Read Alladian SANNAM 24 Bible Online

SANNAM 24 - Alladian bible

SANNAM 24

¹Israelem utepooro agom polík kolo RUUTUM bí aipe míídung emla edílo Balaam bí kaatodí, depe kaarongem bí lembít kísa íngkí mape jonnampe bí yépol moorukpe kaatoksula,

²Israel amiem opín-opínpe ila duudupe kaato. Delo bíkkíng Shédíke Aide aala, bík kaalu agomem polento:

³“Beorke oo Balaamke kaalu agome, kaajipe kaanake polu-poor agome.

⁴“Shédíke agom-aangem tatna bíkke, delokke Ralya yalumna kelok aro immangem kaala, bík keralo lebíng kooníla, takamem kaapi-perina bíkke kaalu agome.

⁵“E Jakob, nokke tombu kídíde kampodung; E Israel nok dungkode edítko kaabadun.

⁶“Among yiibe kísa de dunggodung, korong robenglo appun ríkséng kísape de idung. RUUTUM ke díínam Agor esing kísa pelang, asi robenglo duuna Sidar esing kísape de idung.

⁷“Buluke balting kídílo asie eelen suyé, buluke ali-ayé, siipí-siiyé amí kídíe alum asamape asi paayé; buluke roje Agag mempemílo gai-gakong yayé, buluke among yétae angun-abé alongyé.

⁸“Ijiptlok Shédí bí bulum laalento, bulu moonam Jaktum kísa raldung, bulu miru kídíem donyokla buluk along kídíem dírmíkla, buluke epuklok bulum abadung.

⁹“Ralna myomur simyoke ketnam kísa bulu idung, sékoda bulum urrepyén? Séko buludí bulum utepooro agom polík yéne, bulukíng utepooroe kaka langka; delokke bulum bééna kídílo, bulukíng bééname kaka langka.”

¹⁰Delo Balak bí Balaamke teyolo marla, lakpyo annyie pirík sudola luto, “Ngok miruem béédope emlamin ngo nome tomatone. Idola nokke utepooro agom políkname si lengum nape ikabong.

¹¹No supak menape agí ekumlo sokke gígékaku. Nom ngo amanem gairupe biyai. Idola RUUTUM bí nom amanem bimomato.”

¹²Balakme Balaam poyansuto, “Nokke tomlíknam kotoki kídídem ngo pomanía?

¹³‘Balak bí agíke roja ekum lokke baldín abal tabungemla uun takamem bidokom, aina agér dokom, aimana agér dokom, ngo agísu míngkor supe ila RUUTUM ke lulígem ibongla ilamayé, delokke RUUTUM ke pokampe ngo pope aido, emmanía?’

¹⁴Supak ngo agí amisulo ensudakku, idola aatola, yépenam longelo nok ami kídíem si ami kídí si kape kísa iyédí, ngo nom poru bidung.”

¹⁵Delo bí kaalu agomem pobito, “Beorke oo Balaam ke kaalu agome, kaajipe kaanake polu-poor agome.

¹⁶“Shédíke agomem tatna bíkke, delokke Kedon yalumna keelok kénnamem kana keelang, Ralya yalumna keelok aro immangem kaala, bík keralo lebíng kooníla, takamem kaapi-perina bíkke kaalu agome:

¹⁷“Ngo bím kaadung, idokom supakmang, ngo bím kaapadung, idola anínmang; Takarko Jakob kelok lenyé, Israel lok roja banggénko gerepyé, Moabke tuklong emla Seth ke oo kídíke tukkuem bí dírmíkyé.

¹⁸“Bí Edom me ikumla, bík miru Seirme ikumyé; Idola Israele ralperung siisayé.

¹⁹“Jakob kelok among ruutumko lenla, doolung luuneke ami tabungem nyokyinmoyé.”

²⁰Delo aro immalo Balaam bí Amalek kídíem kaala, kaalu agom sim poto, “Opín-buang takamke kerape Amalek kídíe ito, idola bí yéyinlo nyokkaku.”

²¹Delo bí Kenít kídíem kaala, líímé agom sim poto, “Nok dungko moolopde edíídung, nok asupde líírelo dung.

²²“Idola edílo Ashur kídíe nolum umyédí, Kenith nolu nyokyinyé.”

²³Delo bí agíke kaalu agomem posuto, “Ah, Shédíke sikepe idungem séko turyén?

²⁴“Kittim robenglok bulu asi jajilok aabomla, Eber melang Ashurme ikumla yébomyé, idola bulukom nyokyéku.”

²⁵Depe porodem Balaam bí, darepla agí ekumpe ensutoku delokke Balakte agí gígoosupe gítoku.