Read Alladian SANNAM 22 Bible Online

SANNAM 22 - Alladian bible

SANNAM 22

¹Depe irongem Israel kídíe gígoo langkula Moab yiibelo pííla Jeriko kékon lokke Jordan korong robenglo notko ila duuto.

²Edílo Moabke roja Jipporke oo Balak bí Amorit kídíem Israel kídíke inamem tattodí, delokke Israel kídíke milung-mibamem kaatodí,

³delo bíla bík Moab ami takame yagorupe pesokai.

⁴Moab kídíde Midianke miro kídíem lupo bosuto, “Gooru ruboe kapekísa tamiem nakkut dudí, deke kísape si milung-mibam si ngoluke deyi-degong sokke ato-siro takamem nakkutyé.” Dekepe pobosula delo longe delokke Moabke rojape ina Jipporke oo Balak bí,

⁵Amaw amolo duuna Euphrates korong anín lokke Pethor doolung lokke Beorke ke oo Balaam kíng kotoki eke melígla tomto, “Ijipt amonglok amieke píídung. Bulu among sokke kéényu-rego mipílo bínga bomla ngokke ayir-ago soteng dungangkai.

⁶Bulu ngome ralnam kayala, ralyana amipe idung. Depeila no aabila bulum béélangka. Depe béémílo, ngo bulum ikumla among sok monpak layéku. Kapeila nokke utepooro políkname utepooro paadung, delokke béélíkname béénampe idung, emla ngo kéndung.”

⁷Delo Moab kelang Midianke miro kídíe béénam legape amanem bomla ento. Edílo bulu Balaam kelo píítodí, delo bulu Balakke ponamem popabito.

⁸Delo Balaam bí, “RUUTUM ke ngom agom biyan sunamem tatpaala nolum pokan biyéku, depeila siyoh so doopotoka,” emla bulum potum kolok Moabke miro kídíde bíkkíng doopoto.

⁹Shédí bí Balaam kíng aala, “Nokkíng doona ami kídí si séko bulu,” emla íngkíto.

¹⁰Shédíme Balaam bí poyansuto, “Moabke roja Jipporke oo Balak bí ngome sim agom sim polík dung,

¹¹‘Ijipt among lok angkuna amieke among sim bííyin bomdung. Supak no so aala ngok legape buluk teyolo béélangka. Depe béémílo ngo bulume mimaklo ikumla monpak layéku.’ ”

¹²Idola Shédíbí Balaamme poto, “Bulukíng enmín gekumapeka. Israel ami kídí teyolo pémapeka, kapeila ngokke utepooroe bulukelo kadung.”

¹³Kékon roh delo Balaam bí gerepla, Balakke miro kídídem poto, “RUUTUM bí ngome nolukíng gímín gekumadope lutum dung. Iname nolu agí amonglo ensu kakuka.”

¹⁴Depe pokolok Moabke miro kídíde enlat sulangkula Balak me, “Balaam bí ngolukíng enmín gekumayé emla dungkai,” emla popatoku.

¹⁵Delo Balak bí kerangkem pemílo mikmo lepang edíí-siríyana ami miroem lulígto.

¹⁶Bulu Balaam kíng aala poto, “Jipporke oo Balak bí sipe podung, ‘Ngokkíng aadope íngkona ato-siro lokkom nome itum moma dope rogudung.

¹⁷Nom ngo kamporupe amanem biyé, delokke no íngkuem políkyédí deme ngo biyé. No depe-epe emmape aabila sim ami kídí sim ngok legape béébi langka.’ ”

¹⁸Idola Balaam bulum poyansuto, “Balak bí agíke roja ekum lokke baldín abal tabungemla uun takamem bidokom, améngona ato loote demangkom borona ato loote RUUTUM ngokke Shédíke lulígem ibongla ngo imayé.

¹⁹Idokom RUUTUM bí íngko kodí poyékune dem ngo tatkípoyéku. Iname nolu abíd delokke kísa siyoh doopo bitokuka.”

²⁰Delo yoh delo Shédí bí aala Balaamme potoku, “Si ami kídí si nome tomla aadunade, bulukíng no enmín getokuka. Idola ngokke ponampe no ilangka.”

