Read Alladian SANNAM 17 Bible Online

SANNAM 17 - Alladian bible

SANNAM 17

¹RUUTUM bí Mosime poto,

²“Israel, kídíke opín-buang miyong lokke miro kídílok banggén em laadum sula, banggén íying kolang annyiko nome bulu bidope emla Israel kídíem polangka. Delokke miyongke banggén delo buluke agí-agí amínem atlík sumolangka.

³Lebi opín delokke banggén delo Aaronke amínem atlík langka. Opín miyong lokke miro kídílo banggéne atelko iyé.

⁴Dekedem laala ngokke Tombulo bomala, ngokke nome kaarík suko Daapong Sonduk kerang delo melangka.

⁵Delo ngokke ulnam ami delokke banggénde ayin yinsayé. Dekepe ikolok Israel kídíke nok teyolo ebín-bíntí nameme ngo itumyé.”

⁶Deme Mosi bí Israel kídíem popa bilang kula bulu opín miyong lokke miro kídíde mipile bidum sula banggén íying kolang annyiko bito. Deke aradelo Aaronke banggén ete kato.

⁷Dem tabung dem Mosi bí laadum sula RUUTUM ke Tombu arang delokke Daapong Sonduk kerang delo meto.

⁸Longe kondem Mosi bí Tombu delo aadodem, Lebi opín ayanpe menam Aaronke banggénde ayin yinla, appun punla, minna badam ayéke ééto.

⁹Delo banggén tabung dem Mosi bomlen langkula Israel tabungem lengkanto. Bulu dekedem kaala agí-agí banggénem bomsutoku.

¹⁰RUUTUM bí Mosime poto, “Aaronke banggén dem Daapong Sonduk keralo melang kuka. Si Israel kídíke ebín-ebon mirupe emtínam em lengkannana iyodpe iyé. Si ngok teyolo buluke ebín-ebonpe man-yimadope iname, demamílo bulu siyé.”

¹¹RUUTUM ke Mosi me lulígnam agompe bí ibito.

¹²Israel kídíe Mosime poto, “Ngolu nyokkai, ngolu nyokkai, ngolu nyokkai.

¹³RUUTUM ke Tombu anínlo angkína mipil miyongde siyé. Ngolu tabunge siyin yédí?”