Read Alladian SANNAM 35 Bible Online

SANNAM 35 - Alladian bible

SANNAM 35

¹Jeriko lokke Jordan rotkonke Moab yiibelo RUUTUM bí Mosime poto,

²“Israel kídíem, buluke yébom-dagbom penam asi-among lok Lebi kídíem doolung luula duudope delokke doolung kídíke dei-degong loote simon-sili yégo peko moolobem bisudope lulíg langka.

³De doolung kídíde Lebi kídí keepe iyé, delokke delo bulu duuyé. Moolop panbisunam kídíde buluke simon-sili delokke abíd taro kídí yépompe iyé.

⁴Moolop yépom kídíde doolung luuyab lokke 450 mitar kope ilenla luyu danlo ipe aido.

⁵Depe imílo raadalo doolung ela doolung luyu dem 900 mitar mootepe moolop kídíde bilgoola duubomyé.

⁶Nolu Lebi kídíke duusi supompe doolung akkéko bilangka. Delo amikone imemlok amikonem mokanamko kamílo duusi sulayé. Dekena duusi supom doolungem bulu íying appi kolang annyiko, simon-sili legape moolop emte panbila bitem langka.

⁷Depe imílo bulum moolop kídíem bitak sula doolung íying appi kolang píínyiko bilangka.

⁸Lebi kídíke asi-among doolung kídíem, Israel kídíke opín-buang among bottepe paanam akorem kaabom dola lubi langka. Asi-amongem bojéyape paanalok doolungem bojéyape, anyoyape paanalok anyoyape doolungem lulen bilangka.”

⁹RUUTUM bí Mosime poto,

¹⁰“Israel kídíem sipe polangka; Edílo nolu Jordanem koola Kanaanlo aayédí,

¹¹delo imem kootírpe amikonem ami akone mokayém, dugnyok gela duusi supeko legape doolung ayoko nolu sanlenla melangka.

¹²Delo imemna amide bíme edorayan sukupena ali-atodlok duupí sugeyé. Kapeila ami mokana amidem kebang imape moka kayan sukupe aimang.

¹³Nolu doolung akkéko sanlenla melangka.

¹⁴Doolung angum konem Jordan lokke sanggo danlo delokke angum konem Kanaan amonglo duusi sukope ilangka.

¹⁵Dekede Israel kídíke lang duuyar mana demangkom duuyarna mibo-miying kídíke legape duusi sukope iyé. Ami akone imempe ami konem mokayémílo, deke delokke akonlo duknyok gela duusi sulado.”

¹⁶“Idola amikone arem ekurang kolok akonem demla simo yémílo, de amide mokana amipe ikai. Depe mokana dem mokape aiyé.

¹⁷Demangkom amikone simolana elíng atíko alaglo bomla ami akonem delok monala simoyemílo, de amide mokana amipe ikai. Depe mokana dem mokape aiyé.

¹⁸Demangkom, amikone simolana esing ekurang atíko alaglo bomla ami akonem delok monala simoyémílo, de amide mokana amipe ikai. Depe mokana dem mokape aiyé.

¹⁹Sikana ami delokke ali-atod konde mokana amidem petyan sukupe aido. Edílo bí amidem kaarík suyédí delo bíme mokakupe aido.

²⁰“Amikone amikonem kangkila nííletla demangkom atí kolok gelíkla,

²¹demangkom alaglok kítkala simoyémílo, de amide mokana amipe ikai. Bíme mokakupe aido. Sikana ami delokke ali-atod konde mokana amidem petyan sukupe aido. Edílo bí amidem kaarík suyédí, delo bíme mokakupe aido.

²²Idola amikone ami akonem atí kangkimape nííletla demangkom atí kolok gelíkla.

²³demangkom kaasumape, delokke iperung emla míímape, delok teyolo ami delokke miru-hogong pete imana konem, imem kolok simoyémílo,

²⁴dekena imem dem doolunge, petyan sukupe emla matana ali-atod keepe kebang lubimape, imemna ami delokke legape kebangem lubi langka.

²⁵Doolungde dekepe imemna amidem, edo rakupena ali-atod keralok mopít bila, bulu bíme, bíkke dugyok anggeko duusi suko doolung delo ai-kampope duumo kupe aiyé. Bí doolung delo dekepe ido delokke miri írnepe ina ami delokke sido loope duupope aiyé.

²⁶Imemtona amide duusi suko doolung delo dugnyok anggetula delo duumape lendokuem,

²⁷mokatonam ali-atode bím kaarík sula moka yékumílo, dem moka kunamde mokanampe sanmayé.

²⁸Imemtona amide ido delokke miri írnepe ina ami delokke sima tetedem duusi suko doolunglo duupe aiyé. Miri íírne delokke sirongem bí ekumlo aalatsula doku.

²⁹Sikesi, siirum-siirum loope noluke dungko takamlo igepenam ayon kídíe.

³⁰Ami mokana amidem, hakii kídí lokke agom-aang lokmin mokanape sanla mokayékune. Idola midum atelke hakii agom lok séko mete moka kumapeka.

³¹“Mokana amidem mokakupe aido. Bíkke lok are-ame laala bíme dorpít sumomapeka.

³²Amikone duusisuko doolunglo duknyok gepala, miri írne lokke simang adape, agí ekumlo angkupe emla ajéng dorpe emyékom dormomapeka.

³³“Noluke dungko asi-among dem deemang-amo imomapeka. Iyyi líímín sunamde asi-amongem deema modung. Iyyi líína bíkke agísu iyyi kékonlo, iyyi língko asi-among dem ipít langkumang.

³⁴Depeila Israel gooralo RUUTUM ngokke dungko, noluke yébomko asi-among dem deemang-amo imomapeka.”