²¹Kékon roh dem Balaam gerepla agíke gado delo leemola, Moab miro kídí delo lekope enmín geto.

²²Idola Balaamke endungem Shédí bí yagorupe marto. RUUTUM ke teyong kotoki kone bedanglo bím dagtum bomto. Depe idoem, Balaam bí agí gado delo duula ento, delokke bíkkíng lekope bík béérang annyi koteng enmín geto.

²³Edílo teyong kotoki dem yoksako alaglo bomla bedalo dagdupe gadode kaasutodí, delo bedang delok gímape arík danpe gípelto. Balaam bíme demla bedalo aabotoku.

²⁴Depe irodem, bedang abe eelen delo ríkséng aríkpe ila, delokke etorem elíng língkumpe kumla bejok pe ikuko kolo teyong kotokide dagtoku.

²⁵Edílo teyong kotokidem gadode kaasutodí, delo gadode língkum etor danpe yéépe gela Balaamke aleem etor delo tuplíkto. Depe ikolok bí lekoda gadodem demtoku.

²⁶Lekoda teyong kotokide gíge langkula, abe elenlok gípeko kaimangko besur alop kolo dagtoku.

²⁷Edílo teyong kotokidem gadode kaasu tokudí, delo bí Balaamke rumkí delo keyyam aato. Delo Balaam bí marla gadodem bík asék delok demto.

²⁸Delo RUUTUM bí gadodem agom pokéndope imola, gadode Balaamme lupoto, “Nom ngo íngkoko iton? No kape ngom lengum kokai demkan?”

²⁹Delo Balaam bí, “No ngome bopolpe imoto. Ngokkíng yoksako katuamílo supak nom pakayai,” emla poyansuto.

³⁰Gadode Balaamme potoku, “Nokke yénam tabungem siloloope nokke duutíko gado sumangía ngo? Nom sikepe, inakua ngo?” “Ma,” emla Balaam bí poyan suto.

³¹Delo RUUTUM bí Balaamke amigem iyabila, bí teyong kotokidem alaglo yoksa bomla dagdupe kaasuto. Depe kaala bí mikmoe amongpe ila gubaato.

³²Teyong kotokide bím ííto, “No kapeila nokke gadoem lengum kokai demkan? Ngo nom itum kape aadung, kapeila ngok keralo nokke enbomnam si kaanyinampe idung.

³³Gado si ngome kaasula lengum kokai bilgeto. Bí ngok keralo bilge kumamílo, nom ngo arope supak moka tubong delokke gado sime turmoyai.”

³⁴Teyong kotoki dem Balaam poyansuto, “Ngo paabkai. No ngom itum kape emla bedang so dagtum dung emla kénmangai. Idola supak, no aipe míímamílo, ngo enlat suyéku.”

³⁵Delo teyong kotokide Balaamme poto, “Ami kídí so enmín gelangka. Idola ngokke ponampe no agom-aangem polangka. Depeila Balaam bí miro kídí delo enmín geto.”

³⁶Balaamke aanamem Balak bí tatla, bíkke Moab among rísu kéényungke Arnon robelo duuna Ar doolung deloope kaarík kape gíto.

³⁷Delo Balaamme Balak bí poto, “Ngokke lomla kerang tompo delo kape no aaman? Nom ngo aange apíípe amanem bila manía?”

³⁸“Nokkíng ngo arope supak píngadung. Idola ngo agom-aangem poyam layénía? Shédíke ngok teyolo agom líkkor pemino ngo pope aiyéne,” emla Balaam poyansuto.

³⁹Delo Balaam bí Kiriath Hujoth doolung delo Balak kíng lekope gíbosuto.

⁴⁰Delo Balak bí gooru loklang mérlok ipak ila, Balaamme ayoko bisula delokke bíkkíng yémín gena miro kídíemte orgosuto.

⁴¹Delokke kékon roh delo Bamoth Baal emko delo Balak bí Balaamme saaboto. Delo Balaam bí Israel ami ayokonem kaapato.