Read Alladian SANNAM 15 Bible Online

SANNAM 15 - Alladian bible

SANNAM 15

¹RUUTUM bí Mosime poto,

²“Israel kídíem pogapla sim polangka: Ngokke nolum ekumpe binam among delo noluke aarongem,

³adeng-ape aman dokom, agí mínggosu aman dokom, atekpe pésunam legang dokom, noluke RUUTUM ke airupe míínam, emelok romlíknam aríkana aman kídíem rubam lok demangkom mér delokke sobén alunglok bomayémílo,

⁴dekepe bomana amide litar atel kope télko delo ali-ayé amanpe bomtak sulangka.

⁵Romnam amanpe demangkom ipakpe bomanam mér miyong delo tíínam amanpe litar atel kope onggur alang lok bomalangka.

⁶Edílo mérko amanpe biyédí, delo ali-ayé amanpe téllok litar kola arotko, kilogram annyina ettínglo hoyélsula bilangka.

⁷Sok teyong so litar kola arotkope onggur alang lok bitem líklangka, sike sokke ipak aman arídem RUUTUM bí airupe míídung.

⁸Edílo nolu rupangko romnam amanpe demangkom atekpe pésunam ipakpe demangkom ashéng amanpe RUUTUM kepe irung lenyédí,

⁹delo rupang delo lekope ali-ayé amanpe téllok litar annyi kope ila deme kilogram angum píína ettíng kolo hoyél sula bomalangka.

¹⁰delokke tíínam amanpe litar annyiko onggur alang lok bomalangka. De RUUTUM ke airupe míínam, emelok romlíknam aríkana amane.

¹¹Sok akampe rupang miyong delo demangkom, mér miyong delo demangkom bénbo miyong delo ipe aido.

¹²Nolu edítko irung yédí, dekepe miyong delo ipe aido.

¹³“Israel iyyi sulok olennam miyongde, RUUTUM ke airupe míínam eme lok romlíknam amanem biyém ato-siro takamlo sikepe ipe aido.

¹⁴Angkupena siirum loope, RUUTUM ke airupe míínam emelok romlíknam amanem, noluke aralo duuna kone demangkom mibo-miying konete biyé mílo noluke bikor-biyor pakpe bimín gepe aido.

¹⁵Banggolo noluke idongem aipakpe bombo supe aido. Delokke sikepe mibo-miyinge imín gepe aido. Si siirum siirum loope iyar bompenam iyon idonge.

¹⁶Nolulang nolukelo duumín gena mibo-miyingde sim ayon atel simla idong atel sim iyar gepe aiyé.”

¹⁷RUUTUM bí Mosime poto,

¹⁸“Israel kídíem sim pogapla polangka. Edílo ngokke gíboko among delo nolu aayédí,

¹⁹delokke among delokke donamem dolen yédí. Delo RUUTUM kíng amanpe donam delok anyongkonem bilangka.

²⁰Kerayalumpe ímíknam donam delok apu-adenpe inam ettíngko dolot-tínggi amanpe bilangka.

²¹Angkupena siirum tabulo kerayalumpe ímíknam donam lok sim aman sim nolu RUUTUM kíng bilangka.

²²“Idola RUUTUM ke Mosi kíng lulígla binam idong kídí sim akone atí kénsumape igemape iyémílo,

²³delokke Mosi kíng RUUTUM ke lulígnam tabungem yépenamlo banggoe ige manamko kayémílo,

²⁴delokke dekepe imem inamem banggoe atí kénsumape inamko kayémílo, delo banggo tabungde, RUUTUM ke ashéng bomnam aríkana amanpe tíínam aman lokla ali-ayé amanlok delokke romnam amanpe rupangko, atlíknam iyon adongpe bomala amanpe ilík langka.

²⁵Israel banggo takamke legape miride deebín kunam agérem gérbope aido. Depe imílo bulum mesam yéku kapeila de iperung emla inammange, delok teyolo buluke imem legape emelok romlíknam amanem lang paab amanem bulu bomabito.

²⁶Israel banggo tabungem lang bulukíng duumín gena mibo-miying kídíem ayala mesamyé, kapeila iperung emla imanam imemlo takame imín gekai.

²⁷“Idola kénsumape amikone paab iyémílo, bí paab aman legape dítak atelna bénne bénbílko bomape aido.

²⁸Dekepe imemna bíkke paab legape miride deebín kunamem RUUTUM kelo ibipe aido. Depe imílo, bíkke legape deebín rongkuem, bíme ayangla mesamyé.

²⁹Israel iyyilok olen sunam dokom, mibo-miying dokom, sikepe iperung emla imanam paablo, si idong atel si akam pakpe duuyaryé.

³⁰“Idola, Israel iyyilok olen sunam dokom delokke mibo-miying dokom, sékodí iperung mííla ikí-teríla RUUTUMme bééyédí, dekena amiem agí ami konpe sanyi mapeka.

³¹Kapeila RUUTUM ke agomem bí míípakkai delokke bíkke lulígem arope betpakto. Dem amidem aropakpe agí ami konpe sanyi mapeka. Bík imeme agísulo duuyarmín geyé.”

³²Israel kídíke yépol mooruklo yégodungem, ami konem Sabbath longelo esing natadupe paato.

³³Séko buludí bíme esing natadupe kaatodí, bulu bíme Mosi kela Aaron ke kerang lolang Israel banggo keranglo aaboto.

³⁴Delo bím ekum pateklo tumpoto, kapeila bím kape imílodí emla bulu míngkén-míngo mato.

³⁵Delo RUUTUM bí Mosime, “De amide siperung aido, delokke doolung tabunge notko luyulo gíbola bím elíng lok gepetpe aido,” emla poto.

³⁶RUUTUM ke lulígnampe tabungde bím notko luyulo gíbola elíng lok gepetto.

³⁷RUUTUM bí Mosime poto,

³⁸“Israel kídíem pogapla sim polangka: angkupena siirum tabulo, noluke ege-galuk abe takamlo noméem ilíkla, nomé miyonglo yasanna enno nomolok ilík langka.

³⁹Nomé kídarde míípang sumokunamlo agér biyé. Edí-edílodí nolu dekedem kaasuyédí, delo ngokke lulíknam tabungem nolu míípang sula dekedem igeyé. Delo nolu agí aapí-aang kela amigke kaabo-mííbokolo yéla ngokke keralok gínyok kuna amipe imayé.

⁴⁰Delo nolu ngokke lulígnam takamem míípang sula, dekeme igela noluk RUUTUM kelo tolíksuna amipe iyé.

⁴¹Noluke Shédípe idope nolum Ijipt among lok laalenkuna, ngo mino RUUTUM noluke Shédí. Ngomino RUUTUM noluke Shédí bí.”