Read Alladian SANNAM 23 Bible Online

SANNAM 23 - Alladian bible

SANNAM 23

¹Balaam bí poto, “Ngome so runggu kínídko mobila rubo kíníd kolang mér kínídko iru bilangka.”

²Balaamke pokampe Balak bí ibito. Depe irodem bínyi runggu miyong delo rubo kolang mérko romnam amanpe palíkto.

³Delo Balakme, “Nokke romnam aman kídíke anínso, ngokke mooteng elogam gípong dusim, no dagbom polangka. Kapeila RUUTUM bí ngom kaarík suyépe. Bí íngko-íngkuem ngome lengkan yédí, deme nom ngo pobiyé,” emla Balaam bí popala díítum teyolo agí atele saasuto.

⁴Shédíbí bíme kaarík sula, Balaam bí Shédíme poto, “Ngo runggu kínídko pípala, runggu miyonglo rubo kolang mérko romnam amanpe ilíkto.”

⁵RUUTUM bí Balaamke nappang delo agomem ruulíg dola poto, “No Balak kíng gílat sulangkula sim agom sim polangka.”

⁶Delo bí gílat sulangkula, Moabke miro kídarlo lekope dagbosula bíkke romnam aman kídí abelo Balakme dagdupe kaato.

⁷Delo Balaam bí kaalu agomem pobito, “Moab amongke roja Balak, Sanggodan dííte among Aramlok ngome langaato. ‘Aatola Jakobme béélangka, Israelme lupak langka,’ bí emto.

⁸Shédíke béémanamdem, ngo kape kísa bééyén? RUUTUMke lupak manamdem, ngo kape kísa lupakyén?

⁹“Kedonna lííreng teyonglok, bulum ngo kaadung; Díítum teyolok ngo bulum kaadung. Angurupe duungusula, tanike opín-buang aralo, hanlík manam amipe ngo kaadung.

¹⁰“Séko Jakobke demulem saplayén? Demangkom Israelke adu-appi nanemte hanlayén? Ngome deena ami lokke sinampe simo langka; ngokke yéyine buluke kísape idak langka.”

¹¹Balaamme Balakbí poto, “Kape no ngom sikepe ikan? Ngo nom, ngokke miruem béédope emlamin tomatune. Idola no atí imape buluke teyolo utepooro agomem polík bito.”

¹²“Ngok nappangso RUUTUM ke ruulígnamem ngo pomayénía?” emla Balaam bí poyan suto.

¹³Delo Balak bí bím poto, “No ngokkíng moolop konlo aamín getoka. Delo no tabungem kaapa madokom, bulum ayokonem kaapayé. Delok no, bulum ngok legape béébi langka.”

¹⁴Depe pola bí, bíme Pisgah díítum teyongke Jophim aríklo saabola, delo runggu kínídko píla runggu miyong delo rubo kolang mérko romnam amanpe palíkto.

¹⁵Balaambí Balakme poto, “No ngokke romnam aman kídí anín so dakpo langka. Ngo elo gíla Shédíme kaarík supoyé.”

¹⁶RUUTUM bí Balaamme kaarík sula, bík nappang delo agomem ruulíg dola poto, “No Balak kíng gílat sulangkula sim agom sim polangka.”

¹⁷Delo bí gílat sulangkula, Moabke miro kídarlo lekope, dagbosula bíkke romnam aman kídí abelo Balakme dagdupe kaato. Balak bí bím ííto, “RUUTUM bí íngko koda poton?”

¹⁸Delo bí kaalu agomem pobito, “Darepla Balak no tattola, Jipporke oo no ngom tatbitola,

¹⁹Menam agom pona tani kísape, Shédíbí imang. Tani kísa bí aang gemang. Bí pésupala ipíímanía?

²⁰Utepooroem políkdope ngome lulígtung, Shédíke utepooro ruulígnamdem, ngo edílote laabín langkumang.

²¹Jakob kíng atung-arééem kaapamang, Israel kíng adírem kaapamang. Bulukíng RUUTUM buluke Shédí bí kadung. Rojem yidnam adude bulukíng kadung.

²²Ijiptlok Shédí bí bulum laalento. Bulu moonam Jaktum kísape raldung.

²³Jakobke mirupe jadu-montrong atí kamang, Israelke mirupe aid mirie atí ilamayé, ‘Shédí bí kape iton, kaatola,’ emla Israelke legangem amie polayé.

²⁴Israel opín si ralna myomur simyo kísane. Bí rekka-rekyala doyinma tetengem, rekka namke iyyiem tííyinma tetengem, asoope dungkumane.”

²⁵Delo Balaamme Balakbí poto, “Bulume béépete béémapeka delokke utepooro emte polík bimapeka.”

²⁶Balaam bí poyansuto, “RUUTUM ke pokampe ngo pope aido emla ngo nom kerapekai pobimanía?”

²⁷Delo Balaamme Balak tomtoku, “Aatola, nom ngo angukon moolop kolo gíboyé. Elo, ngok legape no bulum béébidope emla RUUTUM bí mííyépe.”

²⁸Depe pola Balakbí yépol moorugem kaatok suko Peor díítum teyolo Balaamme saaboto.

²⁹Delo Balaam poto, “So ngok legape, runggu kínídko píla delokke rubo kíníd kolang mér kínídko irung bilangka.”

³⁰Balaamke pokampe Balak bí ibila runggu miyong delo rubo kolang mérko romnam amanpe ipak ilíkto.