Read Alladian SANNAM 19 Bible Online

SANNAM 19 - Alladian bible

SANNAM 19

¹RUUTUM bí Mosi melang Aaronme poto,

²“RUUTUM ngokke lulígnam ayon lokke akone sipe idung: Edílote jungoli ilík kímanam delokke atí tarí-tape kamana delokke arí-ajok mana yalína rupangko nokkíng bomadope Israel kídíem polangka.

³Deme miri Eleajar me bilangka. Deme notko luyulo gíbola bíme pakape aido.

⁴Delo miri Eleajar bí agí alaglo iyyi ayoko bomla bíkke lakkéng delok lemkínídko RUUTUM ke Tombu kera danpe píkkat langka.

⁵Bíkke kaadungem, rupang demlang delokke akii-asalem ayoem, adínem delokke iyyiem romlangka.

⁶Delo miride sidar esing loklang hissoplok ayoko laala delokke lísana siipyaklok laala rupang romnam delo yoblík langka.

⁷Depe irongem miri bí agíem írsula asilo ege-galugem etbín sulangka. Depe irongem bí notkolo aala doku, idola adeng loope bí deemang poyé.

⁸Rupang dem rombínna ami deteng agíem asilo írsula, ege-galugem etbínsula ipe aido. Delok teyolo bíkom adeng loope deema poyé.

⁹“Deena amikone rupang delokke metbueme laadum sula dormo ayonlok notko luyu lokke deengko moolop kolo mekum langka. Dekedem, Israel daaponge, deebín-arbín sunana asipe mesiipe aido. De paab deemang lok deebín sukunane.

¹⁰Rupang delokke metbuem laadum suna ami bíte, agíem asilo írsula, ege-galugem etbínsula ipe aido. Bíteng adeng loope deemang poyé. Si Israel ami kepe lang duumíngena mibo-miying ami legape duuyarpena iyon idonge.

¹¹“Sékodí ami simangko ukkí yédí, bí longe kíníd loope deemayé.

¹²Bí longum nana longe delo lang longe kíníd nana longe delo deebín sunana asi delok deebín supe aido, delo bí deeyéku. Idola bí longum delo lang longe kíníd delo deebín sukumayémílo bí deengkumayé.

¹³Séko amiedí ami simangko ukkípala agíem deebín sukumape iyédí, bí RUUTUM ke Tombuem deemang modung. Deke amiem Israel aralo agí ami konpe sanyi mapeka. Kapeila bíkkíng deebín kuna asiem kungkat líktomang, depeila bí deemangkai delokke bík deemange bíkke sulo duusuyé.

¹⁴Amikone tombu aralo siyémílo, sim ayon sim ige langka: Dekepe idoem, tombu arang delo duuna delang tombu delo gíana amide longe kíníd kokai deemayé.

¹⁵Delok teyolo, pokap kamana edung, bayé, peking, gíri atí takam dekom deeyimayé.

¹⁶Séko amiedí gíída lamgélo yédungem, gíníng yoksalok mokanam simangko, demangkom agí sigosupe sisuna simangko, demangkom tani simang alongko demangkom ago ato-sirolo ukkí-mengkí yédí, bí longe kíníd loope deemayé.

¹⁷Depe deemang kana ami delokke legape, romtonam rupang yalína delokke deengkut kunana metbuem ayoko laala deme edung kolo dunlík pala delo deena asilok puryél sulíkpe aido.

¹⁸Delo dormo ayonlok deena amikone hissop asigko laala, asi delo nínyom líkpala tombu emlang delokke ekuserang takamlo píkkat goope aido. Delo duuna ami kídí teyong loteng depe píkkat goope aido. Delok teyolo de amide simang along ukkínem demangkom mokanam ami simangem demangkom agolo ukkí-mengkí goona ami teyolote píkkatpe aido.

¹⁹Dekepe deena amide deemana ami teyong delo longumnana longe delo lang kínídnana longe delo bí deemana amidem deebín bikupe aido. Dekepe deebín bikunam amide asilo írsula, agíke ege-galugem etbínsula ikupe aido. Depe irongkuem adeng danlo bí deeyéku.

²⁰Idola deemana amikone agísuem deebín sukumayémílo, bí RUUTUM ke Tombuem deemomayé delokke dekepe deemamonam legape bím Israel kídí gooralo ami akonpe sanyi kumapeka. Kapeila deebín kuna asiem bík teyolo píkkat líkmato, iname bí deena amipe imang.

²¹Si buluke legape duuyarna iyon idonge. Deebín sunana asiem píkkat líkgoona ami dete agí ege-galugem etbín supe aido. Séko amiedí deebín sunana asiem ukkíyédí de adeng loope deemayé.

²²Íngko ato-siroemdí deemana amie ukkíyéne dekede deeyi mayé, delokke dekem ukkínadete adeng loope deemape iyé.”