Read Alladian SANNAM 32 Bible Online

SANNAM 32 - Alladian bible

SANNAM 32

¹Reuben ami kídíe lang Gad ami kídíde bojérupe gooru-sobénem lang mérem bomto. Edílo bulu Jajer delokke Gilead amongem Simon-sili kídí legape gaipe kaatodí,

²delo bulu Mosi kílang miri Eleajar delokke Israel miro kídarlo aala poto,

³“Ataroth, Dibon, Jajer, Nimrah, Heshbon, Elealeh, Sebam, Nebo delokke Beon,

⁴emnam RUUTUM ke Israel ami kídí legape igulla yébom dope ibinam moolop kídar esi simon-sili yégape aidung, delokke noluke béérang kídí ngolu simon-sili bojéko kadung.

⁵Ngoluke teyolo nolu aipe míídumílo, Jordan korongem koomomape ngolum dem moolop kídar dem ngoluke yége-dagge penam ekurangpe orlík bilangka.”

⁶Reuben kídí emlang Gad kídíem Mosi poyansuto, “Noluke Israel opín-buang kídíe midu-mimaklo gídungem nolu delo asoope duupe emlangía míídune?

⁷Kape nolu, RUUTUM ke Israel kídíem among binam delo gílímadope aapí-aangem nyokmope ikan?

⁸Edílo ngo Kadesh Barnea lok asi-amongem kanggodope noluke abu kídíem lulígtodí, delo bulu sike pakpe ito.

⁹Bulu Eshkol yiibelo pííla RUUTUM ke bulum asi-among binamem kaarong dem asi-among delo gíamadope Israel kídíke gílínana aapí-aangem nyokmoto.

¹⁰Delo longe delo RUUTUM bí marla sim pésuto,

¹¹‘Buluke aapí-aange ngokkíng apíípe gemín gemang kolok, ngokke Abraham, Isaak delokke Jakobke teyolo pésunam amongdem, toodí takying annyina lokke irepla Ijipt lok gílenkuna minena ami tabungde kaapamayé.

¹²Kenij raamík lokke Jephunnehke oo Kaleb lang Nunke oo Joshua bínyike kékonlo mipil-miyongde kaapamayé. Bínyi aapí-aange apíírupe RUUTUM kíng gemín geto.’

¹³Depeila Israel kídí teyolo RUUTUM ke marname kala, atímape ina siirum tabungde nyokyin dope, yépol mooruk amonglo, bí bulum toodí takying appi kope magong motoku.

¹⁴“Supak so, paablok lenkuna aní siirum nolu, noluke buku kídíke yédulo yéyan langkula, Israel teyolo pakyape RUUTUMme marmodung.

¹⁵Nolu bíkkíng gímín gemayémílo, bí lekoda ami kídí nolum yépol mooruklo melíkyéku. Ami takamke nyokkunana leríde nolu iyé.”

¹⁶Delo bulu, Mosike anínlo aala roguto, “Kerape ngoluke mime, ome-oo legapelang taro kídí legape doolung lumola, gual etor atíem imopoika,

¹⁷delo ngolu lekope abíd Israello gímín gela midu-mimaklo gíyé, delokke buluke asi-among duupe kolo eetetpe dungaa mangada deloope ngolu midu-mimagem igeboyé. Dekepe idu delo ngoluke mime ome-oo kídíe among sokke miru-sogong ami kídílok peso atí kamape yabgo igoonam doolunglo eetet-monetpe duuyé.

¹⁸Israel mipil-miyonge yége-dagge peko among moolobem paamang tete deloope ngolu agí ekumlo enkumayé.

¹⁹Jordan korong lokke sanggo danlo ngoluke yége-daggepenam asi-amongem paarongem ngolu korongke rotkon danlo ngoluke asi-among tarongem ngolu tomín gemayé.”

²⁰Mosi bulum poyansuto, “Nolu agí pokampe arorupe emdumílo, RUUTUM ke keralo mimak leemoem gelangka.

