Read Alladian SANNAM 30 Bible Online

SANNAM 30 - Alladian bible

SANNAM 30

¹Israel opín-buang kídíke miro kídíem Mosi bí poto, “RUUTUM bí sikepe lulígdung.

²Edílo amikone pésuyédí, bí agí agomem betsumapeka delokke agí pokampe atí takamem ipe aido.

³Edílo agí abu ekumlo duudung adana mimum mimekone RUUTUM ke keralo pésuyédí, demangkom tolík sunam dem abue tatla atoko ipe emla tolík suyédí,

⁴delokke bíkke pésunamdem demangkom tolík sunamdem abue tatlate akmayédí, delo bí agíke pésunam demangkom tolík sunam em ipíípe aido.

⁵Idola edílo bík abue bík legangem tatla, bím lutum yédí, delo bíkke pésunamem demangkom tolíksunam kídíem imadokom aiyé. Kapeila abuke lutumnampe RUUTUM bí bím mesamyé.

⁶“Milolo gína mimekone milolo gímang adape pésunamko kala demangkom ansu-kaasumape atoko ipe emla tolík sunamko kala,

⁷deme milode tatla akma yémílo, bík pésunamem demangkom tolík sunamem bí ipíípe aido.

⁸Idola edílo bík miloe, bík legangem tatla, bím lutumyédí, delo bí bíkke pésunamem demangkom tolík sunam kídíem imadokom aiyé, delokke RUUTUM bí, bím mesamyé.

⁹Mime meyéng kelang mekunam lokke pésunam kídíde bíkkelo kamín geyé.

¹⁰Milolo gína mime kone milolo gírongem pésula demangkom agíem atoko ipe emla tolík sula iyémílo,

¹¹delokke bíkke depe inamem milode tatlate bím akmape lutum mayémílo, delo bíkke pésunamem demangkom tolík sunamem bí ipíípe aido.

¹²Idola edílo milode dekeme tatrongem bí dekedem luyayémílo, bíkke pésunam demangkom agí nappalok tolíksunam kídíem atel kokom ipíí madokom aiyé. Kapeila dekedem bík milode luyato, delokke RUUTUM bí bím mesamyé.

¹³Mime delokke pésunam demangkom tolík sunamem milode ipíí molado demangkom luyalado.

¹⁴Idola milode dekedem tatlate longe lotel koteng deke delokke agom-aang atí pomayémílo, mimede agíke pésunamem demangkom tolíksunam kídíem ipíípe aido. Kapeila deke legangem akmang kolok milode pésunam dem tolíkkai.

¹⁵Idola bí dekedem tatyin palate méélamlo pésunamdem luyayékumílo, delokke edoem milode gepe aiyé.”

¹⁶Dekepe milo bomna mime keepelang abu ekumlo mimumpe duusudung adana keepe igepenam idongem RUUTUM bí Mosi kíng bito.