Read Alladian SANNAM 31 Bible Online

SANNAM 31 - Alladian bible

SANNAM 31

²“Israel kídí teyolo atímape inam legape Midian kídíem edo ralang kuka. Depe irongem nome nokke buku-nekulo langaayéku.”

³Depeila ami kídíem Mosi poto, “RUUTUMke edoem Midian kídílo radokupe, bulume mimak idope, noluke ami ayokone mimak leemoem molangka.

⁴Israel kídíke opín-buang miyonglok midum éjar amipe lulen langka.”

⁵Depe ila opín-buang miyonglok midum éjar asakpe ila éjar íying kolang jarnyiko midu-mimak legape ullento.

⁶Mosi bí opín-buang miyong delok midum éjarpe lulígla, miri Eleajar ke oo Phinehas meteng lulígto. Phinehas bí Tombu delokke deena ato-siro emla mimak iyodem ilen genape bikul demte bomto.

⁷RUUTUM ke Mosi kíng lulígnampe bulu Midian kídíem mimak ila ami takamem petyínla,

⁸Ebi, Rekem, Jur, Hur delokke Reba emnam Midian roja pilngo demte pettaksuto. Bulu Beorke oo Balaam mete yoksa lok pakato.

⁹Israel kídíde Midian lokke mime, ome-oo delokke gooru kídí emla mér sobén alung delokke ekurang takamem lííbila bomtoku.

¹⁰Bulu Midian kídíke doolung takam emlang notko tabungem rombito.

¹¹Bulu tani kídí emlang taro kídíem itaksula líínam ekurang takamem laala,

¹²Jordan kékon Jeriko ke arotkonlo duuna Moab yiibeke notko delo, Israel kebang kerang delo lang miri Eleajar delokke Mosike keralo líínam ekurang takam demlang abílpe umnam tabungdem bomatoku.

¹³Mosi lang miri Eleajar delokke opín-buang kídíke miro kídí tabungde, notko luyulo lenríkla maglíng dem gíríkto.

¹⁴Delo midum éjar keelang midum língko lokke maglíng ruutum kídí teyolo Mosibí aklíla íngkíto.

¹⁵“Nolu kape mime takamem turmokane?

¹⁶Bulu mino Balaamke luyilem tatla Israel kídíem RUUTUM ke kerang lok mooteng mokune. Depe Peorlo ikolok RUUTUM ke ami kídí teyolo itung-iréngem paayin moto.

¹⁷Supak yaamé koo takam emlang milokong ketbo sukína mime tabungem moka langka.

¹⁸Idola milokong ketbo-doobo sukímana mimekoo tabungem nolu agíke supe turmolangka.

¹⁹Nolu takame sékodí amiko mokatodí, bulu notko lokke luyulo longe kínídko duupope aiyé. Longum nana longe lolang longe kíníd nana longelo nolu agísuem lang noluke abíl kídíem deebín supe aido.

²⁰Delok teyolo, noluke ege-galuk tabung emlang, asig-ayolok inam, sobén amídlok inam, delokke esing lok inam ato kídí tabung emte deebín langka.”

²¹Delok rongem mimaklo gína maglíng dem miri Eleajar poto, “RUUTUM ke Mosime lulígnam ayon lok sike si ipename,

²²uun, baldín, pitol, arem, bagitam, pakrang,

²³delokke emelok gulamanam ato-siro takamem emelo ilík geyéla deemope aiyé. Sok teyolote dekedem deebín nana asilok deebínpe aiyé. Delokke eme gunam tabung dem asilok deebínpe aiyé.

²⁴Longe kínídlo noluke ege-galugem etbín sulangka. Delo nolu deeyéku. Dekepe irongkuem notkolo nolu aaladoku.”

²⁵RUUTUMbí Mosime poto,

²⁶“Nolang miri Eleajar delokke opín-buang tabungke miro kídíe umnam taro kídí emlang ami kídíem sanlangka.

