Read Alladian SANNAM 25 Bible Online

SANNAM 25 - Alladian bible

SANNAM 25

¹Israel kídíke Shittimlo notko ila duudungem, milokong kídíe Moab mimelo abír-ayo ibosuto.

²Mime kídíde bulum uyu ipak ila gíídí-siipe doman kolo tomla, bulu Moab kídí kelo domín-tíímín gela buluke uyuem kumsu bosuto.

³Dekepe Peorke Baalme kumsukolo, Israel kídíe kummín geto. Depeila buluke teyolo RUUTUM bí marto.

⁴RUUTUM bí Mosime poto, “Ekena ami kídíke miro tabungem laala, RUUTUM ke marlínge Israel aralok gídokupe, bulum RUUTUM ke kangkolo lang takamke keralo mokala lengkan langka.”

⁵Depeila Mosi bí Israelke miro kídídem lulígto, “Noluke agí agíke opín arasulo, séko buludí Peor lokke Baalme kumsu dudí, bulume moka langka.”

⁶RUUTUM ke Tombu lamgé delo Israel kídíke kapla-rííla duudungem, bulu takamke kangko lolang Mosike amig kerapaklo Israel ami kone Midian mimeko bík tombulo aabotoku.

⁷Delo Aaronke oo Eleajarke onam Phinehas bí deme edílo kaatodí,

⁸delo bí alaglo gíníngko bomla tombu delo gímín gela Israel amidem níkla mime amíl deloge níklíkla bínyim annyi pakdem níkkato. Depe irodem Israel teyolo itung-iré name kaimato.

⁹Idola itung-irélo sina kídíe midum 24,000 amiko ito.

¹⁰RUUTUM bí Mosime poto,

¹¹“Miri Aaronke oo Eleajarke onam Phinehas bí, Israel teyolok ngok marnamem gímotoku. Kapeila ami kídí aralo ngo kapekísa agí kesupe erdudí, dekepe bí erbomto. Depeila ngokke marnamlok bulum ngo nyokyin momato.

¹²Dekepe ikolok bíkkíng ngo, aapí eetetpe daapongem ibosudung emla bím popa langka.

¹³Bí bíkke Shédíke legape erbomla Israel eme ipítnam legape bímla bíkke otíng-oyin loope miri agérem agínpe géryar bomnam daapongem ilíkkai.”

¹⁴Midian mime delo lekope mokanam amide Simeon opín lokke ruutum konpe ina Saluke oo Jimri bí.

¹⁵Midian mime sinade, Midian erang lokke miro konpe ina Jurke ome Kojbi bí.

¹⁶RUUTUM bí Mosime poto,

¹⁷“Nolu Midian kídíem mirupe mííla mokalangka.

¹⁸Kapeila Peorlo nolum bulu atímape iríkla delokke Peorlo itung-iré ido delo mokanam Midian miro konke ome, buluke bírme Kojbike legape nolum bulu yatto.”