²¹Noluke mimak ipena ami takame RUUTUM ke lulíg aralo, Jordanem koola, ngoluke miruem RUUTUM bí ikumboma teteng deloope nolu mimak ipe aiyé.

²²Edílo asi-among sim RUUTUM ke keralo apíípe yébomla irongem delo nolu agíke toge sulíknamlok apít arangpe yélangkula RUUTUM ke keralokla Israelke keralok lenlangkula gíladoku. Depe imílo, si asi-among si noluke yége-dagge bompenam asi-amongpe iyé.

²³Idola nolu sikepe ilamayémílo, nolu RUUTUM ke keralo ajéng geyé delokke noluke paabde nolum edorayéku.

²⁴Nolu doolungem noluke mime ome-oo legape ilen langka delokke gual etorem noluke taro kídí legape torla pírlangka, idola noluke toge sukampe agérem gérlangka.”

²⁵Delo Gad kídí delang Reuben kídíde Mosime poyansuto, “Ngoluke ruutum nokke pokam pakpe ngolu iyé.

²⁶Ngoluke mime ome-oo kídíe lang gooru kídíe delokke mér, sobén kídíe Gileadke doolung kídílo duuyé.

²⁷Delokke mimak leemo gena mipil-miyong ngolu takam ruutum nokke pokampe RUUTUM ke lulíg aralo mimak makkolo Jordanem koola mimak imínsuyé.”

²⁸Dekepe pokolok Mosi bí miri Eleajar melang Nunke oo Joshua me delokke abíd Israel miro kídíem ukum bila lulígto,

²⁹“RUUTUM ke lulíglok, Gad kídíe lang Reuben kídíe mimak ipe emla Jordanem kooyémílo delokke buluke iggullok nolu takam asi-among sim ikum layémílo, delo Gilead amongem bulum nolu tolík bilangka.

³⁰Idola bulu nolum mimaklo igulpe Jordanem koomayémílo, buluke yége-dagge penam asi-amongem, noluke abíd Israel kídílo lekope Kanaan amonglo bulumte orlík langka.”

³¹Delo Gad kídí delang Reuben kídíde poto, “RUUTUM ke pokampe ngolu iyé.

³²Ngolu RUUTUM ke keralo mimak leemoem gela Jordanem kooyé, idola ngoluke yége-dagge penam asi-among dedan Jordanke sanggo danso kape aido.”

³³Dekepe emkolok Mosi bí Gad opín emlang Reuben opínem delokke Joseph kíng lenna Manasseh opín arot konem, Amoritke roja Ogke among emla delokke dei-degonglo duuna doolung takam emlang asi-amongem panlíkto.

³⁴Depeila Gad opínde Dibon, Ataroth, Aroer,

³⁵Atroth Shopham, Jajer, Jogbehah,

³⁶Beth Nimrah, delokke Beth Haran doolung kídíem yabgo kadope isi-simo langkula simon-sili legape gual etorem torla ito.

³⁷Reuben opínde Heshbon, Elealeh, Kiriathaim,

³⁸Nebo, Baal Meon (sime angupe amín míntoku), delokke Sibmah doolung kídídem isi-simotoku. Buluke isi-simo kunam doolung kídíem anípe amín mínlík líkyintoku.

³⁹Manassehke oo Makir keelok lenna opín kídíde Gileadlo gíla delo duuna Amorit kídíem monpakla doolung dem aajét bomto.

⁴⁰Depeila Manassehke otíng-oyin Makir opín dem, Mosi bí Gilead doolung luune dem tolíkla bulu dungaa bomto.

⁴¹Manasseh keelok lenna Jair bí doolung ayoko mimak lok ikumla dekedem Habboth Jair [10] emto.

⁴²Delokke Nobah bí Kenath doolung emlang delokke dei-degong doolung kídíem mimakpe aabomla, ikumla dekedem Nobah emla agíke amínlok mínlíksutoku.