²⁷Líínam ekuserang kídíem mimaklo enna maglíng kídí lolang abíd opín-buang tabulo orpan bosulangka.

²⁸“Mimaklo enkana maglíng kídíke paapenam ekuserang lokke; tani dokom, gooru, gado, mér demangkom sobén kídí dokom, dekena ara lokke língko pilngo lokke atel kope,

²⁹RUUTUM keepe amanpe ipek lennam aman kídíem RUUTUM ke adupe miri Eleajar me bilangka.

³⁰Israel opín-buang abídlo orlíknam delok tani dokom, dekena arang lokke íying pilngo lokke atelko ipek lenla dekeme RUUTUM ke Tombuem kaabom-tatbomna Lebi kídíem bilangka.”

³¹Dekepe RUUTUM ke Mosime polík kolok, Mosi lang miri Eleajar bínyi ito.

³²Maglíng kídí lokke líínam ekuserang kékonlo bomkunam kídíe mér elang sobéne 675,000 ko,

³³goorue 72,000 ko,

³⁴gadoe 61,000 ko,

³⁵delokke milokolo ketbo-doobo sukímana mime 32,000 ko kato.

³⁶Mimaklo enna kídíke arot lokke adue; mér elang sobéne 337, 500 ko ito.

³⁷Delok RUUTUM kepe ipek lenname 675 ko ito.

³⁸Goorue 36,000 ko ito. Delok RUUTUM kepe ipek lenname 72 ko ito.

³⁹Gadoe 30,500 ko ito. Delok RUUTUM kepe ipek lenname 61 ko ito.

⁴⁰Milo kénkímana mime 16,000 ko ito. Delokke RUUTUM keepe ipek lenname 32 ko ito.

⁴¹RUUTUM ke Mosime lulígnampe, RUUTUM keepe ipek lennam aman deme RUUTUM ke adupe Mosibí miri Eleajar me bito.

⁴²Mimaklo enna kídílok arot konem ilen langkula Israel daapong legape ordokupe iname,

⁴³mér elang sobéne 337,500 ko ito.

⁴⁴Goorue 36,000 ko ito.

⁴⁵Gadoe 30,500 ko ito.

⁴⁶Delokke milo kénkímana mime 16,000 ko ito.

⁴⁷Israel kídí delok ilenkunam arot delok, bíme RUUTUM ke lukampe íying pilngo tani keelang taro aralok Mosibí atel pe ipek lenla, dekedem bí RUUTUM ke Tombuem kaabom-tadbomna Lebi kídíem bito.

⁴⁸Delo maglíng aralokke midum éjar keelang midum língkoke ruutum kídíe Mosi kíng aala,

⁴⁹bím poto, “Nokke béérang kídí ngolu agí-agíke opééem hanla midum atel kote nyokmadope hanto.

⁵⁰Depeila ngolu mipil-miyongke uun, arem, tadok ekurang kídí lok inam lerum-lakrum, koosi-koopung, ruupon delokke lunggu lanam kídíem, ngolu mipile agísuem RUUTUM ke keralo ipít sudope RUUTUM kíng amanpe bomabidung.”

⁵¹Delo Mosi lang miri Eleajar bínyi, buluke bomang binam uun, delokke arem-tadok ekuserang kídí demla morí-mojok líknam ato-siro tabungem laaríksuto.

⁵²Midum éjar lokke lang midum língko kídíke ruutum kídí lok laarík sula RUUTUM keelo Mosi lang Eleajar ke amanpe biname 200 kilogram pííta nakope ito.

⁵³Mipil-miyong maglíng sipaying kídíde agísu keepe líínam ekuserangem bomyin suto.

⁵⁴Midum éjar keelang midum língko kídíke ruutum kídí delokke uun amanem Mosi lang miri Eleajar bínyi laaríksula, Israel kídíe RUUTUM ke keralo míngge ayar gedope, RUUTUM ke Tombu delo aman kídí dem bomala metoku.