Read Alladian SANNAM 21 Bible Online

SANNAM 21 - Alladian bible

SANNAM 21

¹Kanaan among lokke sokko Negeblo duuna Arad lokke rojade, Atharim bedanglok Israel kídíe gísadung emnamem edílo tattodí, delo bí Israel kídíem mimakpe aabomla bulum ayokonem umto.

²Delo Israel kídíe RUUTUM kíng sim pésuto, “No sim ami kídar sim ngoluke alaglo melígla ngolum ikum moyémílo, sim ami kídí simla buluke doolung kídíem nokkíng tolíkla ngolu bulum apíírupe nyokyinmoyé.”

³Israel kídíke rogunam dem RUUTUM bí tatla buluke alaglo Kanaan kídíem melígla, bulumla buluke doolung kídí tabungem apíírupe nyokyinmoto. Depeila moolop delok amínem Hormah [9] emla mínto.

⁴Bulu Hor dííte lokke enlangkula Silíng Siyéng bedangpe Edomem bilgoola entoku. Idola ami kídíe entíng-gíting delo hakjém layimato.

⁵Bulu Shédíke mirolpe lang Mosike mirolpe agom-aange polenla poto, “Kape no ngolum yépol mooruk so sidope Ijipt lok gílen botokun? So atí dopenam apim kamang. Tíípenam asi kamang? Ngolu sikena loorímana donam sim belum kabong.”

⁶Delo RUUTUM bí asum-aar kana tabíem buluke arang delo melígto. Tabí kídarde ami kídíem rekla deddína Israel amie siyinkai.

⁷Delo ami kídíde Mosi kelo aala rogu sutoku, “RUUTUM ke mirol pelang nokke mirolpe ngolu agom-aang lula paab ito. RUUTUM bí tabí kídar sim ngoluke lok langgé dokupe RUUTUM kíng kumbi langka.” Depe rogu kolok Mosi bí ami kídí legape kumbito.

⁸RUUTUM bí Mosime poto, “No tabí mimangko píla deme kooré bodong nakolo tulík langka. Séko memdí tabíe rekyéne, bí deme kaasula turla yédope.”

⁹Depe ila Mosi bí pitollok tabí mimangko píla deme kooré bodong nakolo tulíkla ito. Delo edí-edílodí tabíe séko memdí rektodí, delo bí pitol tabí mimang dem kaasula turtoku.

¹⁰Israel kídíe endan tetela Oboth emkolo notko ito.

¹¹Oboth delokke byaklangkula doonyi sanggo danke Moab among keralo duuna yépol moorukke Iye-abarim emkolo notko itoku.

¹²Delokke byaklangkula Jered yiibe delo notko itoku.

¹³Delokke byaklen langkula Amorit kídíke rísulope kalíkna yépol mooruk among lokke Arnon robenglo notko itoku. (Arnonde Moab kídíke lang Amorit kídíke rísupe ito.)

¹⁴Dekepe ila RUUTUM ke mimak kitaplo sikepe podung, “Supha goorangke Waheb doolung, delo yiibe, delokke Arnon korong,

¹⁵sok ila Moab rísulope duulíkna yiibe etpange Ar doolung loope kalíkdung.”

¹⁶Delokke bulu byaklen langkula RUUTUM ke Mosime, “Ami kídídem dumsu moto. Ngo bulum asiem biyé,” emla manko Bir emnam asi déérunglo notko ito.

¹⁷Delo Israel kídíe sim miri sim luto: “E asi déérung no, asiem lenmo langka. Deme ngolu miripe luríkyé.

¹⁸Roja oo kídíke lang ami kídíke miro kídíke kooname. Roja banggén loklang buluke banggén kídí lok koolenname.” Yépol mooruk delok bulu Mattanape byakto.

¹⁹Mattana lokke Nahaliello delokke Nahaliel lokke Bamothlo,

²⁰delokke Bamoth lokke yépol mooruk amongem kaatok suko Pisgah díítum rumkíngke Moab yiibelo notko itoku.

²¹Amoritke roja Sihon kíng Israel kídíe kotoki kídíem lulíkla poto,

²²“Nokke among sok ngolum gímo langka. Ngolu nokke arík gooralok demangkom ríkséng torgongko aralok gíbung-gíléla demangkom nokke asi déérung kongkolok asi tíínggo bila imayé. Nokke amongem gíbongma tetengem ngolu rojake bene-bepong lok jonnampe ensuyé.”

²³Idola Sihon bí Israel kídíem bíkke among delok gímomato. Bí bíkke sipaying tabungem gogdumsula Israelem mimak ikape emla yépol mooruklo enbomto. Edílo bí Jahaj emko delo píítodí, delo Israelem bí mimak imínsuto.

²⁴Idokom Israel kídíe bím mokala bíkke asi-amongem Arnon lokke ila Jabbok loope langgola Ammon among rísu loope laaríto. Kapeila buluk rísuem edíírupe yabgo igoosuto.

²⁵Israel kídíe Amorit kídíke doolung takamem ikumla dungaa bomto.

²⁶Heshbon de roja Sihonke duupom doolung luunepe ito. Roja Sihon bí kerape Moabke rojem mimaklo ikumla Arnon korong loope bíkke asi-among takamem yébomto.

²⁷Dekepeila abéé lune sikepe miri luto, “Heshbonlo aalangka, delokke sim lekoda doolung luunepe, morep langkula, Sihonke luuneme luune doolungpe imolangkuka.

²⁸Sihonke luunelok yaari garlento, Heshbonlok eme dorlento, De Moabke Ar me gula, Arnon ke sisingem nyokmoto.

²⁹Uloi Moab no, E Khemosh ke ami kídí, nolu nyokkaku. Nok uyu bí agí uem, duunyok goona pelang, agí omem paknepe Amorit ke roja Sihon kíng melíkto.

³⁰Idola ngolu bulum ikumto. Heshbon lok ila Dibon loope nyokyin moto. Ngolu bulum Medeba loope duglíkna, Nopah among loope, bénpakyinto.”

³¹Sikepe ila Israel kídíe Amorit amonglo duuyin aabomto.

³²Jajerlo Mosike rokang goona ami melík rodem, Israel kídíe ayir-ago lokke doolung kídíem aajét bomla deke delo duuna Amorit ami kídíem monpakto.

³³Depe irodem bulu gílat sulangkula Bashanpe gína bedalok entoku. Delo Bashan lokke roja Og bí bíkke sipaying tabungem gíbola Israel kídíem mimakpe Edreilo idope gíríkto.

³⁴RUUTUM bí Mosime poto, “Bím atí pesomapeka. Kapeila bím lang bík sipaying tabungem, delokke bíkke asi-amongem, nolum ngo bitobong. Heshbonlo Amorit rojape ina Sihonme, kape kísa nolu itodí, dekepe bímte nolu ilangka.”

³⁵Depeila Israel kídíe bímla bík oo kídíem delokke bík sipaying kídíem ikumla, atel koteng turmomape petyinto. Depe ipala bulu bík asi-amongem dungaa bomto.