Read Alladian SANNAM 34 Bible Online

SANNAM 34 - Alladian bible

SANNAM 34

¹RUUTUM bí Mosime poto,

²“Israel kídíem lulígla polangka, edílo nolum orlíknam noluke yébom-dagbom penam Kanaan amonglo nolu aayédí, delo sikepe noluke among rísue iyé.

³Sokkodanlo, Edomke among duurílok ila yépol mooruk Jin em ayoko itaksuyé. Rísude Sina Siyéng sokko duurí sanggo danlok ilenyé.

⁴Depe irongem rísude sokko danpe toklang kula Akrabbim díítum-gééjong delok ila tokyar langkula yépol mooruk Jin lok gíla Kadesh Barnea loope iyé. Delo rísude anggo línggíngpe ilangkula Hajar Addarlo billangkula Ajmonlo ilíkyé.

⁵Delokke de yiibe danpe toklang kula Ijipt among rísulo irík sulangala Among Raadang Siyéng loope iríyé.

⁶Anggodanke rísude Among Raadang Siyéng delo irísuyé.

⁷Línggíng dan rísude, Among Raadang Siyénglok ilenla Hor díítum deloope

⁸ila, Hamath díítum-gééjong lok iyar langkula Jedadlo,

⁹delokke Jiphron kíng ilíkla Hajar Enanlo iríyé.

¹⁰Sanggodan rísude Hajar Enanlok ilenla Shepham loope,

¹¹delokke sokkope biltok langkula Ainke sanggodan Harbel sokkolo ila delokke Galil Siyéng lokke sanggodan robengke díítum kídílo ilíkla,

¹²sokkope toklangkula Jordan korong rubuung lok iyarla Sina Siyéng lo irílíkyé. Sikesi noluke asi-among lokke rísu kídíe.”

¹³Mosibí Israel kídíem poto, “Sikesi RUUTUM ke opín-buang konang kola arotkonem yébom-dagbom dope panlíkname. Nolu sikesim lotoripe ibosula orpan bosulangka.

¹⁴Kapeila Gad opínela Reuben opíne delokke Manassehke opín arotkone, buluke yébom-dagbom penam asi-amongem paasutobong.

¹⁵Bulu asi-amongem Jerikoke arotkon, Jordan korong sanggo danlo paato.”

¹⁶RUUTUM bí Mosime poto,

¹⁷“Ami kídí legape asi-amongem miri Eleajar lang Nunke oo Joshua bínyi orpan biyé.

¹⁸Delokke dekepe ordungem iguldope opín-buang miyonglok miro atelko dada laalík langka.

¹⁹Miro kídí buluke amíne sikesi: Judah opín lokke Jephunnehke oo Kaleb.

²⁰Simeon opín lokke Ammihudke oo Shemuel.

²¹Benjamin opín lokke Kishlonke oo Elidad.

²²Dan opín lokke Joglike oo Bukki.

²³Joshepke oo Manasseh opín lokke Ephod ke oo Hanniel.

²⁴Joshepke oo Ephraim opín lokke ruutumpe ina Shiptanke oo Kamuel.

²⁵Jebulun opín lokke Parnak ke oo Elijaphan.

²⁶Issakhar opín lokke Ajjanke oo Paltiel.

²⁷Asher opín lokke Shelomike oo Ahihud.

²⁸Naphtali opín lokke Ammihudke oo Pedahel.

²⁹Si miro kídar si, Kanaan amonglo Israel kídíem, asi-amongem ordope RUUTUM ke ullennam ami kídíe.”