom ponamem nonyi tatgap langka. Edílo noluke aralo RUUTUM ke kaaluna miriko kayédí, ngo bím kaarí-kaanyo kídílok lengkan sudung delokke ngo bím immang kídílo pobosudung.

⁷Idola ngokke agér ibina Mosi kelodan sikepe imang. Bí ngok ekum lokke ami takam aralo míngke suyaname.

⁸Bím ngok gíngkí agompe pomape, deenampe mikmo gerík sudola, lupo-manmo ibosudung. Bí RUUTUM ke moi-muangem kaapadung. Dekepe ikolo, ngokke agér ibina Mosike mirupe lugela, nonyi pesomanía?”

⁹RUUTUM bí bínyik teyolo marla gítoku.

¹⁰Edílo doomug adongde Tombu teyo delok gyabín tokudí, delo tapam yasipe tííde, Miriam kíng kato. Aaron bí delo Miriam kíng kaasutoname, bím tííd gedupe kaato.

¹¹Kaala bí Mosime, “E ngok ruutum, ngonyike bopolrupe paab inam sim ngonyik teyolo melík mayika.

¹²Bíme amíl arotkone yaadope olennam orí kísape imomayika,” emla roguto.

¹³Delo Mosi bí RUUTUM kíng “E Shédía, ayala bím ipílangkuka,” emla kabbisuto.

¹⁴RUUTUM bí Mosi me poyan suto, “Bíkke abue, bík mikmolo takil suklum tuamílo, bí longe kíníd kokai belumla yémayénía? Longe kínídko bím notko luyulo tumpotoka. Delok rongem bím notkolo langa ladoku.”

¹⁵Depeila Miriam me longe kínídko notko luyulo tumpoto. Bíme langaang kumang adape ami kídíe byakmato.

¹⁶Dekepe irodem ami kídíde Hajeroth delok byaklen langkula yépol mooruk Paranlo notkoem itoku.