Read Alladian SANNAM 28 Bible Online

SANNAM 28 - Alladian bible

SANNAM 28

¹RUUTUM bí Mosime poto,

²“Sim lulígnam sim Israel kídíem pokan langka, ‘Ngokke amanem ngokkíng arí kadope emelok romlíknam donam amanem moodí paklo bidope kén-gelangka.’

³Delokke no bulum sim polangka; RUUTUM kelo emelok romlík penam amanpe, loodí mipíke, atí tarí-tape kamana toodí taktelna milokong méro annyiko iyar líklangka.

⁴Méro kondeme roh daneme delokke méro akondem yume daneme romnam amanpe ilík langka.

⁵Delo lekope ali-ayé donam amanpe litar atel kope ina gaina olib téllok hoyél sunam ettíng kilogram atel-atelpe mér miyong delo itak sulík langka.

⁶Si emelok romlíknam aríkana loodípe bipenam amane. Sime agínpe bidope Sinai díítelo ilenname.

⁷Mér miyong delo litar atel kope kedíkna tíínam aman lok iyél supe aiyé. Dem tíínam amandem Tombuke deena runggulo purlík langka.

⁸Roh dan aman bikolo kape kísana ali-ayé donam aman lokla tíínam amanem kaabom dula itodí, dekepakpe méro kondemte yume danem ilangka. Si RUUTUM ke airupe míínam, emelok romlíknam aríkana amane.”

⁹“Sabbath longelo atí tarí-tape kamana, toodí taktelna milokong méro annyiko amanpe bomalangka. Delo ali-ayé donam amanpe olib téllok hoyél sunam kilogram annyiko ettíng lok delokke tíínam aman lok bitak sulík langka.

¹⁰Loodípe aman bikolo tíínam amanem bitak sula Sabbath mipílo, sim romnam aman sim biyarpe aido.”

¹¹“Poolo lokke kerang longelo, tarí-tape atí kamana rubíl annyi kolang, mérbo ko delokke toodí taktelna méro kínídko romnam amanpe bomalangka.

¹²Delo ali-ayé amanpe, rubíl miyong delo olib téllok hoyél sunam ettíng lok kilogram angumko mérbo delo, kilogram annyiko

¹³méro miyong delo kilogram asak itak sulík langka. De RUUTUM ke airupe míínam, emelok romlíknam aríkana amane.

¹⁴Tíínam amanpe rubíl miyong delo litar annyiko, mérbo delo litar kolang arotko, delokke méro miyong delo litar asak itak sulík langka. Si dítak gooralo, poolo miyong lokke kerang longelo romnam amanpe ilíkpenam ayone.

¹⁵Sok tíínam amanke teyolo bénboko paab amanpe RUUTUM kíng bilangka.”

¹⁶“Kerang poolo lokke looying kolang loopinana longelo RUUTUM ke Gíbong adeng-ape em ibosulangka.

¹⁷Sok poolo sokke looying kola longolo domanem ibosu langka. Longe kíníd ko siiyé líkmanam ettíngem dobosulangka.

¹⁸Kerang longelo kumsu kolo gídumsula, delokke agér-anam atí imapeka.

¹⁹Tarí-tape atí kamana rubíl annyiko, mérbo ko delokke toodí taktelna méro kíníd ko romnam amanpe RUUTUM kíng emelok romlíktoka.

²⁰Ali-ayé amanpe: Rubíl miyong delo olib tél lok hoyél sunam ettíng lok kilogram angumko, mérbo delo kilogram annyiko,

²¹delokke méro miyong delo kilogram asak itak sulíklangka.

²²Sok teyolo, noluke paab aman legape bénboko itaksula ami kídíem ipítkunam legape ilangka.

²³Sike sim roh moodí mipil lokke romnam aman kídí teyolo itemlík langka.

²⁴RUUTUM ke keralo aríkana nampona donam amanem sikepe irula, rodípe romnam amanem longe kíníd kope romlík langka. Sime agínpe iyar sunam romnam aman keelang tíínam amanke teyolo item líklangka.

²⁵Longe kíníd nana delo kumsu kolo gídum sulangka, delokke agér atí ibosumapeka.”

²⁶“Gaddí-idí doman lokke kerang longe delo edílo nolu ali-ayé aníem amanpe RUUTUM keelo bomayédí, delo nolu kumsukolo gídum sula, agér-anam atí ibosumapeka.

²⁷RUUTUM ke keralo aríkala nampona amanpe rubíl annyi kolang mérboko delokke toodí taktelna méro kínídko bomala romnam amanpe romlíktoka.

²⁸Delo ali-ayé amanpe rubíl miyong delo, olib tél lok hoyél sunam ettíng lok kilogram angumko, mérbo delo kilogram annyiko,

²⁹delokke méro miyong delo kilogram asak itak sulíklangka.

³⁰Sok teyolo, noluke paab aman legape bénboko itaksula ami kídíem ipítkunam legape ilangka.

³¹Sime agínpe iyar sunam romnam aman keelang ali-ayé amanke teyolo tíínam amanem itemdola sike sime ibosulangka. Taro kídíde atí tarí-tape kape aimang.”